ភ្នំពេញៈ តម្រូវការឈាមក្នុង ១ ឆ្នាំៗនៅទូទាំងប្រទេសមានប្រមាណជាង ១០ ម៉ឺនប្លោក ហើយចំនួននេះមានការកើនឡើងជិត ២០ ភាគរយ បើធៀបនឹងឆ្នាំ ២០២១ ទៅនឹងឆ្នាំមុនៗ។ នេះបើតាមមន្ត្រីជាន់ខ្ពស់សុខាភិបាល។
ក្នុងយុទ្ធនាការបរិច្ចាគឈាមនៅសាលាភូមិន្ទរដ្ឋបាលកាលពីថ្ងៃទី ២២ សីហា ក្រោមប្រធានបទ «បរិច្ចាគឈាមដើម្បីសង្គ្រោះជីវិត» ដែលមានអ្នកចូលបរិច្ចាគឈាមភាគច្រើនជាមន្ត្រីរាជការជាង ៣៥០ នាក់ លោកស្រី ប្រាក់ សោភ័ណនារី ថ្លែងថា ស្ថានភាពតម្រូវការឈាមក្នុងឆ្នាំ ២០២១ កម្ពុជា ត្រូវការឈាម ១ ប្លោក ដើម្បីជួយសង្គ្រោះជីវិតអ្នកជំងឺរៀងរាល់ ៦ នាទីម្តង។ ឯតម្រូវការឈាមប្រចាំថ្ងៃសរុបមានជាង ២៥០ ប្លោកជាមធ្យមនៅរាជធានី-ភ្នំពេញ និងតម្រូវការទូទាំងប្រទេសមានប្រមាណជាង ១០ ម៉ឺនប្លោក។
លោកស្រីបញ្ជាក់ថា៖ «តម្រូវការ ទូទាំងប្រទេសមានប្រមាណជាង ១០ ម៉ឺនប្លោក ដែលកើនលើសពីឆ្នាំមុនៗជិត ២០ ភាគរយ ហើយមជ្ឈមណ្ឌលជាតិផ្តល់ឈាមនៃក្រសួងសុខាភិបាលបានគ្របដណ្តប់ជាង ៧០ ភាគរយនៃការផ្គត់ផ្គង់ឈាមទូទាំងប្រទេស»។
លោកស្រីបន្តថា៖ «ចំណែកការទទួលឈាមតាមរយៈសប្បុរសជនដោយមិនគិតកម្រៃ និងដោយស្ម័គ្រចិត្តឆ្លើយតបបានប្រហែលតែ ១០ ភាគរយនៃតម្រូវការក្នុងប្រទេសយើងតែប៉ុណ្ណោះ ក្នុងខណៈដែលប្រទេសជិតខាងមានការបរិច្ចាគឈាមដោយស្ម័គ្រចិត្តអាចផ្គត់ផ្គង់រហូតដល់លើសពី ៩០ ភាគរយនៃតម្រូវការ»។
ក្នុងនាមក្រសួងសុខាភិបាល លោកស្រី ប្រាក់ សោភ័ណនារី លើកទឹកចិត្ត និងកោតសរសើរចំពោះសប្បុរសជនទាំងអស់ ដែលបានធ្វើអំណោយទាន សម្រាប់ជីវិត និងបានធ្វើសកម្មភាពគ្រប់យ៉ាងក្នុងការបរិច្ចាគឈាម។ ជាមួយគ្នានេះ លោកស្រី នៅតែអំពាវនាវឱ្យមានការគាំទ្របន្តទៀត តាមគ្រប់រូបភាពក្នុងយុទ្ធនាការផ្សេងៗនាពេលខាងមុខ ដើម្បីលើកកម្ពស់ការបរិច្ចាគឈាមដោយស្ម័គ្រចិត្ដ និងមិនគិតកម្រៃ សម្រាប់រួមចំណែកជួយង្គ្រោះជីវិតជនរងគ្រោះដោយក្ដីសប្បុរស។
