.jpg)
សកម្មភាពពលរដ្ឋផ្ដិតមេដៃជាមួយសមត្ថកិច្ចជំនាយ យល់ព្រមផ្លាស់ប្ដូរទីលំនៅ។ រូបថត ANA
សៀមរាបៈ ប្រជាពលរដ្ឋដែលបានតាំងទីលំនៅខុសច្បាប់សរុបចំនួន ៦៨៩ គ្រួសារក្នុងតំបន់អង្គរបានស្ម័គ្រចិត្តទៅរស់នៅតំបន់ភូមិធម្មជាតិរុនតាឯក អ្នកទាំងនោះនឹងត្រូវចូលរួមចាប់ឆ្នោតទទួលយកដីឡូត៍នៅថ្ងៃទី២៥ ខែសីហា ឆ្នាំ ២០២២ ចាប់ពីម៉ោង ៨ និង ៣០ នាទីព្រឹកនៅសាលាខេត្តសៀមរាប។ នេះបើតាមសេចក្តីជូនដំណឹងរបស់ក្រសួងដែនដី នគរូបនីយកម្ម និងសំណង់។
សេចក្តីប្រកាសព័ត៌មានរបស់ក្រសួងដែនដី ថ្ងៃទី២៤ ខែសីហា មានបញ្ជាក់ថា៖«ប្រជាពលរដ្ឋដែលបានស្ម័គ្រចិត្តទៅរស់នៅតំបន់ភូមិធម្មជាតិរុនតាឯកមាន២៣៤គ្រសារស្ថិតនៅភូមិទក្សិណត្បូង និង៤៥៥គ្រួសារស្ថិតនៅភូមិត្រពាំងសេះនិងត្រូវចូលរួមចាប់ឆ្នោតទទួលយកដីឡូត៍ នៅថ្ងៃទី២៥ ខែសីហា នៅសាលាខេត្តសៀមរាប» ។
សេចក្តីជូនដំណឹងបានឱ្យដឹងទៀតថា ចាប់ពីថ្ងៃទី១៨ ដល់ថ្ងៃទី២៣ ខែសីហានេះក្រុមការងារបច្ចេកទេសបាន ធ្វើការវាស់វែងក្បាលដីក្នុងតំបន់អង្គរបានចំនួន២០ ០៣១ក្បាលដីក្នុងនោះក្បាលដីមានសំណង់ចំនួន១២ ៣១៥ក្បាលដី ក្បាលដីគ្មានសំណង់ចំនួន៦ ៧៣៧ក្បាលដីក្នុងទំហំសរុប៤០ ១១៨ហិកតានៃទីតាំងទាំង៣ដែលស្ថិតក្រោមការគ្រប់គ្រងរបស់អាជ្ញាធរជាតិអប្សរា។
ប្រភពដដែលបន្តថា ក្រុមការងារក៏បានបំពេញសម្រង់ព័ត៌មានរបស់អ្នកសាងសង់ និងកាន់កាប់ដីបានចំនួន១៧ ៣២២គ្រសារ។ ប្រជាពលរដ្ឋស្ម័គ្រចិត្តរុះរើតូបលក់ដូរសរុបចំនួន៤៤តូបក្នុងនោះ៣៤តូបលក់វត្ថុអនុស្សាវរីយ៍ស្ថិតនៅលើខឿនជុំវិញស្រះស្រង់ ភូមិស្រះស្រង់ខាងត្បូង សង្កាត់នគរធំ និង១០តូបស្មើ៧៩ក្យូសស្ថិតនៅភូមិទក្សិណត្បូង និងភូមិវាលសង្កាត់គោកចក។
សេចក្តីប្រកាសនោះបានឱ្យដឹងទៀតថា ការចុះអនុវត្តការងារដែនដីនៅតំបន់អង្គរនេះ គឺអនុវត្តតាមសេចក្តីសម្រេចរបស់រាជរដ្ឋាភិបាលចុះថ្ងៃទី១៨ ខែមេសា ឆ្នាំ២០២២ ស្តីពីការបង្កើតក្រុមការងារតម្រង់ទិសដើម្បីដោះស្រាយបញ្ហាសំណង់ខុសច្បាប់ និងដីធ្លីក្នុងតំបន់រមណីយដ្ឋានអង្គរ និងតំបន់ដទៃទៀតស្ថិតក្រោមការគ្រប់គ្រងរបស់អាជ្ញាធរជាតិអប្សរា។
