.jpg)
រូបថត រដ្ឋបាលខេត្តព្រះសីហនុ
អភិបាលរងខេត្តព្រះសីហនុលោក ឡុង ឌីម៉ង់ អំពាវនាវជាថ្មីដល់អ្នកជក់បារី ឬបារីអេឡិចត្រូនិក និងអាជីវករផលិតផលថ្នាំជក់គ្រប់ប្រភេទចូលរួមកាត់បន្ថយ ឬបញ្ឈប់ការប្រើប្រាស់ ដើម្បីចូលរួមអនុវត្តច្បាប់ ថែរក្សាសុខភាពផ្ទាល់ខ្លួន និងគ្រួសារ ខណៈបារីប្រភេទនេះបង្កផលប៉ះពាល់ធ្ងន់ធ្ងរដល់សុខភាព។
ការអំពាវនាវនេះធ្វើឡើង ខណៈលោក ឡុង ឌីម៉ង់ បានអញ្ជើញចូលរួមកិច្ចប្រជុំស្តីពី "ការគ្រប់គ្រងបរិស្ថានគ្មានផ្សែងបារីក្នុងវិស័យទេសចរណ៍" ក្រោមអធិបតីភាពលោក ហោ សារុន រដ្ឋលេខាធិការក្រសួងទេសចរណ៍ ដោយមានការចូលរួមពីតំណាងរដ្ឋបាលក្រុង-ស្រុកទាំង ៥ មន្ទីរ អង្គភាពពាក់ព័ន្ធ និងស្ថាប័នឯកជនសរុបចំនួន ២១ រូបនៅសាលប្រជុំគណៈអភិបាលខេត្តកាលពីថ្ងៃទី ១៨ ខែសីហានេះ។
លោក ហោ សារុន រដ្ឋលេខាធិការក្រសួងទេសចរណ៍មានប្រសាសន៍ថា ទីក្រុងគ្មានផ្សែងបារីមិនមែនជាទីក្រុងដែលមិនមានវត្តមានផ្សែងបារីសោះនោះទេ ប៉ុន្តែគឺជាទីក្រុងដែលមានការអនុវត្តតាមច្បាប់ និងលិខិតបទដ្ឋានគតិយុត្តនានាទាក់ទងនឹងការត្រួតពិនិត្យ គ្រប់គ្រង និងហាមឃាត់បានល្អ។
ជាមួយគ្នានេះ លោក ឡុង ឌីម៉ង់ អភិបាលរងខេត្តព្រះសីហនុបានអំពាវនាវដល់អ្នកជក់បារី ឬបារីអេឡិចត្រូនិក និងអាជីវករផលិតផលថ្នាំជក់គ្រប់ប្រភេទ សូមកាត់បន្ថយ ឬបញ្ឈប់ការប្រើប្រាស់ ដើម្បីចូលរួមអនុវត្តច្បាប់ ថែរក្សាសុខភាពផ្ទាល់ខ្លួន និងគ្រួសារ ក៏ដូចជាកាត់បន្ថយចំណាយមិនចាំបាច់ក្នុងគ្រួសារ។
លោកក៏បានណែនាំឱ្យអាជ្ញាធរ ក្រុងស្រុក សង្កាត់ មន្ទីរជំនាញពាក់ព័ន្ធ និងកងកម្លាំងមានសមត្ថកិច្ច ចូលរួមឱ្យបានសកម្មក្នុងការអនុវត្តផ្សព្វផ្សាយ ណែនាំ ច្បាប់ និងលិខិតបទដ្ឋានគតិយុត្តពាក់ព័ន្ធនឹងការទប់ស្កាត់ និងហាមឃាត់ការជក់បារីនៅតាមទីសាធារណៈ ដើម្បីការពារសុខុមាលភាពសាធារណៈ និងអាយុជីវិតរបស់ប្រជាពលរដ្ឋ។
កន្លងទៅក្រសួង និងស្ថាប័នពាក់ព័ន្ធបានចេញសេចក្តីណែនាំស្តីពីការទប់ស្កាត់ ការប្រើប្រាស់បារីអេឡិចត្រូនិក (E-Cigarette/Vape) និងផលិតផល អេចន៍ ធី ភី (HTPs) ដោយចាត់ទុកថាបារីអេឡិចត្រូនិកទាំងនេះបង្កគ្រោះថ្នាក់ធ្ងន់ធ្ងរដល់សុខភាព ដូចជា បង្កជំងឺមហារីក បង្កើនហានិភ័យជំងឺបេះដូង ជំងឺសួតធ្វើឱ្យខួរក្បាលមានដំណើរការមិនប្រក្រតីក្នុងអំឡុងពេលប្រើប្រាស់ និងប៉ះពាល់យូរអង្វែងដល់ការលូតលាស់ខួរក្បាលរបស់កុមារ និងយុវវ័យជាដើម៕
