ភ្នំពេញៈលោក ​សេង ហៀ​ង តំណាង​អយ្យ​ការ​អម​សាលា​ដំបូង​រាជ​ធានី​ភ្នំពេញ​សម្រេច​ចេញ​ដីកា​កោះ​ហៅ លោក​ សម រង្ស៊ី និង​អតីត​មន្ត្រី​ជាន់​ខ្ពស់​អតីតគណ​បក្ស​សង្គ្រោះ​ជាតិ ​៧ ​រូប​ផ្សេង​ទៀត​ឱ្យចូល​បន្ទប់​សវនាកា​រ​នៅ​ថ្ងៃទី​ ១៥​ ខែ កញ្ញា ​ឆ្នាំ ២០២២ វេលា​ម៉ោង ​៨ និង ៣០ ​នាទីជា​កំហិត​ ដើម្បី​ឆ្លើយ​ដោះ​សា​ពី​ការចោទ​ប្រកាន់​បទ​ល្មើស​រួម​គំនិត​ក្បត់​ក្នុង​បន្ទប់​សវ​នា​ការ​។

​យោង​តាម​ដីកា​កោះ​ហៅ​ដែល​ចេញ​ដោយ​លោក ​សេង ​ហៀង ​ចុះ​ថ្ងៃទី​ ១៩​ ខែ សីហា ឆ្នាំ​ ២០២២​ និង​ត្រូវ​បាន​ស្នង​ការ​រង​នគរ​បាល​រាជ​ធានី​ភ្នំពេញ​យក​ទៅ​បិទ​នៅ​សាលា​សង្កាត់​ចាក់​អង្រែ​លើ ​ខណ្ឌ​មាន​ជ័យនៅថ្ងៃទី​ ២២​ ខែ សីហា ​ឆ្នាំ​ ២០២២ ​បាន​បញ្ជាក់​ថា លោក ​សម ​រង្ស៊ី និង​អ្នក​ទាំង ៧ ​រូប​ផ្សេង​ទៀត បាន​ប្រព្រឹត្ត​បទ​ល្មើស​រួម​គំនិត​ក្បត់​កាល​ពី​ឆ្នាំ​ ២០២០ និង​ឆ្នាំ​បន្ត​បន្ទាប់​ទៀត ​តាម​បញ្ញត្តិ​មាត្រា​ ៤៥៣ ​នៃ​ក្រុម​ព្រហ្ម​ទណ្ឌ​។​

​នៅ​ក្នុង​សំណុំ​រឿង​ក្រម​ព្រទ​ណ្ឌ​នេះ ​រួម​មាន​ លោក សម រ​ង្ស៊ី លោក ​អេង ឆៃអ៊ាង លោក​ស្រី មួរ សុខ​ហួរ​ លោក នុត រំដួល លោក ម៉ែន សុថា​វរិ​ន្ទ្រ ​លោក ឡុង រី លោក អ៊ូ ច័ន្ទ​ឫទ្ធិ និង លោក ​ហូរ វ៉ាន់​។ ដោយ​ឡែក​សវនា​ការ​ ជំនុំ​ជម្រះ​លើ​សំណុំ​រឿង​នេះ​ មាន​សមាស​ភាព លោក​ស្រី អ៊ុក រ៉េ​គ​ន្ធា ជា​ប្រធាន​ក្រុម​ប្រឹក្សា​ជំនុំ​ជម្រះ​, លោក ធ្ធាំ ប៊ុណ្ណា ចៅ​ក្រម​ប្រឹក្សា​, លោក​ស្រី យី សុខ​វួច ​ជា​ចៅ​ក្រម​ប្រឹក្សា និង​លោក ​សេង ហៀ​ង ជា​តំណាង​អយ្យ​ការ​។​