តាមសេចក្តីសម្រេចនេះ ក្រសួងរៀបចំដែនដីបានចាត់បញ្ជូនក្រុមការងារបច្ចេកទេសចំនួន៦៨ក្រុមមានមន្ត្រីជំនាញសរុបចំនួន៧៨១រូបចុះសហការជាមួយមន្ត្រីរបស់ក្រសួងវប្បធម៌និងវិចិត្រសិល្បៈចំនួន៣៥២រូបដោយមានការសហការជាមួយមន្ត្រីមូលដ្ឋានថ្នាក់ភូមិរដ្ឋបាលឃុំ សង្កាត់ ក្រុង ស្រុក ចំណុះរដ្ឋបាលខេត្តសៀមរាបដើម្បីចុះវាស់វែងកំណត់និយាមកាក្បាលដីនិងអត្តសញ្ញាណអ្នកកាន់កាប់ដីនិងសំណង់ខុសច្បាប់ក្នុងតំបន់រមណីយដ្ឋានអង្គរ និងតំបន់ដទៃទៀតស្ថិតក្រោមការគ្រប់គ្រងរបស់អាជ្ញាធរជាតិអប្សរា។
ដើម្បីឱ្យការងារសម្រេចបានលឿនរហ័ស លោកជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងារតម្រង់ទិស នៅថ្ងៃទី២៣ ខែសីហានេះ បានចុះផ្ទាល់ដើម្បីធ្វើការពិនិត្យទីតាំងអ្នកកាន់កាប់សំណង់ខុសច្បាប់ និងដីធ្លីក្នុងតំបន់រមណីយដ្ឋានអង្គរ (បរិវេណស្រះស្រង់មុខប្រាសាទបន្ទាយក្តី) ស្ថិតក្រោមការគ្រប់គ្រងរបស់អាជ្ញាធរជាតិអប្សរាក្នុងក្រុងសៀមរាបខេត្តសៀមរាប។
លោក ឡុង កុសល អគ្គនាយករង និងជាអ្នកនាំពាក្យអាជ្ញាធរជាតិអប្សរាប្រាប់ភ្នំពេញប៉ុស្តិ៍ នៅថ្ងៃទី២៤ ខែសីហាថា ការចុះវាស់វែងកំណត់និយាមកាក្បាលដី និងកំណត់អត្តសញ្ញាណកាន់កាប់ដីធ្លីក្នុងតំបន់រមណីយដ្ឋានអង្គរចាប់ពីថ្ងៃទី១៨ រហូតដល់ថ្ងៃទី២៣ ខែសីហា មិនមានករណីកើតទុក្ខមិនសុខចិត្ត ឬធ្វើការតវ៉ាយ៉ាងណាមួយពីប្រជាពលរដ្ឋទេ ហើយមានការចូលរួមសហការល្អជាមួយក្រុមការងារ។
លោកថ្លែងថា៖«ការវាស់វែងគឺដំណើរការទៅដោយរលូន ទាំងបងប្អូនប្រជាពលរដ្ឋ និង អាជ្ញាធរមូលដ្ឋាន មានការចូលរួមសហការគ្នាល្អ ដូចសេចក្តីប្រកាសរបស់ក្រសួងរៀបចំដែនដី នគរូបនីយកម្ម និងសំណង់គាត់ បានចេញថ្ងៃនេះ»។
លោកបញ្ជាក់បន្ថែមថា ក្រុមការងារកំពុងតែបន្តសម្រុកចុះធ្វើកិច្ចការងារចុះវាស់វែងកំណត់និយាមកាក្បាលដី និងកំណត់អត្តសញ្ញាណកាន់កាប់ដីធ្លីក្នុងតំបន់រមណីយដ្ឋានអង្គរបន្តទៀត។
លោក ជឿម ជឿប ប្រជាពលរដ្ឋនៅភូមិវាល សង្កាត់គោកចក ក្រុងសៀមរាប ប្រាប់ភ្នំពេញប៉ុស្តិ៍នៅថ្ងៃទី២៤ ខែសីហាថា បានចូលមករស់នៅតំបន់អង្គរតាំងពីឆ្នាំ១៩៩០ ហើយទីតាំងដែលលោករស់នៅក្នុងតំបន់អង្គរនេះ អាជ្ញាធរបានធ្វើការវាស់វែងរួចរាល់ហើយ ប៉ុន្តែនៅមិនទាន់ទទួលដំណឹងថា អាជ្ញាធរសម្រេចឱ្យរុះរើចេញនៅពេលណានោះទេ។ លោកគូសបញ្ជាក់ថា ការនៅលើដីអង្គរទទួលស្គាល់ថា ខុសច្បាប់ ប៉ុន្តែ ពេលវេលា និងការរស់នៅជាក់ស្តែងពិតប្រាកដនេះ លោកអាចនឹងទទួលបានដី សម្រាប់ការរស់នៅពិតប្រាកដបាន។
