លោកនាយករដ្ឋមន្ត្រី ហ៊ុន សែន ចេញអនុក្រឹត្យតែងតាំងមន្ត្រីរាជការ។ ហុង មិនា
ភ្នំពេញៈ រាជរដ្ឋាភិបាលបានសម្រេចរុះរើមុខតំណែងអភិបាលរងខេត្តចំនួន ២២ នាក់ នៅក្នុងរាជធានីភ្នំពេញ ខេត្តកណ្តាល កំពង់ស្ពឺ ខេត្តត្បូងឃ្មុំ កំពត និងខេត្តមណ្ឌលគិរី ខណៈលោក ទៀ បាញ់ រដ្ឋមន្ត្រីក្រសួងការពារជាតិក៏បានរុះរើមុខតំណែងនាយទាហាននៅក្នុងកងយោធពលខេមរភូមិន្ទចំនួន ១៧ រូបផងដែរ នៅក្នុងខែសីហា ឆ្នាំ ២០២២។ យោងតាមអនុក្រឹត្យដាច់ដោយឡែកពីគ្នាដែលបានចុះហត្ថលេខាដោយ លោកនាយករដ្ឋមន្ត្រី ហ៊ុន សែន។
អ្នកនាំពាក្យរាជរដ្ឋាភិបាលកម្ពុជាលោក ផៃ ស៊ីផាន ប្រាប់ ភ្នំពេញ ប៉ុស្តិ៍ថា ការផ្លាស់ប្តូរនិងតែងតាំងមុខតំណែង ថ្នាក់អភិបាលរងខេត្តកន្លងមកនេះ ក្នុងគោលបំណងពង្រឹងការងារកំណែទម្រង់អភិបាលកិច្ចល្អនៅថ្នាក់ក្រោមជាតិ ក្នុងការជំរុញការផ្តល់សេវាកម្មប្រកបដោយគុណភាព និងស័ក្តិសិទ្ធិភាពដល់ប្រជាពលរដ្ឋ។
លោក ផៃ ស៊ីផាន អះអាងថា ការកាត់បន្ថយសកម្មភាពពីថ្នាក់ជាតិ ទៅពង្រឹងថ្នាក់ក្រោមជាតិ ដើម្បីឆ្លើយតបសេចក្តីសម្រេចផ្ទាល់នៅថ្នាក់ក្រោមជាតិ ដើម្បីឆ្លើយតបការទទួលខុសត្រូវ ដូចជាការប្រយុទ្ធប្រឆាំងជំងឺកូវីដ ១៩ ដែលទទួលបានប្រសិទ្ធភាព។
អភិបាលខេត្តកណ្តាលលោក គង់ សោភ័ណ្ឌ ថ្លែងប្រាប់ ភ្នំពេញ ប៉ុស្តិ៍ នៅថ្ងៃទី ២៣ ខែសីហានេះថា ការផ្ទេរភារកិច្ច និងការតែងតាំងមុខតំណែង គឺធ្វើទៅតាមការងាររដ្ឋបាលប៉ុណ្ណោះ។
លោកថា៖ «របបដូរវេនពីមួយទៅមួយ វាជាការងាររដ្ឋបាលមានតែប៉ុណ្ណឹង ដូរទៅដូរមក មិនមែនមានទោស កំហុសអីទេ ធម្មតាការងារនីមួយៗមិនមែនសុទ្ធតែដូចគ្នាណា សមត្ថភាពយល់ដឹងខុសគ្នា អ៊ីចឹងទេអនុវត្តការងារម្នាក់ ៤ទៅ ៥ ឆ្នាំហើយ មិនមែនពាក់ព័ន្ធអត់សមត្ថភាពទេ»។
នាយកប្រតិបត្តិអង្គការតម្លាភាពកម្ពុជាលោក ប៉ិច ពិសី ថ្លែងថា ការតែងតាំងមន្ត្រីថ្មី ជាពិសេសការផ្តល់ឱកាសឱ្យអ្នកជំនាន់ក្រោយចូលកាន់កាប់តំណែងជាជំហានមួយល្អ និងជាដំណើរនៃការរៀបចំការកែសម្រួលកិច្ចការរដ្ឋបាលថ្នាក់ក្រោមជាតិឱ្យឆ្លើយតបទៅនឹងតម្រូវការពលរដ្ឋ៕
វីដេអូ៖
.jpg)
