ពោធិ៍សាត់ៈ មនុស្ស ២ នាក់ បានរងរបួស ក្នុងគ្រោះអគ្គិភ័យឆេះតូបលក់អីវ៉ាន់ចាប់ហួយ ១ កន្លែង នៅចំណុចភូមិថ្នល់ជប៉ុន សង្កាត់រលាប ក្រុងពោធិ៍សាត់ កាលពីវេលាម៉ោងជាង ៧ យប់ ថ្ងៃទី ១៨ ខែ សីហា ឆ្នាំ ២០២២។ នេះបើយោងតាមហ្វេសប៊ុកអគ្គស្នងការដ្ឋាននគរបាលជាតិចុះផ្សាយនៅព្រឹកថ្ងៃទី ១៩ សីហា។
យោងតាមរបាយការណ៍របស់ លោកវរសេនីយ៍ទោ សុខ មេសា អធិការរងនៃអធិការដ្ឋាននគរបាលក្រុងពោធិ៍សាត់បានប្រាប់ឱ្យដឹងថា ដោយទទួលបានព័ត៌មាន ពីប្រជាពលរដ្ឋ កម្លាំងអធិការដ្ឋាននគរបាលក្រុងពោធិ៍សាត់ សហការជាមួយកម្លាំងស្នងការដ្ឋាននគរបាលខេត្ត បានចុះអន្តរាគមន៍ជួយពន្លត់ភ្លើងឆេះតូបលក់អីវ៉ាន់ខាងលើ ដោយសមត្ថកិច្ចបានប្រើប្រាស់រថយន្តពន្លត់អគ្គិភ័យចំនួន ០២ គ្រឿង ទើបអាចគ្រប់គ្រងស្ថានការណ៍បាន។
លោកអធិការរងបានបន្តថា ករណីនេះ បានបណ្តាលឱ្យមានអ្នករងរបួសចំនួន ០២ នាក់ ទី១ ឈ្មោះ សន ជី ភេទស្រី អាយុ ៧៤ ឆ្នាំ រងរបួសស្រាល ទី២ ឈ្មោះ មាន រក្សា ភេទស្រី អាយុ ២៣ ឆ្នាំ រងរបួសស្រាល អ្នកទាំង ២ រស់នៅក្នុងភូមិ-សង្កាត់ កើតហេតុខាងលើ។
ក្រោយកើតហេតុ សមត្ថកិច្ចបានយករថយន្តសង្គ្រោះដឹកជូនពួកគាត់ទៅព្យាបាលនៅមន្ទីរពេទ្យខេត្តពោធិ៍សាត់។ សម្ភារខូចខាតក្នុងគ្រោះអគ្គិភ័យនេះរួមមាន តូបលក់អីវ៉ាន់ ០១ ខ្នង ទំហំ ៤ ម៉ែត្រ × ៦ ម៉ែត្រ ធ្វើពីឈើ ដំបូលប្រក់ស័ង្កសី និងសម្ភារចាប់ហួយមួយចំនួនទៀត។
មូលហេតុដែលបណ្តាលឱ្យកើតមានគ្រោះអគ្គិភ័យនេះ គឺមកពីជនរងគ្រោះបានដាំបាយចង្រ្កានហ្គាស នៅក្នុងតូបលក់អីវ៉ាន់ ហើយក៏បានឆាបឆេះដបសាំងដែលនៅក្បែរនោះ ទើបបង្កជាអគ្គិភ័យឆាបឆេះកើតឡើង៕