.jpg)
រូបភាព រដ្ឋបាលខេត្តព្រះសីហនុ
អភិបាលខេត្តព្រះសីហនុ លោក គួច ចំរើន នៅថ្ងៃទី ១៩ ខែសីហានេះបានដឹកនាំក្រុមការងារចុះផ្សព្វផ្សាយរបបសន្តិសុខសង្គមផ្នែកប្រាក់សោធន សម្រាប់បុគ្គលទាំងឡាយណាដែលស្ថិតនៅក្រោមបញ្ញត្តិនៃច្បាប់ស្តីពីការងារជូនកម្មករកម្មការិនីរោងចក្រ Hing Lee (Cambodia) Co,Ltd ប្រមាណ ៣០០ នាក់ នៅតំបន់សេដ្ឋកិច្ចពិសេសបិតត្រាំង ស្ថិតនៅឃុំបិតត្រាំង ស្រុកព្រៃនប់។
លោក គួច ចំរើន បានថ្លែងថា ការផ្សព្វផ្សាយនាពេលនេះ ក្នុងគោលបំណងឱ្យបងប្អូនកម្មករ កម្មការិនីមានការយល់ដឹងកាន់តែច្បាស់អំពីអត្ថប្រយោជន៍ និងការទាមទារអត្ថប្រយោជន៍ពីរបបសន្តិសុខសង្គម ស្របពេលដែលកម្ពុជាទទួលបានសុខសន្តិភាព និងការអភិវឌ្ឍរីកចម្រើនលើគ្រប់វិស័យ ដែលជាសកម្មភាពរបស់បងប្អូនដែលបានចូលរួមចំណែកយ៉ាងផុលផុស។
លោកថា៖ «ការទទួលបានអត្ថប្រយោជន៍ពីរាជរដ្ឋាភិបាលបាននិងកំពុងតែគិតគូរជូនដល់កម្មករ កម្មការិនីនៅតាមបណ្តារោងចក្រ សហគ្រាសនៅទូទាំងប្រទេស ហើយកន្លងមកក៏មានកម្មករ កម្មការិនីរបស់យើងបានទទួលនូវអត្ថប្រយោជន៍ពីរបបសន្តិសុខសង្គមផ្នែកគ្រោះថ្នាក់ការងារ និងថែទាំងសុខភាពផងដែរ»។
ជាមួយគ្នានេះដែរលោកអំពាវនាវឱ្យបងប្អូនកម្មករកម្មការិនីត្រូវសិក្សាឈ្វេងយល់ពីរបបសន្តិសុខសង្គម ដើម្បីទាញយកអត្ថប្រយោជន៍នាពេលបច្ចុប្បន្ន និងទៅអនាគត។
លោកបន្តថា អត្ថប្រយោជន៍ដែលទទួលបានពីរបបសន្តិសុខសង្គមមានចំនួន ៣ ទី ១ របបសន្តិសុខសង្គម ផ្នែកគ្រោះថ្នាក់ការងារដាក់ឱ្យដំណើរការនៅឆ្នាំ ២០០៨ ទី ២ របបសន្តិសុខសង្គម ផ្នែកថែទាំសុខភាពដាក់ឱ្យដំណើរការនៅឆ្នាំ ២០១៦ និងទី ៣ របបសន្តិសុខសង្គមផ្នែកសោធនដាក់ឱ្យអនុវត្តចាប់ពីថ្ងៃទី ១ ខែ កក្កដា ឆ្នាំ ២០២២ ថ្មីៗនេះ។
លោក យ៉ូវ ខេមរ៉ា ប្រធានមន្ទីរការងារបណ្តុះបណ្តាលវិជា្ជជីវ:ខេត្តព្រះសីហនុ បានរាយការណ៍ពីសកម្មភាពការងារនៅក្នុងតំបន់សេដ្ឋកិច្ចពិសេសបិតត្រាំង ស្រុកព្រៃនប់ ដែលមានរោងចក្រ សហគ្រាសបានចុះបញ្ជីចំនួន ២១២ ដែលមានកម្មករសរុបចំនួន ២៥០៤៦ នាក់ ស្រី ១៣ ៤៤៨ នាក់៕
