ភ្នំពេញៈ លោកនាយករដ្ឋមន្ត្រី ហ៊ុន សែន បានណែនាំឱ្យរដ្ឋមន្ត្រីក្រសួងព័ត៌មានលោក ខៀវ កាញារីទ្ធ បិទអាជ្ញាប័ណ្ណរបស់អ្នកសារព័ត៌មានណាដែលធ្វើការផ្សាយផ្ទាល់ដោយជេរគេជេរឯងជាសាធារណៈ ដើម្បីទទួលបានអ្នកមើលអ្នកស្តាប់ច្រើន។ លោកថា រដ្ឋាភិបាលផ្តល់សិទ្ធិគ្រប់គ្រាន់ក្នុងការបញ្ចេញមតិ ប៉ុន្តែសិទ្ធិជេរមិនត្រូវយកទៅប្រើប្រាស់ក្នុងការផ្សាយផ្ទាល់បែបនេះទេ។
ការណែនាំរបស់លោកនាយករដ្ឋមន្ត្រីបែបនេះធ្វើឡើងក្នុងពេលអញ្ជើញជាអធិបតីក្នុងពិធីប្រគល់សញ្ញាបត្រជូននិស្សិតជយលាភីបញ្ចប់ថ្នាក់បរិញ្ញាបត្ររង ថ្នាក់បរិញ្ញាបត្រ ថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិតប្រមាណជាង ៣ ០០០ នាក់ នៅព្រឹកថ្ងៃទី ២៣ ខែសីហា។
ការណែនាំនេះធ្វើឡើងបន្ទាប់ពីលោកនាយករដ្ឋមន្ត្រីបានលើកឡើងពីករណីលោក សាន ប៊ុនធឿន ដែលបានធ្វើការផ្សាយផ្ទាល់ជេរគេឯង ថែមទាំងបញ្ចេញអាកប្បកិរិយាមិនសមរម្យបោកកម្ទេចចាន ស្រែកឡូឡា ហើយចេញសុំទោសថា ជាការសម្តែង Prank ដើម្បីទាក់ទាញឱ្យមានអ្នកមើលច្រើន។ លោក ហ៊ុន សែន ថ្លែងថា៖ «សាន ប៊ុនធឿន ចេញវីដេអូមួយមកថា គេធ្វើហ្នឹង គឺធ្វើដើម្បីឱ្យឡើង View គេមើលច្រើន។ អើបើថា អាធុនហ្នឹងថ្ងៃក្រោយ កាញារីទ្ធ អាក្រុមណាដែលចេញមកជេរបិទវាទៅ។ ឱ្យសិទ្ធិអ្នកឯងក្នុងការនិយាយបញ្ចេញមតិ ក៏ប៉ុន្តែសិទ្ធិជេរមិនត្រូវបានប្រើប្រាស់ក្នុងអាហ្នឹងទេ [ផ្សាយផ្ទាល់យកអ្នកមើលច្រើន] ដកវាទៅ»។
សូមជម្រាបថា ក្រោយពីលោក សាន ប៊ុនធឿន ចេញវីដេអូជេរគេឯងកក្រើកហ្វេសប៊ុករួមនឹងសកម្មភាពបោកកម្ទេចចានរួចមកនៅថ្ងៃទី ២១ សីហា លោកនាយករដ្ឋមន្ត្រីបានបញ្ជាឱ្យមេបញ្ជាការអង្គរក្សបណ្តេញលោក សាន ប៊ុនធឿន ចេញពីក្របខ័ណ្ឌកងទ័ព ដើម្បីកុំឱ្យមហាជនយល់ច្រឡំថា នៅក្បែរនាយករដ្ឋមន្ត្រីអាចជេរគេឯងបានស្រេចតែចិត្ត។
រដ្ឋមន្ត្រីក្រសួងព័ត៌មានលោក ខៀវ កាញារីទ្ធ ក៏បានសម្រេចលុបអាជ្ញាប័ណ្ណសារព័ត៌មានរបស់លោក សាន ប៊ុនធឿន ចោលនៅថ្ងៃទី ២២ ខែសីហា ដោយសំអាងថា ម្ចាស់អាជ្ញាប័ណ្ណប្រព្រឹត្តអសីលធម៌ ជេរប្រមាថជាសាធារណៈ ធ្វើឱ្យប៉ះពាល់ដល់សីលធម៌សង្គម និងកិត្តិយស សេចក្តីថ្លៃថ្នូររបស់អ្នកសារព័ត៌មានអាជីព ដែលបំពានធ្ងន់ធ្ងរលើវិជ្ជាជីវៈសារព័ត៌មាន និងកិច្ចសន្យាអាជីវកម្មដែលសាមីខ្លួនតម្កល់ទុកនៅក្រសួងព័ត៌មាន។
លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍ និងជាអ្នកនាំពាក្យក្រសួងព័ត៌មានថ្លែងនៅថ្ងៃទី ២៣ ខែសីហា ថា កន្លងមកក្រសួងព័ត៌មានធ្លាប់បានបង្កើតគណៈកម្មការតាមដាន វាយតម្លៃ និងលើកសរសើរការអនុវត្តក្រមសីលធម៌ វិជ្ជាជីវៈសារព័ត៌មាន ដោយមានទាំងដាក់ប្រអប់សំបុត្រទទួលពាក្យបណ្តឹង និងសំណូមពរពីសាធារណជនផងដែរ ដើម្បីមានវិធានការជាមួយប្រព័ន្ធផ្សព្វផ្សាយណាដែលមិនបានគោរពតាមក្រមសីលធម៌វិជ្ជាជីវៈ ប៉ុន្តែកម្រឃើញមានអ្នកផ្ញើចូល។
