ស្វាយរៀងៈ កម្លាំងជំនាញនៃស្នងការដ្ឋាននគរបាលខេត្តស្វាយរៀងនៅថ្ងៃទី ១៩ ខែសីហានេះបានបញ្ជូនខ្លួនជនសង្ស័យជាជនជាតិវៀតណាមចំនួន ៩ នាក់ ដែលជាប់ទាក់ទិនក្នុងករណីជួញដូរផ្តល់ទីតាំងជួយសម្រួលឱ្យប្រើប្រាស់គ្រឿងញៀនខុសច្បាប់ រួមជាមួយវត្ថុតាងទៅកាន់សាលាដំបូងខេត្តស្វាយរៀង ដើម្បីចាត់ការបន្តតាមច្បាប់។ នេះបើយោងតាមហ្វេសប៊ុកអគ្គស្នងការដ្ឋាននគរបាលជាតិ។
អនុវត្តតាមបទបញ្ជារបស់លោកឧត្តមសេនីយ៍ កឹង ឃន ស្នងការនគរបាលខេត្ត និងដឹកនាំបញ្ជាផ្ទាល់ពីលោកឧត្តមសេនីយ៍ ត្រី កែវ សុថា ស្នងការរងទទួលផែនការងារប្រឆាំងគ្រឿងញៀន លោកវរសេនីយ៍ឯក កាន កេន នាយការិយាល័យ លោកវរសេនីយ៍ទោ អែម សុវណ្ណារិទ្ធិ អធិការនគរបាលក្រុងបាវិត ដោយមានការដឹកនាំសម្របសម្រួលផ្ទាល់ពីលោក ស៊ន មុន្នី ព្រះរាជអាជ្ញារង អមសាលាដំបូងខេត្តកាលពីវេលាម៉ោង ៣ ទៀបភ្លី ថ្ងៃទី ១៥ ខែសីហា ឆ្នាំ ២០២២ កម្លាំងជំនាញការិយាល័យប្រឆាំងគ្រឿងញៀនសហការជាមួយកម្លាំងអធិការដ្ឋាននគរបាលក្រុងបាវិតបានបើកប្រតិបត្តិការ ឆ្មក់ចូលបង្ក្រាបទីតាំងផ្តល់និងជួយសម្រួល ការប្រើប្រាស់គ្រឿងញៀន និងជួញដូរដោយខុសច្បាប់នូវសារធាតុញៀន ជ្រកក្រោមស្លាកយីហោ ម៉ាស្សា (MASSAGE THEN THAI) មានទីតាំងនៅក្នុងបុរីសមសួនស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង និងបានចាប់ខ្លួនជនសង្ស័យទាំង ៩ នាក់នេះ។
ក្នុងកិច្ចប្រតិបត្តិការនេះសមត្ថកិច្ចបានចាប់យកវត្ថុតាងរួមមានម្ស៉ៅក្រាមសថ្លា (មេតំហ្វេតាមីន ០២ កញ្ចប់) ម្ស៉ៅ K ១ កញ្ចប់ ថ្នាំគ្រាប់ពណ៌កាហ្វេ ០៤ គ្រាប់ ជញ្ជីងថ្លឹងថ្នាំញៀន ០១ គ្រឿង ចានសម្រាប់ដាក់ជក់ និងហិតគ្រឿងញៀន ០៣ ទូរសព្ទដៃ ២១ គ្រឿង ព្រមទាំងសម្ភារឧបករណ៍ជក់ប្រើប្រាស់គ្រឿងញៀនមួយចំនួនទៀត៕