ភ្នំពេញៈ ខេត្តឧត្តរមានជ័យ ព្រះវិហារ កំពង់ធំ ស្ទឹងត្រែង និង​ខេត្ត​រតនគិរី អាច​ប្រឈម​នឹង​ជំនន់​ទឹក​ភ្លៀង ចន្លោះ​ពី​ថ្ងៃទី ២០ ដល់​ថ្ងៃទី ២៣ ខែ​សីហា​នេះ ដោយសារ តំបន់​ផ្ទៃរង​ទឹកភ្លៀង ទី​ទំនាប​ជាប់ផ្លូវ​ទឹក​នៅ​តាម​បណ្តា​ខេត្ត​ក្នុង​ភូមិសាស្រ្ត​ទាំងនោះ ទទួល​បាន​នូវ​បរិមាណទឹកភ្លៀង​ច្រើន​កន្លង​រួច​មក​ហើយ។ នេះ​បើ​តាម​សេចក្តី​ជូន​ដំណឹង​ពី​ក្រសួង​ធនធានទឹក។

តាម​សេចក្តី​ជូន​ដំណឹង​របស់​ក្រសួង​ធនធានទឹក ចេញ​ថ្ងៃទី​១៩ ខែ​សីហា បាន​ឱ្យ​ដឹង​ថា ជ្រលង​សម្ពាធ​ទាប​ឥណ្ឌា និង​ប្រព័ន្ធ​សម្ពាធ​ទាប (ITCZ) ដែល​កើត​សាជាថ្មី​អូស​បន្លាយ​នៅ​លើ​ភាគ​ខាង​ជើង​កម្ពុជា ស្ថិត​ក្នុង​ប្រទេស​ថៃ ឡាវ និង​វៀតណាម ដោយ​ភ្ជាប់​ជាមួយ​នឹង​សម្ពាធទាប​សកម្ម​មួយ​ស្ថិត​នៅ​ក្នុង​សមុទ្រ​តុងកឹង គួបផ្សំ​នឹង​ការ​បង្កើន​ល្បឿន​បក់​នៃ​របប​ខ្យល់​មូសុង​និរតី​ផង​នោះ នឹង​ធ្វើ​ឱ្យ​ខេត្ត​ចំនួន ៥ នៅ​កម្ពុជា អាច​ប្រឈម​ជំនន់​ទឹកភ្លៀង។

ក្រសួង​ធនធានទឹក​បញ្ជាក់​ថា៖ «ស្ថានភាព​នោះ​អាច​បង្ក​ឱ្យ​តំបន់​ផ្ទៃរង​ទឹកភ្លៀង ទី​ទំនាប​ជាប់​ផ្លូវ​ទឹក​នៅ​តាម​បណ្តា​ខេត្ត​ក្នុង​ភូមិសាស្រ្ត​ទាំងនោះ ដែល​ទទួល​បាន​នូវ​បរិមាណ​ទឹកភ្លៀង​ច្រើន​កន្លង​រួចមក​ហើយ មាន​ជាអាទិ៍ ៖ ខេត្ត​ឧត្តរមានជ័យ ព្រះវិហារ កំពង់ធំ (ស្ទឹងសែន) ស្ទឹងត្រែង និង​ខេត្ត​រតនគិរី អាច​ប្រឈម​នឹង​ជំនន់​ទឹកភ្លៀង»។

ចំណែក​បណ្តា​ខេត្ត​នៅ​ក្នុង​ភូមិសាស្រ្ត​ជួរភ្នំ​ដងរែក និង​តំបន់​ខ្ពង់រាប​ភាគ​ឦសាន នឹង​អាច​មាន​ភ្លៀង​ធ្លាក់​ជា​បន្តបន្ទាប់​ក្នុង​កម្រិត​កើនឡើង​ពីមធ្យម​ទៅ​ច្រើន ខណៈ​បណ្តា​ខេត្ត​ដទៃទៀត និង​រាជធានី​ភ្នំពេញ នឹង​អាច​មាន​ភ្លៀង​ធ្លាក់​ក្នុង​កម្រិត​ពី​តិចទៅ​បង្គួរ និង​ច្រើន​ដោយ​នៅ​តាមតំបន់​ខ្លះ។ ទន្ទឹមនេះ​ផងដែរ អាច​នឹង​មាន​ភ្លៀង​ធ្លាក់​ច្រើន​នៅ​តំបន់​ផ្ទៃរងទឹក​ភ្លៀង​នៃ​អាង​មេគង្គ ដែល​អាច​ធ្វើ​ឱ្យ​ទឹក​ទន្លេ មាន​ការ​ហក់ឡើងសាជាថ្មី៕