ក្រចេះ: មន្ទីរកសិកម្មរុក្ខាប្រមាញ់ និងនេសាទខេត្តក្រចេះកាលពីថ្ងៃទី ១៨ សីហាបានប្រារព្ធពិធីលែងកូនត្រី និងត្រីមេពូជចំនួន ៤ ម៉ឺនក្បាល ចូលទៅក្នុងបឹងធម្មជាតិឈ្មោះថាបឹងរំអិល ស្ថិតនៅក្នុងភូមិកាំពី ឃុំសំបុក ស្រុកចិត្របុរី ដែលជាការអបអរសាទរទិវាមច្ឆជាតិ ១ កក្កដា បើទោះបីជាទិវានេះបានកន្លងផុតទៅជាង ១ ខែហើយក្តី។
បើតាមហ្វេសប៊ុករដ្ឋបាលខេត្តក្រចេះចុះផ្សាយនៅថ្ងៃទី ១៩ សីហានេះ ពិធីលែងកូនត្រី ៤ ម៉ឺនក្បាលនេះ ត្រូវបានធ្វើឡើងក្រោមអធិបតីភាព លោក ប៉ែន លីណាត អភិបាលខេត្តស្តីទី។
លោក ទ្រី សុភក្តិ ប្រធានមន្ទីរកសិកម្មរុក្ខាប្រមាញ់ និងនេសាទខេត្ត បានឱ្យដឹងថា ដោយទទួលបានការអនុញ្ញាតពីលោក វ៉ា ថន អភិបាលខេត្តឱ្យរៀបចំទិវាមច្ឆជាតិថ្នាក់ខេត្ត នៅក្នុងបឹងរំអិល ឃុំសំបុក ស្រុកចិត្របុរីនេះ ទើបមានការលែងកូនត្រីក្នុងស្រុក សរុបចំនួន ៤ ម៉ឺនក្បាល និងត្រីមេពូជចំនួន ១៥ គីឡូក្រាម។
ត្រីដែលត្រូវបានលែងទាំងនេះ រួមមាន ត្រីប្រា ត្រីឆ្ពិន ត្រីកាហែ ត្រីក្អែក អន្ទង់ ត្រីរ៉ស និងត្រីក្រាញ់ ចូលក្នុងបឹងរំអិល ដើម្បីបង្កើនផលស្តុកនៅក្នុងធម្មជាតិឱ្យកាន់តែសម្បូរឡើងថែមទៀត សម្រាប់ប្រើប្រាស់ក្នុងសហគមន៍មូលដ្ឋាន។
បឹងរំអិលនេះ មានទំហំប្រមាណ ៣២ ហិកតា និងមានកន្លែងអភិរក្សត្រីមេពូជចំនួន ២,៥ ហិកតា ដោយមានទឹកទាំងរដូវប្រាំង និងរដូវវស្សា។
សហគមន៍នេសាទក្នុងតំបន់នេះត្រូវបានរៀបចំបង្កើតឡើងនៅឆ្នាំ ២០០៩ មានសមាជិកសហគមន៍សរុបចំនួន ២០៧ នាក់ ស្មើនឹង ១៥៤ គ្រួសារ និងបានចុះបញ្ជីទទួលស្គាល់ជាផ្លូវការដោយប្រកាសលេខ ៦២៨ ប្រក.កសក នៅឆ្នាំ ២០១១ របស់ក្រសួងកសិកម្ម រុក្ខាប្រមាញ់ និងនេសាទ។
លោក ប៉ែន លីណាត មានប្រសាសន៍ថា៖ «កំណើនប្រជាពលរដ្ឋក៏ដូចជាកំណើនប្រជានេសាទ ដែលរស់នៅជុំវិញបឹងរំអិលនេះមានការកើនឡើងយ៉ាងឆាប់រហ័សបានដាក់សម្ពាធយ៉ាងធ្ងន់បន្ថែមទៀត ធ្វើឱ្យមានផលប៉ះពាល់ជាអវិជ្ជមានដល់ធនធានជលផល និងធនធានធម្មជាតិផ្សេងៗទៀត ដែលនេះនៅតែជាឧបសគ្គចម្បងក្នុងការធ្វើឱ្យបានសម្រេចតាមផែនការប្រើប្រាស់អភិវឌ្ឍធនធានជលផល និងធនធានធម្មជាតិដទៃទៀត ប្រកបដោយចីរភាព»។
លោកបញ្ជាក់ថា ដោយហេតុនេះហើយទើបរាជរដ្ឋាភិបាលបានរៀបចំកម្មវិធីកំណត់ទម្រង់ គោលនយោបាយវិស័យជលផលដ៏ស៊ីជម្រៅមួយជាប្រវត្តិសាស្ត្រ ដោយបានលុបឡូត៍នេសាទទាំងអស់ ហើយបានប្រគល់សិទ្ធិអំណាចទៅឱ្យសហគមន៍គ្រប់គ្រង និងប្រើប្រាស់ធនធានដោយផ្ទាល់ ដែលបានធ្វើឱ្យប្រជាកសិករអាចមានលទ្ធភាពចូលរួមយ៉ាងសកម្ម នៅក្នុងការសម្រេចចិត្ត និងរៀបចំផែនការកម្មវិធីអភិវឌ្ឍន៍នានារបស់មូលដ្ឋានរៀងៗខ្លួន ហើយរួមចំណែកទទួលខុសត្រូវ និងធ្វើជាម្ចាស់លើការគ្រប់គ្រងធនធានធម្មជាតិដោយខ្លួនឯង។
លោកអភិបាលខេត្តស្តីទីបញ្ចាក់ថា៖ «ដូច្នេះសូមបងប្អូនប្រជាសហគមន៍ សូមចូលរួមថែរក្សាបឹងនេះឱ្យបានល្អ កុំប្រើឧបករណ៍នេសាទល្មើសច្បាប់ ក្នុងការធ្វើនេសាទ ជាពិសេសគឺឧបករណ៍ឆក់ ស្បៃមុងជាដើម និងខិតខំដាំដើមឈើបន្ថែម»៕