លោកថា បច្ចុប្បន្ន ចំពោះការផ្តល់អាជ្ញាប័ណ្ណសារព័ត៌មាន បើសិនជាមានបំណងពិតប្រាកដមានលិខិតស្នើសុំដាក់មកក្រសួង បង្ហាញពីការចង់ចូលរួមកិច្ចការងារសង្គមតាមរយៈប្រព័ន្ធផ្សព្វផ្សាយ នោះក្រសួងព័ត៌មាននឹងផ្តល់ជូនដោយមិនមានកំណត់លក្ខខណ្ឌយ៉ាងណានោះទេ សំខាន់ឱ្យតែមានលិខិតថ្កោលទោស និងចុះបញ្ជីជាសហគ្រាសនៅក្រសួងពាណិជ្ជកម្ម។
យ៉ាងណាក៏ដោយ ចំណុចលក្ខខណ្ឌមួយចំនួននឹងដាក់បញ្ចូលក្នុងការធ្វើវិសោធនកម្មច្បាប់សារព័ត៌មាន ប៉ុន្តែនៅមានការរាំងស្ទះមួយចំនួនដែលមិនទាន់អាចធ្វើទៅបាន។ លោកថ្លែងថា៖ «ច្បាប់សារព័ត៌មានឆ្នាំ ១៩៩៥ ដែលយើងរៀបចំធ្វើអនុក្រឹត្យកន្លងទៅហ្នឹង គេទាមទារសិទ្ធិសេរីភាពច្រើនមែនទែនរហូតដល់ថ្នាក់យើងដាក់លក្ខខណ្ឌអាយុ ឬលក្ខខណ្ឌប្រាក់តម្កល់ ឬត្រូវមានសញ្ញាបត្រអីយ៉ាងណាៗនោះ គឺចេញមិនរួចអនុក្រឹត្យហ្នឹង អ៊ីចឹងធ្វើឱ្យយើងស្ទះ ទើបយើងអនុវត្តទៅតាមការងារ [ដដែល] ហ្នឹងរហូតគឺបើមានអ្នកសុំគឺអនុញ្ញាតឱ្យ»។
លោក ប៉ែន បូណា ប្រធានក្លិបអ្នកកាសែតកម្ពុជាប្រាប់ភ្នំពេញប៉ុស្តិ៍នៅថ្ងៃទី ២៣ ខែសីហាថា លោកគាំទ្រអនុសាសន៍របស់លោកនាយករដ្ឋមន្ត្រី។ លោកបញ្ជាក់ថា ការគាំទ្រនេះមិនមែនចង់ឱ្យក្រសួងព័ត៌មានលុបអាជ្ញាប័ណ្ណរបស់អ្នកសារព័ត៌មានទេ ប៉ុន្តែលោកចង់ឱ្យអ្នកសារព័ត៌មានទាំងអស់ងាកមកគោរពក្រមសីលធម៌ វិជ្ជាជីវៈរបស់សារព័ត៌មានបើមិនដូច្នោះទេ ពួកគេនឹងត្រូវក្រសួងព័ត៌មានលុបអាជ្ញាប័ណ្ណមិនខាន។ មានអ្នកសារព័ត៌មានអនឡាញមួយចំនួន បានយកវិជ្ជាជីវៈទៅប្រើប្រាស់ក្នុងផ្លូវខុស ដើម្បីទាក់ទាញអ្នកមើល អ្នកស្តាប់ ច្រើន និងល្បីតាមរយៈធ្វើអ្វីៗខុសប្លែកពីគេ ទាំងអាកប្បកិរិយាមិនសមរម្យមានសម្តីអសុរោះ ជេរប្រទេចអ្នកដទៃ ដែលនោះគឺជាទង្វើខុសឆ្គងខ្លាំងបំផុតនៅក្នុងវិស័យសារព័ត៌មាន។
លោកថ្លែងថា៖ «ទី១ ប៉ះពាល់ទៅដល់សេចក្តីថ្លៃថ្នូររបស់វិជ្ជាជីវៈសារព័ត៌មាន ធ្វើឱ្យសាធារណជនគាត់វាយតម្លៃថា អូ! អ្នកសារព័ត៌មានអ៊ីចឹងហ្ន! គឺថា ឃើញគួរឱ្យខ្លាច ហើយទី២ ប៉ះពាល់ដល់សង្គម ព្រោះបានបង្ហាញគំរូមិនល្អមួយទៅដល់មនុស្សជំនាន់ក្រោយយុវជន ជាពិសេសគេឃើញថា អូ!ដើម្បីល្បីទាល់តែធ្វើអ៊ីចឹង»។ លោក ប៉ែន បូណា លើកឡើងថា ក្លិបអ្នកកាសែតកម្ពុជាតែងតែបើកវគ្គបណ្តុះបណ្តាលវិជ្ជាជីវៈសារព័ត៌មានបានយ៉ាងច្រើនក្នុងគោលបំណងឱ្យអ្នកប្រកបរបរវិជ្ជាជីវៈនេះបានយល់ពីក្រមសីលធម៌វិជ្ជាជីវៈ ដើម្បីអនុវត្តបានត្រឹមត្រូវ និងមានភាពថ្លៃថ្នូរ និងជាគំរូដល់សង្គម៕