​លោក ​ជិន ម៉ា​លីន អ្នក​នាំ​ពាក្យ​ក្រសួង​យុត្តិ​ធម៌​បាន​សរ​សេរ​នៅលើ​ទំព័រ​ហ្វេ​ស​ប៊ុក​របស់លោក​កាលពី​ឆ្នាំ ២០២១ ថា ​ក្រោម​ផែន​ការ​នៃ​ការ​វិល​ត្រឡប់​ចូល​មក​កម្ពុជា​វិញ​កាល​ពី​ថ្ងៃទី ៩ ​ខែ វិច្ឆិកា ឆ្នាំ ​២០១៩ ​អាច​ហៅថា “​ព្រឹត្តិ​ការណ៍ ​៩/១១” ទណ្ឌិត ​សម​ រង្ស៊ី និង​បក្ខ​ពួក​បាន​ធ្វើ​សកម្ម​ភាព​ជា​ច្រើន ​រួមមាន​ទី​១- ​បានធ្វើ​សកម្ម​ភាព​ញុះ​ញង់​ផង​ និង​អំពាវ​នាវ​ផង ដល់​កង​កម្លាំង​ប្រដាប់​អាវុធ និង​មន្ត្រី​រាជ​ការ​ឱ្យ​បះ​បោ​រ​ប្រឆាំង​រាជរដ្ឋា​ភិបាលទី​២-​ បាន​ធ្វើ​សកម្ម​ភាព​ញុះ​ញង់​ផង ​និង​អំពាវ​នាវ​ផងដល់​ប្រជាព​លរដ្ឋ​ឱ្យ​ងើប​បះបោរ​ប្រឆាំង​នឹង​រដ្ឋ​អំណាច និងទី​៣- ​រៃ​អង្គាស និង​ប្រមូល​ថវិកា ដើម្បី​ចិញ្ចឹម​កម្លាំង​ខុស​ច្បាប់​ដើម្បី​ធ្វើ​សកម្ម​ភាព​ខាង​លើនេះ​។​

លោក​បាន​ប​ន្តថា សកម្ម​ភាព​ធំៗ​ទាំង៣ខាង​លើ​នេះគឺ​​រៀបចំ​ឡើង​ក្នុង​គោល​ដៅ​ចំនួន​ ២ គឺទី​១ ចូល​មក​ក្នុង​ស្រុក​ដើម្បី​ចាប់​នា​យករដ្ឋ​មន្ត្រី​ក្នុង​តំណែង និង​ទី​២ ផ្តួល​រំលំ​រាជ​រដ្ឋាភិ​បាល​ស្រប​ច្បាប់​ដែល​កើត​ចេញពី​ការបោះឆ្នោ​ត​។

ដូច្នេះ​ធាតុ​ពិត​នៃ​ផែន​ការ​នេះ​គឺជា “​ការ​ប៉ុន​ប៉ង​ធ្វើ​រដ្ឋ​ប្រហារ​” តាម​មធ្យោ​បាយ​ហិង្សា​យ៉ាង​ពិត​ប្រាកដ​។ ដូច្នេះ​ពាក្យ​ថា “​ផែនការ​វិលត្រឡប់​” គឺជា​លេស​និង​ជា​កល​ល្បិច​នយោ​បាយ​ដើម្បី​បោក​បញ្ឆោត និង​អូស​ទាញ​ប្រជា​ជន​ស្លូត​ត្រង់​ឱ្យ​ចូលរួម​ក្នុង​ផែន​ការ​ខា​ងលើ​នេះ​តែ​ប៉ុណ្ណោះ​។​

លោក​ថ្លែង​ថា​៖ «​អំពើ​និង​សកម្ម​ភាព​ខាង​លើ​ទាំង​នេះ​ មាន​ភ័ស្តុ​តាង​ច្បាស់​លាស់ ​និង​រឹងមាំ ហើយ​ភ័ស្តុតាង​​ទាំងនេះ​មួយ​ចំនួន​ អាច​រក​បាន​ដោយ​ងាយ​ស្រួល ​ព្រោះ​ទណ្ឌិត សម រង្ស៊ី និង​បក្ខ​ពួក បាន​ប្រើ​ប្រាស់​ហ្វេ​ស​ប៊ុ​កនិង​បណ្តាញ​សង្គម​ដទៃ​ទៀត​ធ្វើជា​មធ្យោ​បាយ​ដើម្បី​បង្ហោះ​សារ​ញុះញង់ និង​បម្រើ​ឱ្យ​ផែន​ការ​សកម្ម​ភាព​ទុច្ចរិត​របស់​ខ្លួន​ខាង​លើ​»​។​

យោង​តាម​ក្រម​ព្រហ្មទ​ណ្ឌ​កម្ពុជា ផែន​ការ​ប៉ុន​ប៉ង​ធ្វើ​រដ្ឋ​ប្រហារ​ផ្តួល​រំលំ​រាជរដ្ឋាភិ​បាល​ស្របច្បាប់​​នេះត្រូវ​ផ្តន្ទាទោស​ក្រោម “​បទ​ល្មើស​ឧប​ឃាត​” តាម​មាត្រា ៤៥១ ចំណែក​អ្នក​ដែល​ចូល​រួម​ក្នុង​គម្រោង​ផែន​ការ​នេះត្រូវ​ផ្តន្ទា​ទោស​ពី “​បទល្មើ​ស​រួម​គំនិត​ក្បត់​” តាម​មាត្រា​ ៤៥៣​៕