.jpg)
កម្មករតវ៉ានៅខាងក្រៅរោងចក្រកាត់ដេរ ឃែនធើរេន ក្នុងសង្កាត់ចោមចៅ ខណ្ឌពោធិ៍សែនជ័យ កាលពីខែមេសា។ ហេង ជីវ័ន
ភ្នំពេញៈ មន្ត្រីក្រសួងការងារ និងបណ្តុះបណ្តាលវិជ្ជាជីវៈបានឱ្យដឹងថា មកដល់ពេលនេះ មានកម្មកររោងចក្រឃែនធើរេន អែភែរឹល ជាង ១៤០ នាក់ហើយ បានមកទទួលប្រាក់ឈ្នួល និងប្រាក់បំណាច់អតីតភាពការងារចំនួន ៣ ចំណុច ដែលក្រសួងបានចំណាយថវិកាបុរេប្រទានជាង ៦០ ម៉ឺនដុល្លារ សម្រាប់បើកផ្តល់ជូនកម្មករ។
ការប្រកាសបើកផ្តល់ និងចំណាយថវិកាបុរេប្រទានរបស់រដ្ឋនេះបានធ្វើឡើង បន្ទាប់ពីលោកនាយករដ្ឋមន្ត្រី ហ៊ុន សែន កាលពីថ្ងៃទី ១៧ សីហា បានបញ្ជាឱ្យក្រសួងការងារចេញកញ្ចប់ថវិការដ្ឋ ដើម្បីដោះស្រាយផ្តល់សំណងដល់កម្មករ កម្មការិនីនៅរោងចក្រ ឃែនធើរេន អែភែរឹល (ខេមបូឌា) ដែលមានទីតាំងនៅភូមិត្រពាំងថ្លឹង ៣ សង្កាត់ចោមចៅទី ១ ខណ្ឌពោធិ៍សែនជ័យ ដែលត្រូវបានថៅកែបិទទ្វាររត់ចោលអស់ជាច្រើនខែ ហើយពួកគេបានស្វែងរកកិច្ចអន្តរាគមន៍ទៅលោកនាយករដ្ឋមន្ត្រី ហ៊ុន សែន។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈប្រាប់ភ្នំពេញប៉ុស្តិ៍នៅថ្ងៃទី ២១ សីហា ថាមកដល់ពេលនេះមានកម្មករចំនួន ១៤៤ នាក់ ក្នុងចំណោមកម្មករសរុប ៤២០ នាក់បានទទួលថវិការួចរាល់ហើយ។ លោកថា ការបើកផ្តល់ប្រាក់ឈ្នួល និងប្រាក់បំណាច់អតីតភាពការងារចំនួន ៣ ចំណុចដល់កម្មករក្នុងរោងចក្រនេះ គឺចំណាយថវិកាជាង ៦០ ម៉ឺនដុល្លារ។
លោកបញ្ជាក់ថា៖ «មកដល់ពេលនេះ គណៈកម្មការសម្រាប់ដោះស្រាយបញ្ហាកូដកម្ម បានបើកផ្តល់ដល់កម្មករនៅក្នុងរោងចក្រ ឃែធើរេន បានចំនួន ១៤៤ ក្នុងចំណោម ៤២០ ដោយសារចុងសប្តាហ៍។ ការប្រើប្រាស់ថវិកាបើកផ្តល់ជូនកម្មកររោងចក្រនេះ គឺមានថវិកាបុរេប្រទានជាង ៦០ ម៉ឺនដុល្លារ»។
កាលពីថ្ងៃទី ១៨ សីហា ក្រសួងការងារ និងបណ្តុះបណ្តាលវិជ្ជាជីវៈបានប្រកាសឱ្យកម្មករមកបើកប្រាក់ឈ្នួល និងប្រាក់អត្ថប្រយោជន៍ផ្សេងៗចាប់ពីថ្ងៃទី ១៩ សីហា តទៅ ដោយប្រាក់ទាំងនោះ គឺផ្តោតលើ ៣ ចំណុច ដោយទី ១ ប្រាក់ឈ្នួលខែចុងក្រោយ ដែលមិនទាន់បានបើក ទី ២ ប្រាក់បំណាច់ជួសការសម្រាកប្រចាំឆ្នាំ ដែលនៅសល់ និងទី ៣ ប្រាក់បំណាច់អតីតភាពការងារថ្មីក្នុងឆ្នាំ និងប្រាក់រំឭកប្រាក់បំណាច់អតីតភាពការងារ ដែលមានមុនឆ្នាំ ២០១៩។
