.jpg)
គ្រាប់មិនទាន់ផ្ទុះដែលស្រង់ចេញពីក្នុងទន្លេនៅស្រុកពាមជរ កាលពីខែឧសភា ឆ្នាំ ២០២២ ។ រូបថត Heng Ratana page
ភ្នំពេញៈក្រុមប្រតិបត្តិករបោសសម្អាតគ្រាប់យុទ្ធភណ្ឌមិនទាន់ផ្ទុះក្រោមទឹក និងស្រង់នាវាលិចក្នុងបាតទន្លេ មកពីស្ថាប័នចម្រុះរួមទាំងវិស័យឯកជន បាននិងកំពុងសហការគ្នាពន្លឿនបូមខ្សាច់ចេញពីនាវា និងស្រង់យកគ្រាប់យុទ្ធភណ្ឌមិនទាន់ផ្ទុះចេញពីបាតទន្លេមេគង្គដែលលិចនៅក្នុងសម័យសង្គ្រាមចន្លោះឆ្នាំ ១៩៧០-១៩៧៥ ស្ថិតនៅភូមិកោះពាមរាំង ឃុំកោះចេក ស្រុកពាមជរ ខេត្តព្រៃវែង ។
លោក ហេង រតនា អគ្គនាយកស៊ីម៉ាក់ (CMAC) ប្រាប់ភ្នំពេញប៉ុស្តិ៍នៅថ្ងៃទី ២២ ខែសីហាថា ក្រោយកិច្ចប្រជុំជាមួយនឹងលោក ស ខេង ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ រួមជាមួយនឹងស្ថាប័នពាក់ព័ន្ធផ្សេងទៀត កាលពីដើមខែសីហា ឆ្នាំ ២០២២ ក្រុមការងារបាននិងកំពុងសហការ និងឯកភាពគ្នាជំរុញល្បឿននៃការបូមខ្សាច់ ដើម្បីគាំទ្រនៃការស្រង់គ្រាប់និងនាវាចេញពីទន្លេមេគង្គឱ្យបានលឿន ។
លោកបន្តថា មិនមែនត្រឹមតែមានកិច្ចសហការគ្នាលើកិច្ចប្រតិបត្តិការនេះទេ ក្រុមការងារបានឈរនៅលើមូលដ្ឋានសំខាន់ចំនួន ៣ ទី ១- ក្រុមប្រតិបត្តិករនៅទីតាំងការដ្ឋានត្រូវមានការពិភាក្សាពីបច្ចេកទេសក្នុងការបូមខ្សាច់ ដើម្បីកុំឱ្យប៉ះពាល់ និងធានាសុវត្ថិភាព ទី ២- ក្រុមប្រតិបត្តិករ មានការហ្វឹកហ្វឺនមួយប្រកបដោយស្តង់ដាជាមួយដៃគូពាក់ព័ន្ធឱ្យយល់ច្បាស់ពីនីតិវិធី និងទី៣ គឺការបង្រួមសមាហរណកម្មកម្លាំងឱ្យទៅជាធ្លុងមួយ ដើម្បីប្រតិបត្តិការនៅតាមទីតាំងការដ្ឋានជាក់ស្តែង ។
លោកថ្លែងថា៖ «ក្នុងកិច្ចប្រតិបត្តិការយកគ្រាប់នេះក្នុង ១ ថ្ងៃៗយើងយកបាន ១០ គ្រាប់ ហើយថ្ងៃខ្លះក៏តិចជាងនេះ ប៉ុន្តែយើងបានយកគ្រាប់ចេញជាបន្តបន្ទាប់ ហើយការបូមខ្សាច់នៅពេលនេះនឹងធ្វើឱ្យមានការពង្រីកប្រតិបត្តិការយកគ្រាប់បានកាន់តែលឿន និងច្រើនថែមទៀត» ។
បើតាម លោក ហេង រតនា ផែនការប្រតិបត្តិការបោសសម្អាតយុទ្ធភណ្ឌមិនទាន់ផ្ទុះ និងស្រង់នាវានៅភូមិកោះពាមរាំង ឃុំកោះចេក ស្រុកពាមជរ ខេត្តព្រៃវែងមានទំហំចំនួន ២៦៨ ហិកតា ដោយក្នុងនោះតំបន់ហានិភ័យខ្ពស់មានចំនួន ១៩៧ ហិកតានិងតំបន់ដែលហានិភ័យមធ្យមចំនួន ៧១ ហិកតា។
លោក ស ខេង រដ្ឋមន្ត្រីក្រសួងមហាផ្ទៃនៅក្នុងកិច្ចប្រជុំពិនិត្យវឌ្ឍនភាពនៃកិច្ចប្រតិបត្តិការបោសសម្អាតគ្រាប់យុទ្ធភណ្ឌមិនទាន់ផ្ទុះក្រោមទឹក និងស្រង់នាវាលិចក្នុងបាតទន្លេកាលពីថ្ងៃទី ១០ ខែសីហា ឆ្នាំ ២០២២ បានជំរុញឱ្យក្រុមការងារអន្ដរក្រសួង ត្រូវតែបោសសម្អាតគ្រាប់យុទ្ធភណ្ឌមិនទាន់ផ្ទុះទាំងនេះចេញឱ្យអស់ពីក្នុងទន្លេមេគង្គ ដើម្បីឱ្យប្រជាពលរដ្ឋ និងការដឹកជញ្ជូនតាមផ្លូវទឹកអាចធ្វើដំណើរប្រកបដោយសុវត្ថិភាព។
លោកថ្លែងថា៖ «រាជរដ្ឋាភិបាលបានដាក់គោលដៅបោសសម្អាតគ្រាប់យុទ្ធភណ្ឌក្រោមទឹកដែលបន្សល់ពីសម័យសង្គ្រាមឱ្យអស់ដើម្បីសុវត្ថិភាពប្រជាពលរដ្ឋ និងសម្រួលដល់ដំណើរនាវាចរណ៍ រួមទាំងការងារផ្សេងៗទៀតពាក់ព័ន្ធនឹងទន្លេ»៕
