.jpg)
នគរបាលចុះត្រួតពិនិត្យកំណាត់ផ្លូវដែលជនលិច។ រូបថត MPWT
ភ្នំពេញៈ អាជ្ញាធរស្រុកកំពង់លែងនៃខេត្តកំពង់ឆ្នាំង នៅថ្ងៃទី ២៣ ខែ សីហា ឆ្នាំ ២០២២ បានសម្រេចធ្វើការហាមឃាត់យានយន្តគ្រប់ប្រភេទ ធ្វើចរាចរណ៍ទៅមកលើកំណាត់ផ្លូវលេខ ៥០C ចាប់ពីចំណុចភូមិកង្កែប ឃុំច្រណូក ស្រុកកំពង់លែង រហូតដល់ព្រំប្រទល់ ខេត្តកំពង់ធំ ជាបណ្ដោះអាសន្ន ខណៈទឹកកំពុងជន់លិច។
លោក ចេង ចាន់បូណា អភិបាលស្ដីទីស្រុកកំពង់លែង បានប្រាប់ភ្នំពេញប៉ុស្តិ៍ថា បច្ចុប្បន្ន ស្ថានភាពកម្ពស់ទឹកទន្លេសាប កំពុងមានការជន់ឡើងជាបន្តបន្ទាប់ ធ្វើឱ្យកំណាត់ផ្លូវលេខ ៥០C ចាប់ពីចំណុចផ្លូវកែងភូមិកង្កែប ឃុំច្រណូក ស្រុកកំពង់លែង រហូតដល់ព្រំប្រទល់ ខេត្តកំពង់ធំ បានរងការជន់លិច និងហូរកាត់លើផ្លូវជាច្រើនកន្លែង ដែលអាចបង្កឱ្យមានការខូចខាតដោយអន្លើ។
លោកបញ្ជាក់ថា៖ «ដើម្បីថែរក្សាការពារកំណាត់ផ្លូវនេះឱ្យមានសភាពល្អប្រសើរ សម្រាប់ការប្រើប្រាស់ជាបន្តទៀត និងបង្ការលើករណីគ្រោះថ្នាក់ដោយប្រការណាមួយជាយថាហេតុ ដល់អ្នកធ្វើដំណើរ អាជ្ញាធរយើងបានសម្រេចផ្អាកការធ្វើចរាចរណ៍ចំពោះយានយន្តគ្រប់ប្រភេទជាបណ្ដោះអាសន្ន ចាប់ពីចំណុចផ្លូវកែង ភូមិកង្កែប ឃុំច្រណូក ស្រុកកំពង់លែង រហូតដល់ព្រំប្រទល់ ខេត្តកំពង់ធំ»។
បើតាមលោកចាន់ បូណា ក្រោយពេលរដូវទឹកសម្រកមកដល់ រដ្ឋបាលស្រុកកំពង់លែង នឹងជម្រាបជូនដំណឹងជាថ្មី អំពីការបើកឱ្យដំណើរការកំណាត់ផ្លូវនេះឡើងវិញ អាស្រ័យដូចបានជម្រាបជូនខាងលើនេះ សូមអ្នកធ្វើដំណើរតាមយានយន្តគ្រប់ប្រភេទ ចូលរួមអនុវត្តទាំងអស់គ្នា ដើម្បីការពារកុំឱ្យកំណាត់ផ្លូវនេះ រងការខូចខាត។
លោក ដោក ប៊ុនថុន ប្រធានមន្ទីរធនធានទឹក និងឧតុនិយម ខេត្តកំពង់ឆ្នាំង បានប្រាប់ ភ្នំពេញ ប៉ុស្តិ៍ថា ស្ថានភាពកម្ពស់ទឹកទន្លេ នៅស្ថានីយជលសាស្ត្រផ្សារក្រោមនាថ្ងៃទី២៣ ខែសីហា ឆ្នាំ២០២២ ទឹកទន្លេ មានកម្ពស់៧,២៥ម៉ែត្រ ខ្ពស់ជាងកាលពីឆ្នាំមុន ២,០២ ម៉ែត្រ ប៉ុន្តែនៅទាបជាងកម្រិតប្រកាសឱ្យមានការប្រុងប្រយ័ត្ន ៤,៥៣ ម៉ែត្រ។