លោកថ្លែងថា៖«ខ្ញុំមិនទាន់ដឹងថាយ៉ាងម៉េចទេឥឡូវហ្នឹង ប៉ុន្តែបើតាមខ្ញុំសួរផ្ទាល់ទៅឯកឧត្តមក្រុមការងារដែលបានចុះវាស់វែងដីនេះបានប្រាប់ថា បើនៅទីនេះច្បាស់លាស់យូរហើយមិនអីទេ។ អ៊ីចឹងចាំមើលតទៀតសិន តើគេប្រាប់ដំណឹងពេលណា តែបើភូមិត្រពាំងសេះគេចាប់ឆ្នោត[ថ្ងៃទី២៥]នេះហើយ»។
លោក សេង ឡូត អគ្គនាយកនៃអគ្គនាយកដ្ឋានរដ្ឋបាល ថ្លែងក្នុងសន្និសីទសារព័ត៌មានស្ដីពី“សមិទ្ធផលសម្រេចបានរយៈពេល៥ឆ្នាំរបស់ក្រសួងរៀបចំដែនដី នៅថ្ងៃទី២៤ ខែសីហា បានឱ្យដឹងថា ក្រុមការងារដែលចុះទៅធ្វើការវាស់វែងកំណត់អត្តសញ្ញាណអ្នកកាន់កាប់ដីនៅតំបន់អង្គរនេះមិនមានការបង់លុយដើម្បីបានធ្វើការវាស់វែងបានឆាប់មុនគេនោះទេ។ ក្រុមការងារចុះផ្ទាល់នៅទីនោះមានក្រុមដឹកនាំដែលចុះមើលជាប្រចាំ មានអាជ្ញាធរនៅជាប់សហការជាមួយ ដូចជាប្រធានភូមិ ចៅសង្កាត់ និងមានអាជ្ញាធរអប្សរានៅជាមួយផងដែរ។
លោកថ្លែងថា៖«អ្វីដែលចុះទៅយើងកត់សម្គាល់ឃើញនេះ ឃើញថាប្រជាពលរដ្ឋយល់ យល់ថាអ្វីដែលគាត់ធ្វើនេះជាការធ្វើបណ្តោះអាសន្ន ហើយគាត់ដឹងថាខុសច្បាប់ អ៊ីចឹងដល់ពេលយើងទៅរៀបចំ គាត់អត់មានជំទាស់ទេ គាត់យល់ព្រមតែម្តង យល់ព្រមរុះរើ ហើយចាកចេញ»។
លោកបានលើកឡើងថា ការទន្ទ្រានដី និងសំណង់នៅតំបន់អង្គរមិនមែនមានតែអ្នកនៅសៀមរាប ឬអ្នកក្រៅនោះទេ តាមការពិនិត្យជាក់ស្តែងគឺចម្រុះមកពីគ្រប់កន្លែង ដែលបានទៅធ្វើសំណង់ខុសច្បាប់។ យ៉ាងណាលោកបញ្ជាក់បន្ថែមថា អ្នកដែលគ្រប់លក្ខខណ្ឌ ដោយផ្អែកលើឯកសារគោលដែលអាជ្ញាធរអប្សរាបានប្រមូលច្បាស់លាស់ក្នុងឆ្នាំ២០០៤ - ២០០៥នោះនឹងទទួលបានការដោះស្រាយជាដីនៅទីតាំងថ្មីក្នុងភូមិធម្មជាតិរុនតាឯក ប៉ុន្តែទទួលបានតែដីប៉ុណ្ណោះ គ្មានសំណង់អ្វីបន្ថែមទាំងអស់ មានន័យថា រុះរើទៅទីនោះដោយផ្ទាល់ខ្លួន។ ចំណែក អ្នកដែលគ្មានលក្ខខណ្ឌគ្រប់គ្រាន់ ទៅចាប់ដីផ្តេសផ្តាសនៅទីនោះ ដាច់ខាតត្រូវតែចាកចេញ និងប្រគល់ដីជូនរដ្ឋវិញដោយស្ម័គ្រចិត្ត៕
