ខេត្តកំពង់ធំ: លោក ងួន រតនៈ អភិបាលខេត្តកំពង់ធំ នៅព្រឹកថ្ងៃទី ១៩ សីហានេះ បានដឹកនាំក្រុមការងារចុះត្រួតពិនិត្យស្ថានភាពទឹកតាមដងស្ទឹងសែន ដែលកំពុងហក់ឡើងខ្លាំង ស្ថិតនៅក្នុងភូមិសាស្ត្រនៃស្រុកកំពង់ស្វាយ និងក្រុងស្ទឹងសែន ដើម្បីត្រៀមលក្ខណៈជួយប្រជាពលរដ្ឋនៅពេលជួបហានិភ័យ ឱ្យបានទាន់ពេលវេលា។
បើតាមហ្វេសប៊ុករដ្ឋបាលខេត្តកំពង់ធំ បានចុះផ្សាយថា នៅក្នុងឱកាសនោះដែរ លោក ងួន រតនៈ ថ្លែងថា ថ្មីៗនេះទឹកនៅតាមដងស្ទឹងសែន គឺមានការហក់ឡើងខ្ពស់ រហូតដល់មានការប្រកាសអាសន្ន ដែលបានធ្វើឱ្យប៉ះពាល់ផលដំណាំ ហេដ្ឋារចនាសម្ព័ន្ធ និងផ្ទះសម្បែងមួយចំនួនរបស់ប្រជាពលរដ្ឋ។
ទន្ទឹមនឹងនោះ លោកអភិបាលខេត្តក៏បានផ្តាំផ្ញើដល់ប្រជាពលរដ្ឋទាំងអស់ សូមប្រុងប្រយ័ត្នខ្ពស់ ចំពោះការហក់ឡើងនៃទឹកជំនន់នៅពេលនេះ ជាពិសេសត្រូវមើលថែក្មេងៗឱ្យបានល្អ ដើម្បីចៀសផុតពីការលង់ទឹក និងឆ្លងចរន្តអគ្គិសនី ក៏ដូចជាការការពារពីសត្វអាសិរពិសនានាខាំ ឬទិច។
ជាមួយគ្នានេះ លោកក៏បានជំរុញឱ្យអាជ្ញាធរ ក្រុង ស្រុក ឃុំ សង្កាត់ បន្តតាមដាននូវស្ថានភាពទឹកជំនន់បន្តទៀត ដើម្បីងាយស្រួលក្នុងការត្រៀមខ្លួនចុះជួយប្រជាពលរដ្ឋឱ្យបានទាន់ពេលវេលា៕