.jpg)
រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន។ រូបថត ហេង ជីវ័ន
រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន បកស្រាយបំភ្លឺជុំវិញការដាក់បញ្ចូល ដេប៉ាតឺម៉ង់សិក្សាភាសាវៀតណាមនៅកម្ពុជា និងបានលើកឡើងថាការបណ្តុះបណ្តាលនេះមិនមែនដាក់បញ្ចូលទៅក្នុងកម្មវិធីសិក្សារដ្ឋនោះទេ គឺសម្រាប់បណ្តុះបណ្តាលដល់និស្សិតកម្ពុជាដែលទទួលបានអាហារូបករណ៍ត្រៀមទៅរៀននៅវៀតណាម និងអ្នកសិក្សាផ្នែកឯកទេសប៉ុណ្ណោះ។
ក្នុងសន្និសីទសារព័ត៌មានស្តីពីការបង្កើត វិទ្យាសា្ថនសិក្សាអន្តរជាតិ និងគោលនយោបាយសាធារណៈនៅសាកលវិទ្យាល័យភូមិន្ទភ្នំពេញនៅថ្ងៃទី ១៩ ខែសីហានេះ រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន លើកឡើងថា ប្រទេសវៀតណាមគឺជាដៃគូពាណិជ្ជកម្មទី ១ ជាមួយកម្ពុជា ដែលចំនួនការនាំចេញនាំចូលសរុបជាង ៥ ពាន់លានដុល្លារសហរដ្ឋអាមេរិក ហើយក្នុងបរិបទកូវីដ ១៩ ចំនួននេះក៏បានកើនឡើងយ៉ាងខ្លាំង។
លោកបន្តថា ដូច្នេះការបង្កើតដេប៉ាតឺម៉ងសិក្សាភាសាវៀតណាម ដើម្បីបណ្តុះបណ្តាលលើមុខជំនាញទាំងនេះនឹងជួយដល់ការបង្កើតការងារសម្រាប់ប្រជាជនកម្ពុជា ដែលរស់នៅជាប់ខេត្តព្រំដែនតាមរយៈការបង្កើនទំហំពាណិជ្ជកម្មជាមួយវៀតណាម និងអ្នកវិនិយោគិនវៀតណាមមកដាក់ទុនវិនិយោគនៅក្នុងប្រទេសកម្ពុជា។
លោកថា៖ «ម្យ៉ាងវិញទៀត ដេប៉ាតឺម៉ង់សិក្សាភាសាវៀតណាមនឹងជួយបណ្តុះបណ្តាលភាសាវៀតណាមចំនួនមួយឆ្នាំដល់និស្សិតកម្ពុជា ដែលបានទទួលអាហារូបករណ៍ទៅរៀននៅសាធារណរដ្ឋសង្គមនិយមវៀតណាម ដែលក្នុងមួយឆ្នាំយើងបញ្ជូននិស្សិតចំនួន ១២០ រូបទៅរៀនពីថ្នាក់បរិញ្ញាបត្ររហូតដល់ថ្នាក់បណ្ឌិតក្នុងមួយឆ្នាំហើយភាគច្រើនអ្នករៀនខាងផ្នែកវេជ្ជសាស្ត្រ ក៏ដូចជាមានការបណ្តុះបណ្តាលកីឡាករផងដែរ»។
លោកបន្តទៀតថា ដោយសារកន្លងទៅ និស្សិតកម្ពុជាមានការលំបាកក្នុងការសិក្សាជាមួយនិស្សិតវៀតណាម ដោយសារពួកគេមិនបានរៀនភាសាវៀតណាមជាមុន ហើយរៀនតែក្នុងរយៈពេលតែពីរ ឬបីខែរួចទៅចូលរៀនជាមួយនឹងនិស្សិតវៀតណាម ដែលបង្កើតឱ្យមានការលំបាក ដូច្នេះការបង្រៀនភាសាវៀតណាមនៅកម្ពុជារយៈពេលមួយឆ្នាំនេះនឹងជួយដល់ពួកគេផងដែរ។
ពាក់ព័ន្ធការបារម្ភរបស់ប្រជាពលរដ្ឋវិញលោកគូសបញ្ជាក់ថា៖ «ចំពោះការបារម្ភ ស្ថានភាពបច្ចុប្បន្ន និងស្ថានភាពសតវត្សរ៍ទី ១៨ និង ១៩ ខុសគ្នា យើងដឹងហើយថានៅសតវត្សរ៍ទី ១៨ និង ១៩ គឺ ទំនាក់ទំនងរវាងប្រទេស និងប្រទេស មិនប្រើច្បាប់អន្តរជាតិទេ គឺប្រើកម្លាំងជាធំ ប្រទេសណាខ្លាំងដាក់អាណានិគមបាន ដូច្នេះក្រោយសង្គ្រាមលោកលើកទី ២ យើងមានច្បាប់អន្តរជាតិមួយដែលរឹងមាំ គឺអង្គការសហប្រជាជាតិ គ្មានប្រទេសណាមួយអាចដាក់អាណានិគមនិយមទៅលើប្រទេសណាបានទេ ចឹងស្ថានភាពបច្ចុប្បន្នខុសពីស្ថានភាព ១០០ ឬ ២០០ ឆ្នាំមុន»។
