ភ្នំពេញៈ រដ្ឋបាលខេត្តកំពង់ធំ អំពាវនាវដល់ប្រជាពលរដ្ឋដែលរស់នៅតាមដងស្ទឹងសែន ខេត្តកំពង់ធំ បង្កើនការប្រុងប្រយ័ត្នខ្ពស់ ដើម្បីចៀសវាងគ្រោះថ្នាក់ផ្សេងៗ ខណៈកម្ពស់ទឹកស្ទឹងសែនឡើងខ្ពស់ជាងកម្ពស់ត្រូវប្រុងប្រយ័ត្ន។
រដ្ឋបាលខេត្តកំពង់ធំបានបញ្ជាក់ក្នុងសេចក្តីជូនដំណឹងនាថ្ងៃទី១៩ ខែសីហាថា កម្ពស់ទឹកស្ទឹងសែនបានឡើងដល់ចំណុចត្រូវប្រុងប្រយ័ត្នខ្ពស់។ ជាក់ស្តែង នាថ្ងៃទី១៨ ខែសីហា កម្ពស់ទឹកស្ទឹងសែន នៅស្ថាន័យកំពង់ធំមានកម្ពស់ ១៣,៥៨ម៉ែត្រ ខ្ពស់ជាងកម្ពស់ត្រូវប្រុងប្រយ័ត្ន ០,០៨ម៉ែត្រ ដែលកម្ពស់ប្រុងប្រយ័ត្ន ១៣,៥០ម៉ែត្រ។
រដ្ឋបាលខេត្តកំពង់ធំបន្តថា តាមការជូនដំណឹងរបស់ក្រសួង ធនធានទឹក អាចនឹងមានភ្លៀងធ្លាក់ជាបន្តបន្ទាប់រហូតដល់ថ្ងៃទី១៩ ខែសីហា បន្តទៀត។
រដ្ឋបាលខេត្តកំពង់ធំបញ្ជាក់ថា៖ «ក្នុងន័យនេះ សូមបងប្អូនប្រជាពលរដ្ឋរស់នៅតាមដងស្ទឹងសែន ក្នុងស្រុកសណ្តាន់ ស្រុកប្រាសាទសំបូរ ស្រុកកំពង់ស្វាយ ក្រុងស្ទឹងសែន បង្កើនការប្រុងប្រយ័ត្នខ្ពស់ ដើម្បីចៀសវាងគ្រោះថ្នាក់ផ្សេងៗ ដែលនឹងអាចកើតមានឡើងជាយថាហេតុ»។
រដ្ឋបាលខេត្តកំពង់ធំអំពាវនាវដល់អាជ្ញាធរមូលដ្ឋានគ្រប់លំដាប់ថ្នាក់ត្រូវយកចិត្តទុកដាក់ត្រៀមអន្តរាគមន៍ និងរៀបចំទីទួលសុវត្ថិភាពសមរម្យ ហើយក្នុងករណីមានការលិចលង់ត្រូវជម្លៀសប្រជាពលរដ្ឋ៕