លោក ទេស រុក្ខាផល អគ្គលេខាធិការរងនៃអគ្គលេខាធិការដ្ឋានគណៈកម្មការ សម្រាប់ដោះស្រាយបញ្ហាបាតុកម្ម កូដកម្ម នៅតាមគ្រប់មុខសញ្ញា ប្រាប់ភ្នំពេញប៉ុស្តិ៍ថ្ងៃទី ២១ សីហា ថា កម្មករនៅតែមកទទួលប្រាក់ទាំងនេះជាបន្តបន្ទាប់ ហើយអាចមកទទួលប្រាក់ទាំងនេះបានចាប់ពីថ្ងៃចន្ទបន្តទៀត រៀងរាល់ម៉ោងធ្វើការ ដោយភ្ជាប់ជាមួយលិខិតសម្គាល់ខ្លួន។
លោកឱ្យដឹងថា៖ «ជាមួយនឹងការមកទទួលប្រាក់ឈ្នួល និងប្រាក់បំណាច់អតីតភាពការងារចំនួន ៣ ចំណុច កម្មករនៅតែអាចមកបើកថវិកាពីអគ្គលេខាធិការដ្ឋានគណៈកម្មការ សម្រាប់ដោះស្រាយបញ្ហាកូដកម្ម បាតុកម្ម នៅតាមគ្រប់មុខសញ្ញា ក្នុងពេលម៉ោងធ្វើការ។ កម្មករ គាត់មានអតីតភាពការងារ ខុសៗគ្នា ដូច្នេះប្រាក់ដែលពួកគាត់ទទួលបានក៏ខុសគ្នាទៅតាមហ្នឹងដែរ ដែលខ្ញុំមិនអាចបញ្ជាក់បានថា ពួកគាត់បានប៉ុន្មានក្នុងម្នាក់ទេ»។
អ្នកស្រី សាន់ សុផា តំណាងសហជីពរោងចក្រ ឃែធើរេន បានលើកឡើងថា ការផ្តល់ថវិកាពីរដ្ឋាភិបាលក្នុងពេលនេះ គឺបានជួយដល់ជីវភាពកម្មករ ដែលកំពុងជួបប្រទះការខ្វះខាត នៅពេលរោងចក្របានបិទទ្វារ។
ប៉ុន្តែទោះយ៉ាងណា អ្នកស្រីថា ប្រាក់ទាំងនេះមិនទាន់ទូទាត់ឱ្យបានត្រឹមត្រូវនៅឡើយទេ ព្រោះកម្មករត្រូវបានថែមចំនួន ២ ចំណុចទៀត ពីលើ ៣ ចំណុច ដែលរដ្ឋបានផ្តល់ជូន។
អ្នកស្រីអះអាងថា កម្មករទាំងអស់នៅបន្តនីតិវិធីក្នុងការប្តឹងថៅកែរោងចក្រទៅតុលាការបន្តទៀត ដើម្បីឱ្យមានការផ្តល់ប្រាក់ចំនួន ២ ចំណុចមកកាន់កម្មករ។
អ្នកស្រី សុផា បញ្ជាក់ថា៖ «សម្រាប់ពួកខ្ញុំ ពិតជាល្អមែនទែន ព្រោះយើងក៏កំពុងខ្វះខាត គ្រាន់តែវាមិនសូវជាសប្បាយចិត្ត ដោយសារតែទូទាត់ ៣ ចំណុចនេះ គឺមិនទាន់គ្រប់ទេ។ ការផ្តល់ជូន ៣ ចំណុចនេះ គឺខាតប្រយោជន៍កម្មករជាច្រើន ព្រោះកម្មករយើង អ្នកខ្លះមានអតីតភាព ១០ ទៅ ២០ ឆ្នាំ ហើយរោងចក្រនេះ មិនមែនមានតែ ១ ទេ គឺមានផ្សេងទៀតកំពុងដំណើរការ»។
អ្នកស្រី សាន់ សុផា បញ្ជាក់ថា៖ «អ្វីដែលយើងបានមិនទាន់គ្រប់ គឺកម្មករនៅតែប្តឹងទាមទារបន្តទៀត ព្រោះការទូទាត់នេះមិនទាន់ស្របតាមច្បាប់ទេ។ លុយដែលសម្តេចផ្តល់ឱ្យនេះ យើងក៏ទទួល តែយើងត្រូវមានលក្ខខណ្ឌជាមួយក្រសួង ដើម្បីប្តឹងទៅថៅកែ ដើម្បីឱ្យសងពី ២ ចំណុច គឺប្រាក់ជូនដំណឹង និងប្រាក់សងជំងឺចិត្ត»៕
វីដេអូ៖
