ត្បូងឃ្មុំៈ ក្រសួងការពារជាតិសាងសង់មហាចេតិយ សម្រាប់តម្កល់អដ្ឋិធាតុ និងជាស្តូបរំឭកគុណយុទ្ធជន កងកម្លាំងប្រដាប់អាវុធសាមគ្គីសង្គ្រោះជាតិកម្ពុជា ចំនួន ៤៩ រូប នៅតំបន់ប្រវត្តិសាស្ត្រយោធាតេជោកោះថ្ម X-16 ស្ថិតនៅភូមិកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ។
ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ លោក ទៀ បាញ់ ថ្លែងក្នុងពិធីបញ្ចុះបឋមសិលាសាងសង់មហាចេតិយនេះ កាលពីថ្ងៃទី ២០ ខែសីហា ថា ការសាងសង់ចេតិយ សម្រាប់តម្កល់អដ្ឋិធាតុកងកម្លាំងប្រដាប់អាវុធសង្គ្រោះជាតិកម្ពុជា ក្នុងស្មារតីចងចាំជានិច្ច ដើម្បីរំឭកដល់គុណបំណាច់ដ៏ធំធេងចំពោះយុទ្ធជន យុទ្ធនារី ដែលបានពលីជីវិតយ៉ាងអង់អាចក្លាហាន ដើម្បីបុព្វហេតុជាតិ មាតុភូមិជាទីស្នេហានៃយើង។
លោករដ្ឋមន្ត្រីការពារជាតិ បន្តថា ការសង់ចេតិយ និងស្តូបរំឭកគុណ រួមទាំងការរៀបចំធ្វើមាតុភូមិនិវត្តន៍អដ្ឋិធាតុយុទ្ធជនកងកម្លាំងប្រដាប់អាវុធ សាមគ្គីសង្គ្រោះជាតិកម្ពុជាពីសាធារណរដ្ឋសង្គមនិយមវៀតណាម នឹងធ្វើឱ្យបានរួចរាល់ មុនថ្ងៃទី ១២ ខែ ឧសភា ឆ្នាំ ២០២៣។
បើតាម លោក ទៀ បាញ់ នៅថ្ងៃទី ១២ ខែ ឧសភា ឆ្នាំ ២០២៣ ជាខួបលើកទី៤៥ឆ្នាំ នៃការបង្កើតកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា (អង្គភាព១២៥ បង្កើតឡើងថ្ងៃទី១២ ខែឧសភា ឆ្នាំ១៩៧៨) ដើម្បីរំដោះប្រជាពលរដ្ឋខ្មែរចេញពីរបបប្រល័យពូជសាសន៍ប៉ុលពត ជាព្រឹត្តិការណ៍សំខាន់មួយ បន្ទាប់ពីដំណើរផ្សងព្រេងរបស់លោកនាយករដ្ឋមន្ត្រីហ៊ុន សែន ទៅកាន់ប្រទេសវៀតណាម ដែលជាការយកអាយុជីវិតធ្វើជាដើមទុន ដើម្បីរំដោះជាតិ។
លោកថ្លែងថា៖«យ៉ាងណាក៏ដោយចាំបាច់ត្រូវតែធ្វើឱ្យបានចប់ ហើយស្រេចបាច់ មុនថ្ងៃទី១២ ខែធ្នូ ឆ្នាំ២០២៣។ ខែឧសភា ឆ្នាំ២០២៣ គឺជាការគោរពវិញ្ញាណក្ខន្ធដំបូងបន្ទាប់ពីអដ្ឋិធាតុ បានមកដល់។ ដូច្នេះពេលវេលានេះ ទម្រាំដល់ពេលនោះ គឺយើងត្រូវធ្វើអ្វីៗទាំងអស់ រួមទាំង ធ្វើមាតុភូមិនិវត្តន៍អដ្ឋិធាតុនោះផងដែរ ឱ្យចប់សព្វគ្រប់នៅមុនថ្ងៃទី១២ ខែឧសភា ឆ្នាំ២០២៣»។