លោក ហង់ជួន ណារ៉ុន បន្តទៀតថា កម្ពុជាជារដ្ឋអធិបតេយ្យ ដូច្នេះយើងបង្កើតអ្វីមួយ គឺមិនមែនទៅតាមសំណើ ឬសំណូមពររបស់នរណាម្នាក់ទេ គឺទៅតាមតម្រូវការរបស់កម្ពុជា ដើម្បីបំពេញតម្រូវការរបស់យើង ដូច្នេះភាគីវៀតណាមមិនអាចបង្គាប់បញ្ជាមកលើយើងក្នុងការធ្វើអ្វីមួយទេ ដូច្នេះការបង្កើតវិទ្យាស្ថានសិក្សាអន្តរជាតិ និងគោលនយោបាយសាធារណៈគឺចង់លើកកម្ពស់ការសិក្សាអន្តរជាតិ គឺការសិក្សាពីអាស៊ានផងដែរ»។
លោកថា៖ «ការសិក្សាប្រទេសអាស៊ាន រួមទាំងការសិក្សាពីប្រទេសជិតខាងដូចជាប្រទេសថៃ វៀតណាម និងឡាវ ពិតជាមានសារៈសំខាន់សម្រាប់ការលើកកម្ពស់ពាណិជ្ជកម្ម ការវិនិយោគទុនទេសចរណ៍ និងការអភិវឌ្ឍនៅតំបន់ជាយដែន ដូចជាការអភិវឌ្ឍតំបន់សេដ្ឋកិច្ចពិសេសបាវិត នៅជាប់ព្រំដែនប្រទេសវៀតណាម និងការអភិវឌ្ឍតាមបណ្តាខេត្តជាប់ព្រំដែន ថៃ និងឡាវ។
លោកបានបន្ថែមថា កម្ពុជាក៏បង្កើតមជ្ឈមណ្ឌល ២ ស្តីពីការសិក្សាអាស៊ានដែរ មួយមានទីតាំងនៅសាកលវិទ្យាល័យជាតិគ្រប់គ្រង ដែលផ្តោតទៅលើការសិក្សាផ្នែកសេដ្ឋកិច្ចអាស៊ាន និងមួយទៀតនៅសាកលវិទ្យាល័យភូមិន្ទភ្នំពេញដែលសិក្សាទូទៅ។
លោកបន្តថា ការបង្កើតឱ្យមានដេប៉ាតឺម៉ងសិក្សាភាសាវៀតណាមនេះក៏នឹងបណ្តុះបណ្តាលផងដែរដល់អ្នកឯកទេស ដែលជាអ្នកការទូតក៏ដូចជា អ្នកដែលត្រូវទៅធ្វើការផ្នែកពាណិជ្ជកម្មនៅវៀតណាមក៏ដូចជាអ្នកធ្វើការនៅតាមក្រុមហ៊ុនឯកជនដែលប្រើប្រាស់ភាសាវៀតណាម។
លោកថា៖ « ពោលការបណ្តុះបណ្តាលភាសាវៀតណាមនេះមិនមែនសម្រាប់និស្សិត ឬសិស្សទូទៅទេ គឺសម្រាប់ផ្តោតទៅលើអ្នកឯកទេស អ្នកការទូត ក៏ដូចជានិស្សិតដែលត្រូវទៅរៀននៅប្រទេសវៀតណាម»។
លោកឱ្យដឹងថា សាកលវិទ្យាល័យភូមិន្ទភ្នំពេញបាននិងកំពុងបណ្តុះបណ្តាលថ្នាក់បរិញ្ញាបត្រខាងផ្នែកភាសាអង់គ្លេស បារាំង ជប៉ុន ចិន ថៃ និងភាសាកូរ៉េផងដែរ។
លោកបន្តថា៖ «ខ្ញុំចង់បញ្ជាក់លម្អិតថា ការរៀនស្អីក៏ដោយនៅសាកលវិទ្យាល័យភូមិន្ទភ្នំពេញត្រូវបង់លុយ ដូច្នេះការបណ្តុះបណ្តាលនេះ ហើយកម្ពុជានៅក្នុងកម្មវិធីសិក្សារបស់យើងមានតែ ២ ទេគឺអង់គ្លេស និងបារាំង»។
លោកបន្តទៀតថា បើសិនជាយើងចង់ដឹងពីអាស៊ានគឺត្រូវដឹងពីសមាជិកអាស៊ាននីមួយៗដែរ ហើយចំណេះដឹងទូទៅនេះមានសារៈសំខាន់ណាស់ សម្រាប់ពិភពលោកបច្ចុប្បន្នជាជាងធ្វើសង្គ្រាមជាមួយគ្នា។
លោកថា៖ «ប៉ុន្តែកិច្ចសហប្រតិបត្តិការនេះមានសារៈសំខាន់ ព្រោះប្រវត្តិសាស្ត្រពីដើម ចង់តែធ្វើសង្គ្រាម យើងដឹងហើយថានៅក្នុងរបបលន់នល់ក្តី ខ្មែរក្រហមក្តី សង្គ្រាមជាមួយប្រទេសជិតខាងមិនមានផលប្រយោជន៍ទេ ដូច្នេះហើយបានជាសម្តេចតេជោនាយករដ្ឋមន្ត្រី ហ៊ុន សែន លោកបានដាក់ចេញជាគោលការណ៍ច្បាស់លាស់គឺការប្រែក្លាយព្រំប្រទល់កម្ពុជាជាមួយប្រទេសជិតខាងឱ្យក្លាយទៅជាព្រំប្រទល់ សន្តិភាព និងកិច្ចសហប្រតិបត្តិការដែលនាំមកនូវការអភិវឌ្ឍសម្រាប់ទាំងសងខាង»៕
