ភ្នំពេញៈ លោក ស ខេង ស្នើចក្រភពអង់គ្លេសគាំទ្របន្ថែមទៀតលើការងារប្រយុទ្ធប្រឆាំងបទល្មើសបច្ចេកវិទ្យា ខណៈធនធានមនុស្សរបស់កងកម្លាំងនគរបាលកម្ពុជាលើវិស័យនេះនៅមានកម្រិតនៅឡើយ។
លោកស្នើដូច្នេះក្នុងជំនួបកាលពីថ្ងៃទី ១៨ ខែសីហា ជាមួយលោកស្រី Tina Redshaw ឯកអគ្គរាជទូតចក្រភពអង់គ្លេសប្រចាំកម្ពុជា ក្នុងឱកាសលោកស្រីត្រូវបញ្ចប់បេសកកម្មការទូតកម្ពុជា។
ហ្វេសប៊ុកក្រសួងមហាផ្ទៃបញ្ជាក់ក្រោយជំនួបនេះថា លោកស្រីថ្លែងអំណរគុណលោក ស ខេង និងអង្គភាពពាក់ព័ន្ធចំណុះឱ្យក្រសួងមហាផ្ទៃ ដែលតែងផ្ដល់នូវកិច្ចសហការគាំទ្រដល់ពលរដ្ឋអង់គ្លេសដែលជួបប្រទះការលំបាកផ្សេងៗនៅកម្ពុជា ជាពិសេសជួយពលរដ្ឋដែលពាក់ព័ន្ធបញ្ហានឹងការងារអន្តោប្រវេសន៍ និងការជួយសម្រួលឱ្យផ្នែកកុងស៊ុលរបស់ស្ថានទូតអង់គ្លេស បានជួបប្រាស្រ័យជាមួយជនជាតិអង់គ្លេសដែលជាប់ឃុំនៅតាមបណ្ដាពន្ធនាគាររបស់កម្ពុជា។
បើតាមហ្វេសប៊ុកដដែល លោកស្រី Tina Redshaw ក៏បានប្រាប់លោក ស ខេង ផងដែរអំពីវេទិកាអន្តរភាគីនានា ក៏ដូចជាកម្មវិធីមួយចំនួនទៀតដែលបានផ្តល់នូវការជួយគាំទ្រដល់ការអភិវឌ្ឍលើវិស័យធនធានមនុស្សរបស់កម្ពុជាផងដែរ ជាពិសេសពាក់ព័ន្ធទៅនឹងការលើកកម្ពស់ធនធានមនុស្សក្នុងវិស័យនគរបាលជាតិដែលកម្មវិធី ក៏ដូចជាវេទិកាទាំងនោះ មានការគាំទ្រពីចក្រភពអង់គ្លេស។
លោក ស ខេង បានថ្លែងអំណរគុណលោកស្រីចំពោះការគាំទ្រ ក៏ដូចជាកិច្ចសហប្រតិបត្តិការនានាលើវិស័យពាក់ព័ន្ធជាមួយនឹងក្រសួងមហាផ្ទៃកម្ពុជា ជាពិសេសលើការងារបណ្តុះបណ្តាលធនធានមនុស្សក្នុងកងកម្លាំងនគរបាលជាតិ។
លោកបានចាត់ទុកថា នេះជាកិច្ចការមួយដ៏មានសារៈសំខាន់ ខណៈក្រសួងមហាផ្ទៃកំពុងតែខិតខំលើកកម្ពស់គុណភាព និងប្រសិទ្ធភាពនគរបាលជាតិជាមន្ត្រីបម្រើសេវាថែរក្សាសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គម។
ហ្វេសប៊ុកដដែលបញ្ជាក់ថា៖ «សម្តេចពិតជាគាំទ្រ និងបន្តលើកទឹកចិត្តឱ្យមានការគាំទ្របន្ថែមទៀតពីចក្រភពអង់គ្លេស ជាពិសេសលើការងារប្រយុទ្ធប្រឆាំងបទល្មើសបច្ចេកវិទ្យា ដែលក៏ជាកិច្ចការមានសារៈសំខាន់ ខណៈធនធានមនុស្សលើវិស័យនេះរបស់កងកម្លាំងនគរបាលកម្ពុជានៅមានកម្រិតនៅឡើយ»។
លោក ស ខេង ថ្លែងថា ការលើកកម្ពស់គុណភាពធនធានមនុស្សក្នុងវិស័យនគរបាលជាតិ ក៏ជាការរួមចំណែកដ៏សំខាន់មួយក្នុងការចូលរួមទប់ស្កាត់បទល្មើសឆ្លងដែនគ្រប់ប្រភេទ។ កិច្ចការនេះក៏ជាកិច្ចការសំខាន់ និងមិនអាចប្រទេសណាមួយធ្វើតែម្នាក់ឯងបាននោះទេ ដែលពិតជាទាមទារឱ្យមាននូវកិច្ចសហប្រតិបត្តិការជាមួយបណ្ដាប្រទេសនានានៅក្នុងតំបន់ និងសកលលោក។
លោកថ្លែងថា ទំនាក់ទំនងរវាងប្រទេសទាំង ២ នៅតែបន្តយ៉ាងល្អប្រសើរជាមួយគ្នា ហើយលោកប្តេជ្ញាបន្តកិច្ចខិតខំប្រឹងប្រែងបន្ថែមទៀត ដើម្បីរួមចំណែកពង្រឹង និងពង្រីកទំនាក់ទំនងប្រទេសទាំង ២ ហើយនឹងបន្តធ្វើការបន្ថែមទៀតជាមួយឯកអគ្គរាជទូតអង់គ្លេសថ្មីប្រចាំកម្ពុជា ដែលត្រូវបន្តអាណត្តិការទូតពីលោកស្រី៕