លោកបន្ថែមថា ឆ្នាំ២០២៣ កម្ពុជានឹងធ្វើពិធីគោរពវិញ្ញាណក្ខន្ធនៅទីនេះ និងរំឭកខួបនៃការបង្កើតកងកម្លាំងប្រដាប់អាវុធសាមគ្គីសង្គ្រោះជាតិកម្ពុជា គម្រប់៤៥ឆ្នាំ។ ដូច្នេះសំណង់នេះ គឺត្រូវតែហើយមុនទាំងអស់ អដ្ឋិធាតុក៏ត្រូវតែធ្វើមាតុភូមិនិវត្តន៍មកមុនដែរ។
ប្រមុខការពារជាតិរូបនេះ បានរំឭកថា នៅក្រោយការបង្កើតកងកម្លាំងប្រដាប់អាវុធសាមគ្គីសង្គ្រោះជាតិកម្ពុជានោះ គឺមានការតស៊ូដ៏សកម្ម ហើយការតស៊ូនេះ បានធ្វើឱ្យកងកម្លាំងមួយចំនួនពលីជីវិត ដែលពេលនោះមានការប្រមូលសាកសពបានចំនួន៤៩រូប ទៅផ្ញើនៅសាធារណរដ្ឋសង្គមនិយមវៀតណាម។
លោកទៀ បាញ់ បន្តថា ដោយឡែកពេលនេះ ប្រទេសកម្ពុជាមានសុខសន្តិភាព រីកចម្រើន ដោយសារលទ្ធភាពធ្វើអ្វីៗបានគ្រប់បែបយ៉ាងទាំងអស់ ដោយស្មារតីមនុស្សធម៌ខ្ពង់ខ្ពស់បំផុត របស់លោកនាយករដ្ឋមន្ត្រីហ៊ុន សែន ដែលបានផ្តើមគំនិត និងបញ្ជាឱ្យរៀបចំមាតុភូមិនិវត្តន៍អដ្ឋិធាតុរបស់កងកម្លាំងប្រដាប់អាវុធដែលបានផ្ញើនៅប្រទេសវៀតណាមនោះ ត្រឡប់មកកាន់ប្រទេសកម្ពុជាវិញ។
លោកនាយករដ្ឋមន្ត្រី ហ៊ុន សែន ក្នុងឱកាសអញ្ជើញប្រារព្ធខួប៤៥ឆ្នាំ នៃទិវាចងចាំដំណើរឆ្ពោះទៅរកការផ្តួលរំលំរបបប្រល័យពូជសាសន៍ ប៉ុល ពត (២០ មិថុនា ១៩៧៧-២០ មិថុនា ២០២២) កាលពីថ្ងៃទី២០ ខែមិថុនា ឆ្នាំ២០២២ បានណែនាំឱ្យរៀបចំធ្វើមាតុភូមិនិវត្តន៍អដ្ឋិធាតុយុទ្ធជនកងកម្លាំងប្រដាប់អាវុធសាមគ្គីសង្គ្រោះជាតិកម្ពុជាចំនួន៤៩រូប ដែលបានបញ្ចុះនៅប្រទេសវៀតណាម និងបានឱ្យរៀបចំកន្លែងតម្កល់អដ្ឋិធាតុយុទ្ធជនស្នេហាជាតិរបស់កម្ពុជានោះនៅតំបន់ប្រវត្តិសាស្ត្រយោធាតេជោកោះថ្ម X-16ខាងលើកនេះ។
បើតាម លោកនាយករដ្ឋមន្ត្រី ហ៊ុន សែន កម្ពុជាមានសុខសន្តិភាព មានលទ្ធភាព ដែលគួរដល់ពេលនាំអដ្ឋិធាតុយុទ្ធជនរំដោះជាតិគ្មានសាច់ញាតិទាំងនោះ ត្រឡប់មកកាន់ទឹកដីកំណើតវិញផងដែរ និងតម្កល់ នៅឆ្នាំ២០២៣៕