ភ្នំពេញៈ លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បញ្ជាក់ថា ក្រសួងវប្បធម៌នឹងរៀបចំមហោស្រពល្ខោនបាសាក់ទូទាំងប្រទេសឆ្នាំ ២០២២ ចំនួន ២ ថ្ងៃគឺ នៅថ្ងៃទី ៣-៤ ខែតុលា នៅសាលមហោស្រពនាយកដ្ឋានសិល្បៈទស្សនីយភាព រាជធានីភ្នំពេញ ដើម្បីលើកទឹកចិត្តដល់សិល្បករល្ខោនបាសាក់ឱ្យមានសកម្មភាពផុសផុលឡើងវិញ។
លោកស្រីបញ្ជាក់ក្នុងលិខិតចុះថ្ងៃទី ១៥ ខែសីហា ថា ព្រឹត្តិការណ៍វប្បធម៌នេះមានគោលបំណង ដើម្បីចូលរួមថែរក្សា លើកស្ទួយ និងអភិរក្សតម្លៃសិល្បៈវប្បធម៌ប្រពៃណីជាតិ និងអត្តសញ្ញាណជាតិសំដៅរួមចំណែកអភិវឌ្ឍសង្គម និងលើកកម្ពស់កិត្យានុភាពជាតិ។
រដ្ឋមន្ត្រីរូបនេះបានជំរុញដល់មន្ទីរវប្បធម៌ និងវិចិត្រសិល្បៈ រាជធានី ខេត្ត អង្គការ សមាគមសិល្បៈមហាជនផ្សព្វផ្សាយឱ្យបានទូលំទូលាយដល់គ្រប់មជ្ឈដ្ឋានមហាជន ដើម្បីឱ្យសិល្បករដែលមានជំនាញ និងទេពកោសល្យលើទម្រង់ល្ខោនបាសាក់ ចូលរួមប្រឡងក្នុងមហោស្រពនេះ ដើម្បីថែរក្សា ការពារលើកស្ទួយ និងផ្សព្វផ្សាយនូវទម្រង់ល្ខោនបាសាក់។
ក្រសួងក៏នឹងដំណើរការប្រឡងជ្រើសរើសក្រុមល្ខោនបាសាក់ចូលរួមប្រកួតនៅក្នុងមហោស្រពល្ខោនបាសាក់ទូទាំងប្រទេសឆ្នាំ ២០២២ នេះផងដែរ ដោយជយលាភីលេខ ១ នឹងទទួលបានពានមាស ១ អមដោយទឹកប្រាក់ ជយលាភីលេខ ២ នឹងទទួលបានពានប្រាក់ ១ អមដោយទឹកប្រាក់ និងជយលាភីលេខ ៣ នឹងទទួលបានពានសំរិទ្ធ ១ អមដោយទឹកប្រាក់៕