.jpg)
រូបភាព ព្រឹទ្ធសភាកម្ពុជា
ភ្នំពេញៈ លោក សាយ ឈុំ ប្រធានព្រឹទ្ធសភា និងលោក Vahram Kazhoyan ឯកអគ្គរដ្ឋទូតអាមេនីថ្មីប្រចាំកម្ពុជាបានបញ្ជាក់ជំហរប្តេជ្ញាពង្រីកចំណងមិត្តភាព និងកិច្ចសហប្រតិបត្តិការសម្រាប់ផលប្រយោជន៍ទៅវិញទៅមករបស់ប្រជាជន និងប្រទេសទាំង ២។
ក្នុងជំនួបជាមួយលោក Vahram Kazhoyan នាថ្ងៃទី ១៩ ខែសីហា លោក សាយ ឈុំ មានជំនឿជឿជាក់ថា ក្នុងអាណត្តិបេសកកម្មការទូតរបស់លោក Vahram Kazhoyan លោកនឹងខិតខំលើកកម្ពស់ទំនាក់ទំនង និងកិច្ចសហប្រតិបត្តិការរវាងប្រទេសទាំង ២ ឱ្យកាន់តែរីកចម្រើន ដើម្បីជាប្រយោជន៍សម្រាប់ប្រជាជន និងប្រទេសទាំង ២ ទាំងពេលបច្ចុប្បន្ន និងពេលអនាគត។
ហ្វេសប៊ុកព្រឹទ្ធសភាបានដកស្រង់សម្ដីលោក សាយ ឈុំ ថា៖ «ព្រឹទ្ធសភាកម្ពុជាត្រៀមខ្លួនជានិច្ច ដើម្បីធ្វើសហប្រតិបត្តិការដ៏ជិតស្និទ្ធជាមួយឯកឧត្តមឯកអគ្គរដ្ឋទូត និងស្ថានទូតអាមេនី ដើម្បីរួមចំណែកបន្តពង្រឹងពង្រីកចំណងមិត្តភាព និងកិច្ចសហប្រតិបត្តិការសម្រាប់ផលប្រយោជន៍ទៅវិញទៅមករបស់ប្រជាជន និងប្រទេសទាំង ២»។
បើតាមហ្វេសប៊ុកដដែល លោក Vahram Kazhoyan បានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អរវាងប្រទេសទាំង ២ ហើយតាមរយៈបេសកកម្មការទូតរបស់លោក លោកនឹងខិតខំពង្រីកទំនាក់ទំនង និងកិច្ចសហប្រតិបត្តិការរវាងសភា រដ្ឋាភិបាល និងប្រជាជននៃប្រទេសទាំង ២៕
