.jpg)
លោកម៉ម ប៊ុនហេង ក្នុងជំនួបជាមួយលោកស្រីJyotsana Varma នាយកប្រចាំប្រទេស ADB នាថ្ងៃទី២៤ សីហា។ រូបថត FN
ភ្នំពេញៈ ធនាគារអភិវឌ្ឍន៍អាស៊ី (ADB) កោតសរសើររាជរដ្ឋាភិបាលកម្ពុជា ក៏ដូចជាក្រសួងសុខាភិបាល ដែលបានគ្រប់គ្រងការរីករាលដាលនៃជំងឺកូវីដ ១៩ ប្រកបដោយជោគជ័យ ខណៈលទ្ធផលចាក់វ៉ាក់សាំងធៀបនឹងចំនួនប្រជាជនសរុប ១៦ លាននាក់ មានរហូតដល់ជាង ៩៤ ភាគរយ។
ការលើកឡើងនេះត្រូវបានធ្វើឡើងក្នុងជំនួប រវាងរដ្ឋមន្ត្រីក្រសួងសុខាភិបាល លោក ម៉ម ប៊ុនហេង និងលោកស្រី Jyotsana Varma នាយកប្រចាំប្រទេស នៃធនាគារអភិវឌ្ឍន៍អាស៊ី ដែលភាគីទាំង ២ សម្ដែងការគួរសម និងពិភាក្សាការងារអំពីកិច្ចសហប្រតិបត្តិការលើវិស័យសុខាភិបាល នាថ្ងៃទី ២៤ ខែសីហានេះ។
ក្នុងជំនួបនោះ លោក ម៉ម ប៊ុនហេង បានសម្តែងការស្វាគមន៍ និងអបអរសាទរយ៉ាងកក់ក្តៅចំពោះវត្តមានរបស់លោកនាយកប្រចាំប្រទេស ដែលត្រូវបានចាត់តាំងឱ្យមកបំពេញបេសកកម្មនៅកម្ពុជានាពេលនេះ។ លោកក៏បានថ្លែងអំណរគុណធនាគារអភិវឌ្ឍន៍អាស៊ី ចំពោះការគាំទ្រហិរញ្ញប្បទាន ឥណទាន សម្រាប់គម្រោងសន្តិសុខ សុខភាព នៃមហាអនុតំបន់មេគង្គ ចាប់តាំងពីឆ្នាំ ២០១៦ មក និងការផ្តល់ឥណទានបន្ថែម សម្រាប់គម្រោងឆ្លើយតបនឹងការរាលដាលជំងឺកូវីដ ១៩។
លោកថ្លែងថា៖ «អរគុណចំពោះធនាគារអភិវឌ្ឍន៍អាស៊ី ដែលតែងតែគាំទ្រដល់កិច្ចសហប្រតិបត្តិការប្រយុទ្ធនឹងជំងឺឆ្លងនៅតាមព្រំដែន នៃបណ្តាប្រទេសក្នុងមហាអនុតំបន់មេគង្គ និងបន្តគាំទ្រគម្រោងនេះជាបន្តទៀត»។
នាឱកាសនោះដែរ លោកស្រី Jyotsana Varma បានសម្តែងការកោតសរសើររាជរដ្ឋាភិបាលកម្ពុជា និងក្រសួងសុខាភិបាល ដែលបានគ្រប់គ្រងការរីករាលដាលនៃជំងឺកូវីដ ១៩ ដោយជោគជ័យ។ លោកស្រីក៏បានរំលេចអំពីកិច្ចសហប្រតិបត្តិការប្រយុទ្ធនឹងជំងឺឆ្លងក្នុងមហាអនុតំបន់មេគង្គ ដូចជាការចែករំលែកព័ត៌មាន ការពង្រឹងសមត្ថភាពមន្ទីរពិសោធន៍ ការការពារត្រួតពិនិត្យការឆ្លងរោគនៅក្នុងមន្ទីរពេទ្យ ការពង្រឹងសមត្ថភាពត្រៀមរៀបចំ និងឆ្លើយតបបន្ទាន់ការរាលដាលជំងឺឆ្លងនានា។ ជាពិសេសកិច្ចសហការប្រយុទ្ធប្រឆាំងជំងឺកូវីដ ១៩ និងគម្រោងព្រមានជាមុននៅកម្ពុជា (Cambodia Early Waming System) ក្នុងករណីមានការរាតត្បាតនៃជំងឺឆ្លងនានា ដូចជា ជំងឺកូវីដ ១៩ ជំងឺគ្រុនចាញ់ របេង និងអេដស៍។
