.jpg)
ការចុះអនុស្សរណៈរវាងសាកលវិទ្យាល័យភូមិន្ទកសិកម្មនិងក្រុមហ៊ុនដាវ៉ាន់ ភីអិលស៊ី នៅថ្ងៃទី ២៤ សីហា។ រូបថត ឡុង គីមម៉ារីតា
ភ្នំពេញៈ សាកលវិទ្យាល័យភូមិន្ទកសិកម្មបានចុះអនុស្សរណៈនៃការយោគយល់គ្នាជាមួយក្រុមហ៊ុន ដាវ៉ាន់ ភីអិលស៊ី ដើម្បីលើកកម្ពស់អាហារសុវត្ថិភាព និងផលិតផលក្នុងស្រុកតាមរយៈការចែករំលែកនូវតម្លៃ ព័ត៌មាន បច្ចេកទេស និងការចូលរួមស្រាវជ្រាវក្នុងបរិបទអាហារសុវត្ថិភាពនៅកម្ពុជា។
អនុស្សរណៈនៃការយោគយល់នេះ ត្រូវបានធ្វើឡើងកាលពីថ្ងៃទី ២៤ សីហា នៅសាកលវិទ្យាល័យភូមិន្ទកសិកម្ម ដែលមានអ្នកចូលរួមប្រមាណ ១០០ នាក់ ក្រោមគម្រោង «ការប្រើប្រាស់ធនធាន ដើម្បីលើកកម្ពស់សុវត្ថិភាពចំណីអាហារ និងខ្សែច្រវាក់តម្លៃកសិកម្មនៅកម្ពុជា»។
លោក ង៉ោ ប៊ុនថាន សាកលវិទ្យាធិការនៃសាកលវិទ្យាល័យភូមិន្ទកសិកម្ម បានថ្លែងក្នុងឱកាសនោះថា អនុស្សរណៈនៃការយោគយល់នេះនឹងនាំឱ្យភាគីទាំង ២ ធ្វើការរួមគ្នាលើការងារស្រាវជ្រាវសុវត្ថិភាពចំណីអាហារ ដើម្បីចែករំលែកទិន្នន័យពាក់ព័ន្ធពីការធ្វើតេស្តមន្ទីរពិសោធន៍ ការស្ទង់មតិ និងស្រាវជ្រាវ វិភាគ និងវិនិច្ឆយលើភាពមិនមានសុវត្ថិភាពក្នុងចំណីអាហារនៅកម្ពុជា។
លោកបានបន្តថា អនុស្សរណៈនៃការយោគយល់នេះក៏នឹងចូលរួមលើកកម្ពស់ការផ្តល់ឱកាសការងារសម្រាប់និស្សិតបញ្ចប់ការសិក្សា និងអ្នកហាត់ការឆ្នើមនៅក្រុមហ៊ុន ដាវ៉ាន់ ភីអិលស៊ី ផងដែរ ដែលវានឹងចូលរួមគាំទ្រដល់ការបណ្តុះបណ្ដាលធនធានមនុស្សក្នុងវិស័យនេះ។
លោកបានបញ្ជាក់ថា៖ «យើងអបអរសាទរដែលយើងបង្កើតកិច្ចសហប្រតិបត្តិការនេះ ហើយយើងនឹងប្តេជ្ញាទាំង ២ ភាគី ដើម្បីរួមគ្នាបង្កើតឱ្យមានសកម្មភាព ដែលជាផលប្រយោជន៍ឱ្យស្ថាប័នទាំង២ ទាំងវិស័យឯកជន និងសាកលវិទ្យាល័យ ដើម្បីរួមចំណែកសម្រេចឱ្យបាននូវគោលនយោបាយរបស់រដ្ឋាភិបាលឆ្នាំ ២០៣០ ដែលជាប្រទេសមានចំណូលមធ្យមកម្រិតខ្ពស់»។