លោកស្រីថ្លែងថា៖ «យុទ្ធនាការបរិច្ចាគឈាម ដើម្បីសង្គ្រោះជីវិតថ្ងៃនេះ គឺជាប្រធានបទដ៏មានអត្ថន័យ សម្រាប់យើងទាំងអស់គ្នា និងមានគោលបំណងបង្កើតទម្លាប់ និងវប្បធម៌នៃការបរិច្ចាគឈាមដោយស្ម័គ្រចិត្ត»។
លោកស្រី សោភ័ណនារី បន្តថា៖ «ជំរុញលើកកម្ពស់ឱ្យយុវជន ប្រជាជនទូទៅចូលរួមធ្វើសកម្មភាពជាមួយសេវាកម្មជាតិផ្តល់ឈាមនៅទូទាំងប្រទេស ដើម្បីធានាឱ្យមានការផ្គត់ផ្គង់ឈាមគ្រប់គ្រាន់ សម្រាប់អ្នកជំងឺជាមាតា ដែលកំពុងត្រូវការឈាមនៅគ្រប់មន្ទីរពេទ្យទាំងអស់ ដោយគ្មានការរើសអើង មិនប្រកាន់ជាតិសាសន៍ ឬសាសនា»។
បើតាមក្រសួងសុខាភិបាល ការបរិច្ចាគឈាមទៀងទាត់មិនត្រឹមតែមិនធ្វើឱ្យខូចសុខភាពនោះទេ ប៉ុន្តែវាបែរជាអាចជួយផ្ដល់អត្ថប្រយោជន៍មួយចំនួនដល់សប្បុរសជនទៅវិញ ដូចជា កាត់បន្ថយជំងឺមហារីកនានា កាត់បន្ថយភាពតានតឹងក្នុងចិត្ត និងកូលេស្តេរ៉ូល កាត់បន្ថយការដាច់សរសៃឈាមខួរក្បាល កាត់បន្ថយកំហាប់ឈាម និងលើសជាតិដែកដែលធ្វើឱ្យប៉ះពាល់ដល់ថ្លើម-លំពែង ជួយឱ្យប្រសើរឡើងនូវសុខភាពបេះដូង និងកាត់បន្ថយការឡើងទម្ងន់។
សប្បុរសជនទាំងឡាយ បន្ទាប់ពីបានបរិច្ចាគឈាមរបស់ខ្លួន អ្នកនឹងមានអារម្មណ៍ មោទនភាព និងទទួលបានការកោតសរសើរ និងការទទួលស្គាល់ពីសហគមន៍នៅជុំវិញខ្លួន ជាអ្នកបានរួមចំណែកជាមួយសកម្មភាពមនុស្សធម៌របស់សង្គមជាតិក្នុងការជួយសង្គ្រោះជីវិតអ្នកជំងឺឱ្យរួចផុតពីសេចក្តីស្លាប់។ នេះជាការបញ្ជាក់របស់ក្រសួងសុខាភិបាល។
លោក ព្រុំ សុខា រដ្ឋមន្ត្រីក្រសួងមុខងារសាធារណៈដែលបានដឹកនាំយុទ្ធនាការបរិច្ចាគឈាមនៅសាលាភូមិន្ទរដ្ឋបាលថ្លែងថា កង្វះឈាមក្នុងការជួយសង្គ្រោះអាយុជីវិតអ្នកជំងឺ គឺជាបញ្ហាប្រឈមដែលត្រូវបានយកចិត្តទុកដាក់ជាទីបំផុត។ រាជរដ្ឋាភិបាល តាមរយៈក្រសួងសុខាភិបាល បានខិតខំរៀបចំក្របខ័ណ្ឌគោលនយោបាយផ្តល់ឈាម និងច្បាប់គ្រប់គ្រងចំពោះអំណោយឈាម ដើម្បីលើកទឹកចិត្ត និងជំរុញប្រជាពលរដ្ឋគ្រប់រូប ដែលមានអំណោយឈាមស្ម័គ្រចិត្តបរិច្ចាគដោយឥតគិតថ្លៃឱ្យបាន ១០០ ភាគរយ នៅមុនឆ្នាំ ២០២០ ដែលជាអនុសាសន៍រួមរបស់អង្គការសុខភាពពិភពលោក។
