ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប) បញ្ជាឱ្យក្រុមហ៊ុន DKSH បញ្ឈប់ការចរាចរណ៍ផលិតផលម្សៅលាបទារក និងកុមារដែលធ្វើពីម្សៅតាល់ (Talc) ដើម្បីរង់ចាំលទ្ធផលវិភាគផ្ទៀងផ្ទាត់ពីមន្ទីរពិសោធន៍ភាគីទី ៣ បន្ទាប់ពីសង្ស័យមានសារធាតុ អាបេស្តុស។
ការប្រកាសឱ្យផ្អាកការចរាចរនេះបានធ្វើឡើង បន្ទាប់ពីអគ្គនាយកដ្ឋាន កបប កាលពីថ្ងៃទី ២២ ខែសីហា បានប្រជុំពិភាក្សាជាមួយតំណាងក្រុមហ៊ុន DKSH តាមរយៈប្រព័ន្ធអនឡាញ (MS Team) និងបានធ្វើបទបង្ហាញអំពីលទ្ធផលវិភាគម្សៅទារក និងកុមារ ដែលធ្វើពីម្សៅតាល់ (Talc) ហើយសង្ស័យមានសារធាតុអាបេស្តុស។ កបប ណែនាំឱ្យក្រុមហ៊ុន DKSH បញ្ឈប់ការចរាចរផលិតផលម្សៅលាបទារក និងកុមារនេះជាបណ្តោះអាសន្នសិន ដើម្បីរង់ចាំលទ្ធផលវិភាគផ្ទៀងផ្ទាត់ពីមន្ទីរពិសោធន៍ភាគីទី ៣ ដែលអាចនឹងចេញលទ្ធផលក្នុងពេលឆាប់ៗខាងមុខ។
អគ្គនាយកដ្ឋាន កបប បញ្ជាក់ថា៖ «លទ្ធផលរបស់នាយកដ្ឋានមន្ទីរពិសោធន៍ពិនិត្យឃើញមានសារធាតុគីមីហាមឃាត់ក្នុងម្សៅលាបទារក និងកូនក្មេងរបស់ក្រុមហ៊ុន DKSH។ អគ្គនាយកដ្ឋាន កបប កំពុងស្រាវជ្រាវបន្តតាមលក្ខណៈបច្ចេកទេស ដែលព័ត៌មានលម្អិត នឹងផ្សព្វផ្សាយជូននៅពេលក្រោយបន្ទាប់ពីទទួលបានលទ្ធផលជាក់លាក់»។
លោក ផាន អូន ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋាន កបប ប្រាប់ភ្នំពេញប៉ុស្តិ៍នៅថ្ងៃទី ២៣ សីហាថា បន្ទាប់ពីបានអនុវត្តការងារចុះយកសំណាកគំរូ និងធ្វើតេស្តវិភាគលើផលិតផលម្សៅលាបទារក និងកុមារ (Baby Talcum Powders) មួយចំនួននៅមន្ទីរពិសោធន៍របស់អគ្គនាយកដ្ឋានរួចមក លទ្ធផលបានបង្ហាញឱ្យឃើញវត្តមានសារធាតុអាសបេស្តុស (Asbestos) លើសំណាកគំរូដែលបានវិភាគ។
យោងលទ្ធផលនេះ អគ្គនាយកដ្ឋាន កបប បានដាក់ចេញនូវវិធានការបណ្ដោះអាសន្នមួយចំនួន ដូចជា តម្រូវឱ្យក្រុមហ៊ុនផ្អាកជាបណ្ដោះអាសន្នការនាំចូល និងចែកចាយរាល់ផលិតផលម្សៅលាបទារក និងកុមារដែលត្រូវបានរកឃើញវត្តមានសារធាតុអាសបេស្តុស និងប្រមូលពីទីផ្សារនូវផលិតផលម្សៅលាបទារក និងកុមារ និងរាយការណ៍មកអគ្គនាយកដ្ឋាន កបប អំពីបរិមាណផលិតផលដែលប្រមូលបាន។
លោកបានសង្កាត់ធ្ងន់ថា៖ «អគ្គនាយកដ្ឋានទុករយៈពេល ២ សប្តាហ៍ ដើម្បីឱ្យក្រុមហ៊ុនយកគំរូទៅវិភាគតបនៅមន្ទីរពិសោធន៍ភាគីទី ៣ ដែលមានសមត្ថភាព និងការទទួលស្គាល់ជាលក្ខណៈអន្តរជាតិ។ សារធាតុអាសបេស្តុសមិនត្រូវបានអនុញ្ញាតឱ្យមានវត្តមាននៅក្នុងផលិតផល គ្រឿងសម្អាងទេ។ វត្តមាននៃសារធាតុនេះអាចនឹងបង្កគ្រោះថ្នាក់ខ្លាំងដល់សុខភាពមនុស្ស ជាពិសេសអាចបណ្ដាលឱ្យកើតជំងឺមហារីក»។
ភ្នំពេញប៉ុស្តិ៍មិនអាចសុំការអត្ថាធិប្បាយពីក្រុមហ៊ុន DKSH ប្រចាំកម្ពុជាបានទេ កាលពីថ្ងៃទី ២៣ សីហា ខណៈសារតាមរយៈទំព័រហ្វេសប៊ុកពុំមានអ្នកឆ្លើយតប។ សារធាតុអាសបេស្តុស គឺជាពពួកសារធាតុគីមីគ្រោះថ្នាក់ដល់សុខភាពម្យ៉ាង ដែលមានផ្ទុកនៅក្នុងរបស់របរប្រើប្រាស់ប្រចាំថ្ងៃ ដូចជា ស៊ីម៉ង់ត៍ ក្បឿង ហ្វ៊ីប្រូស៊ីម៉ងត៍ និងពិតានម្នាងសិលាជាដើម៕