លោក ឆេង មករា នាយកប្រតិបត្តិក្រុមហ៊ុន ដាវ៉ាន់ ភីអិលស៊ី បានថ្លែងថា ប្រទេសកម្ពុជា នៅតែបន្តនាំចូលបន្លែប្រហែល ២០០ ទៅ ៤០ តោន ជារៀងរាល់ថ្ងៃ និងប្រហែល ២៥០ លានដុល្លារ ក្នុង ១ ឆ្នាំៗ ត្រូវបានចំណាយសម្រាប់ការនាំចូលបន្ល ដើម្បីបំពេញតម្រូវការម្ហូបអាហារក្នុងស្រុក។ ដូចនេះ លោកសង្ឃឹមថា ការចុះអនុស្សរណៈនៃការយោគយល់នេះនឹងចូលរួមចំណែកដើម្បីធ្វើឱ្យកសិករ និងអ្នកផលិតទទួលបានលទ្ធភាពប្រើប្រាស់បច្ចេកវិទ្យា ហិរញ្ញវត្ថុ និងបច្ចេកទេសក្នុងការផ្គត់ផ្គង់អាហារដែលមានសុវត្ថិភាព។
លោកបានបញ្ជាក់ថា៖ «ដោយមើលឃើញស្ថានភាពបែបនេះ ដាវ៉ាន់ បានដាក់ចេញនូវបេសកកម្ម «អាហារសុវត្ថិភាពនៅគ្រប់គេហដ្ឋាន ហើយប្រជាជនមានសុខភាពល្អ និងរស់បានយូរជាងមុន។ បេសកកម្មនេះឈរលើការប្តេជ្ញាដ៏មោះមុតក្នុងការដោះស្រាយក្តីបារម្ភដែលកំពុងកើនឡើងក្នុងវិស័យសុវត្ថិភាពចំណីអាហារតាំងពីការចាប់ផ្តើម ដាវ៉ាន់បានធ្វើដំណើរសន្សឹមៗឆ្ពោះទៅកាន់គោលដៅរបស់ខ្លួន»។
លោក ឆេង មករា បានលើកឡើងទៀតថា ផលិតផលក្នុងស្រុកសរុប (GDP) របស់កម្ពុជា ក្នុងពេលបច្ចុប្បន្ន បានកើនដល់ ២៥ ពាន់លានដុល្លារ ដែលក្នុងនោះវិស័យកសិកម្មរួមចំណែកប្រហែល ២២ ភាគរយ នៃចំនួន GDP សរុប ដែលលោកមើលឃើញថា មានតែការធ្វើឱ្យមានភាពប្រសើរឡើងក្នុងវិស័យកសិកម្មនិងខ្សែចង្វាក់ផ្តត់ផ្គង់ក៏ដូចជាផលិតកម្មនោះទេ ដែលជាយុទ្ធសាស្ត្រឈ្នះឈ្នះសម្រាប់ទាំងអស់គ្នា។
លោកបានបញ្ជាក់ថា៖ «វិស័យកសិកម្ម ជាវិស័យមួយដែលសំខាន់ក្នុងសេដ្ឋកិច្ចជាតិ និងសុខុមាលភាពសាធារណៈ តែវាជាវិស័យដែលផលចំណេញតិចនិងមានហានិភ័យខ្ពស់ ដែលជាហេតុធ្វើឱ្យវិស័យនេះមិនអាចទាក់ទាញទុនវិនិយោគសមស្របនៅឡើយ។ផ្នែកខ្លះយើងក៏ធ្វើបានល្អដែរ ប៉ុន្មានឆ្នាំចុងក្រោយនេះ ប្រទេសយើងបានធ្វើការកែលម្អ បង្កើនផលិតកម្ម និងសមត្ថភាពផលិត ប៉ុន្តែកសិករក្នុងស្រុករបស់យើង ជាពិសេសកសិករខ្នាតតូចនៅមិនទាន់អាចស្វែងរកទីផ្សារសម្រាប់ផលិតផលពួកគេបាននៅឡើយទេ ដោយសារការប្រកួតប្រជែងជាខ្លាំងជាមួយផលិតផលនាំចូល»៕