ប៉ុន្តែលោកថា ចាប់ពីមានការផ្ទុះឡើងជំងឺកូវីដ ១៩ ការបរិច្ចាគឈាមហាក់បានធ្លាក់ចុះ ព្រោះមិនសូវមានសប្បុរសជន ដោយសារខ្លាចឆ្លងជំងឺកូវីដ ១៩ ដែលធ្វើឱ្យរាជរដ្ឋាភិបាលមិនអាចសម្រេចគោលដៅដែលបានកំណត់។
លោកបញ្ជាក់ថា៖ «យើងអាចសង្កេតឃើញថា ប្រជាពលរដ្ឋជាច្រើននៅមិនទាន់យល់ដឹងអំពីសារប្រយោជន៍នៃការផ្តល់ឈាមនៅឡើយទេ។ ក្នុងបរិការណ៍បែបនេះ ក្រសួងសុខាភិបាលតាមរយៈមជ្ឈមណ្ឌលជាតិផ្ដល់ឈាមបានខិតខំរៀបចំយុទ្ធនាការជាបន្តបន្ទាប់ ដូចជាកម្មវិធីបរិច្ចាគឈាមនាថ្ងៃនេះ នៅសាលាភូមិន្ទរដ្ឋបាល ជាឧទាហរណ៍គំរូស្រាប់ ដែលអាចជួយផ្សព្វផ្សាយ និងធ្វើឱ្យប្រជាពលរដ្ឋទូទៅមានទំនុកចិត្តកាន់តែខ្លាំងឡើងលើសេវាកម្មផ្តល់ឈាម»។
លោក ព្រុំ សុខា ចាត់ទុកការបរិច្ចាគឈាមអាចជួយបង្កើតនូវទម្លាប់គំរូ និងវប្បធម៌ល្អសម្រាប់ថ្នាក់ដឹកនាំ និងមន្ត្រីរាជការ ពិសេសសិស្សមន្ត្រី និងកម្មសិក្សាការីជំនាន់ក្រោយ ព្រោះវាអាចជួយធ្វើឱ្យទាំងអស់គ្នាជាខ្មែរ មានការផ្សារភ្ជាប់គ្នា ពោលគឺរវាងអ្នកមានសុខភាពល្អ ដែលយល់ព្រមផ្តល់អំណោយឈាម និងអ្នកជំងឺ ដែលកំពុងនៅលើមាត់ជ្រោះនៃសេចក្តីមរណៈ។
លោកថ្លែងថា៖ «ជាមួយការចូលរួមរបស់ថ្នាក់ដឹកនាំ និងមន្ត្រីរាជការនៃក្រសួងមុខងារសាធារណៈ ពិសេសកម្មសិក្សាការី និងសិស្ស-មន្ត្រីនៃសាលាភូមិន្ទរដ្ឋបាល ខ្ញុំសង្ឃឹមថា កម្មវិធីបរិច្ចាគឈាម ដើម្បីសង្គ្រោះជីវិតនេះនឹងជំរុញឱ្យក្រសួង ស្ថាប័ន ទាំងថ្នាក់ជាតិ និង ថ្នាក់ក្រោមជាតិ គ្រឹះស្ថានសាធារណៈ និងតួអង្គពាក់ព័ន្ធផ្សេងទៀតយល់ដឹង និងមានឆន្ទៈចូលរួមសកម្មភាពមនុស្សធម៌នេះ ដើម្បីសង្គមជាតិរបស់យើងឈានដល់ដំណាក់កាលដ៏សំខាន់ ១ ឆាប់ៗនេះ ដែលពេលនោះគ្មានអ្នកជំងឺណា ម្នាក់ស្លាប់ ដោយសារខ្វះឈាម ដែលមានសុវត្ថិភាពឡើយ»៕