លោកបានបញ្ជាក់ថា៖«ស្ថានភាពទឹកទន្លេសាបនាពេលនេះ នៅទាបជាងកម្រិតប្រកាសឱ្យប្រុងប្រយ័ត្នឆ្ងាយណាស់។ ប៉ុន្តែសម្រាប់ស្រុកកំពង់លែង ដែលជាតំបន់វាលទំនាបជាប់បឹងទន្លេសាប នឹងប្រឈមគ្រោះទឹកជំនន់នាពេលខាងមុខនេះ ប្រសិនបើស្ថានភាពអាកាសធាតុក្នុងប្រទេសកម្ពុជា នៅតែបន្តទទួលរងនូវឥទ្ធិពលព្យុះក្នុងតំបន់»។
បើតាមលោក ប៊ុនថុន កម្ពស់ទឹកទន្លេសាបក្នុងខេត្តកំពង់ឆ្នាំង ឡើងឬចុះអាស្រ័យលើបបទឹកភ្លៀង ដែលធ្លាក់ក្នុងតំបន់ផ្ទៃរងទឹកភ្លៀងនៅក្នុងខេត្តផង និងរបបទឹកទន្លេមេគង្គផង។ ប៉ុន្តែនៅក្នុងសប្ដាហ៍នេះ បរិមាណទឹកភ្លៀងក្នុងតំបន់ផ្ទៃរងទឹកភ្លៀងនៅក្នុងខេត្តនេះបានថយចុះ ខណៈរបបទឹកទន្លេមេគង្គ នៅមានកម្រិតទាបនៅឡើយ។
ជុំវិញបញ្ហាអាកាសធាតុនេះផងដែរ លោក ចាន់ យុត្ថា អ្នកនាំពាក្យក្រសួងធនធានទឹកនិងឧតុនិយម បានប្រាប់ ភ្នំពេញ ប៉ុស្តិ៍ថា ព្យុះទី៩ ឈ្មោះ ម៉ាអន (MA ON) ដែលកំពុងស្ថិតនៅខាងកើត ទីក្រុងម៉ានិល ប្រទេសហ្វីលីពីន និង ព្យុះទី១០ ឈ្មោះ តូកាហ្គិ (TOKAGE) ដែលកំពុងកើតឡើងនៅភាគឦសានប្រទេសជប៉ុន នាពេលនេះ មិនមានឥទ្ធិពលមកលើ តំបន់អាងទន្លេមេគង្គ ក្នុងប្រទេសកម្ពុជានោះទេ។ ប៉ុន្តែកម្ពុជានៅតែបន្តទទួលរងនូវឥទ្ធិពលប្រព័ន្ធសម្ពាធទាបឥណ្ឌា និងខ្យល់មូសុងនិរតីខ្សោយ ដែលកំពុងអូសកាត់តំបន់អាងទន្លេមេគង្គក្នុងប្រទេសថៃ ឡាវ វៀតណាម និងកម្ពុជា។
លោកបានបញ្ជាក់ថា៖ «ភ្លៀងនៅតែបន្តធ្លាក់ក្នុងកម្រិតពីខ្យោយទៅមធ្យមនៅក្នុងតំបន់មួយចំនួន ហេតុដូច្នេះប្រជាពលរដ្ឋ និងអាជ្ញាធរពាក់ព័ន្ធក្នុងតំបន់ ដែលធ្លាប់ជួបប្រឈមបញ្ហាគ្រោះជំនន់ទឹកភ្លៀងនាពេលកន្លងមក ត្រូវបន្តការប្រុងប្រយ័ត្ន ចំពោះគ្រោះជំនន់ទឹកភ្លៀង»។
យោងតាមរបាយការណ៍ពីមន្ត្រីនាំពាក្យ គណៈកម្មាធិការជាតិគ្រប់គ្រងគ្រោះមហន្តរាយ គិតត្រឹមថ្ងៃទី ២៣ ខែ សីហា ឆ្នាំ ២០២២ ជំនន់ទឹកភ្លៀង បានបណ្ដាលឱ្យមនុស្ស ២ នាក់ស្លាប់ និងប៉ះពាល់ផ្ទៃដីដំណាំស្រូវសរុបជាង ១៧ ០០០ ហិកតា ក្នុងនោះខូចខាតទាំងស្រុងអស់ជាង ៦ ០០០ ហិកតា ខូចខាតស្ពានឈើចំនួន២កន្លែង ផ្លូវលំជនបទចំនួន ៦ ខ្សែ និងខូចខាតទំនប់អាងស្តុកទឹកចំនួន ១ កន្លែង៕