លោកស្រីបញ្ជាក់ថា៖ «អំណរគុណយ៉ាងជ្រាលជ្រៅ ចំពោះក្រសួងសុខាភិបាល ដែលតែងសហការយ៉ាងជិតស្និទ្ធជាមួយធនាគារអភិវឌ្ឍន៍អាស៊ីក្នុងការអនុវត្តគម្រោងនានា»។
ជាចុងក្រោយនោះ លោកស្រីនាយកប្រចាំប្រទេស ក៏បានស្នើសុំលោក ម៉ម ប៊ុនហេង បន្តគាំទ្រកិច្ចសហប្រតិបត្តិការរវាងធនាគារអភិវឌ្ឍន៍អាស៊ី ជាមួយក្រសួងសុខាភិបាល។
កាលពីថ្ងៃទី ១៨ ខែសីហា ក្នុងពិធីប្រគល់ និងទទួលវ៉ាក់សាំងបង្ការជំងឺកូវីដ ១៩ ជំនួយពីរដ្ឋាភិបាល និងប្រជាជនអេស្ប៉ាញ ចំនួន ៣០ ម៉ឺនដូស លោកនាយករដ្ឋមន្ត្រី ហ៊ុន សែន បានលើកឡើងថា កម្ពុជាអាចត្រូវបានចាត់ទុកជាប្រទេសឈានមុខ១ ក្នុងការគ្រប់គ្រងការឆ្លងរាលដាលនៃជំងឺកូវីដ ១៩ បានយ៉ាងល្អប្រសើរ។ ទោះបីជារលកថ្មីនៃការឆ្លងរាលដាលនៅបន្តមានក៏ដោយ ក៏កម្ពុជាអាចបើកដំណើរការរបស់ប្រទេសឡើងវិញលើគ្រប់វិស័យ តាំងពីខែ វិច្ឆិកា ឆ្នាំ២០២១ និងអាចរក្សាប្រក្រតីភាព នៃដំណើរការសង្គម-សេដ្ឋកិច្ច ព្រមទាំងបានស្តារ និងជំរុញកំណើនឡើងវិញ ប្រកបដោយភាពរឹងមាំ រហូតមកដល់ពេលបច្ចុប្បន្ន។
ក្នុងរយៈពេលជិត៤ខែចុងក្រោយនេះ កម្ពុជាមិនមានករណីស្លាប់ដោយសារជំងឺកូវីដ ១៩ ឡើយ ប៉ុន្តែទោះជាយ៉ាងណា លោកហ៊ុន សែន នៅតែបន្តជំរុញឱ្យមានការយកចិត្តទុកដាក់ និងខិតខំក្នុងការគ្រប់គ្រងជំងឺនេះ ដោយត្រូវពន្លឿនការចាក់វ៉ាក់សាំងដូសជំរុញដល់ប្រជាជនគ្រប់រូប និងកុមារដែលមានអាយុពី៣ឆ្នាំឡើង ក្នុងការផ្តល់ការការពារដ៏រឹងមាំ និងមានប្រសិទ្ធភាពបំផុត តទល់នឹងការបំប្លែងខ្លួនថ្មីៗ និងមិនឈប់ឈរនៃមេរោគកូវីដ ១៩។
យោងតាមរបាយការណ៍របស់ក្រសួងសុខាភិបាល គិតត្រឹមថ្ងៃទី ២៣ ខែសីហា លទ្ធផលចាក់វ៉ាក់សាំងធៀបនឹងចំនួនប្រជាជនសរុប ១៦ លាននាក់ មាន៩៤,៧៥%។ ក្នុងនោះអត្រាចាក់វ៉ាក់សាំងកូវីដ ១៩ លើប្រជាជន អាយុពី ១៨ ឆ្នាំឡើង មាន ១០៣,៥៤% ធៀបនឹងចំនួនប្រជាជនគោលដៅ ១០ លាននាក់។
លើកុមារ-យុវវ័យអាយុពី ១២ ឆ្នាំ ទៅក្រោម ១៨ ឆ្នាំ មាន ១០០,៩៤% ធៀបនឹងចំនួនប្រជាជនគោលដៅ ១ ៨២៧ ៣៤៨ នាក់។ លើកុមារអាយុពី ៦ ឆ្នាំ ដល់ក្រោម ១២ ឆ្នាំ មាន ១០៩,៨៩% ធៀបនឹងប្រជាជនគោលដៅ ១ ៨៩៧ ៣៨២ នាក់។ លើកុមារអាយុ ៥ ឆ្នាំ មាន ១៣៨,០៦% ធៀបនឹងប្រជាជនគោលដៅ ៣០៤ ៣១៧ នាក់ និងលើកុមារអាយុ៣ឆ្នាំ ដល់ក្រោម ៥ ឆ្នាំ មាន ៧៤,៨០% ធៀបនឹងប្រជាជនគោលដៅ ៦១០ ៧៣០ នាក់៕
