ស្វាយរៀងៈ មន្ទីរសុខាភិបាលខេត្តស្វាយរៀង បកស្រាយបំភ្លឺជុំវិញកុមារីម្នាក់អាយុ ៧ ឆ្នាំ បានស្លាប់ដោយសារសត្វឪម៉ាល់ទិចជាច្រើនមេ បន្ទាប់ភាគីគ្រួសារសពដែលត្រូវជាឪពុកម្តាយ បានចោទប្រកាន់ថា មូលហេតុឈានដល់ការស្លាប់នេះដោយសារភាពយឺតយ៉ាវ និងមិនបានយកចិត្តទុកដាក់របស់ក្រុមគ្រូពេទ្យ។
កុមារីឈ្មោះ ភឿន ចាន់ថា អាយុ ៧ ឆ្នាំ បានបាត់បង់ជីវិត ក្រោយពីសត្វឪម៉ាល់ទិចជាច្រើនមេ ដែលមានទីតាំងស្ថិតនៅភូមិមេលោង សង្កាត់ចេក ក្រុងស្វាយរៀង ខេត្តស្វាយរៀង។
សេចក្តីបំភ្លឺរបស់មន្ទីរសុខាភិបាលខេត្តស្វាយរៀង ជូនសាធារណជន និងក្រុមគ្រួសារនៃសព ចុះថ្ងៃទី២៣ សីហា បានឱ្យដឹងថា កុមារី ភឿន ចាន់ថា បានចូលមកសម្រាកនៅក្នុងមន្ទីរពេទ្យថ្ងៃទី២២ ខែសីហា ឆ្នាំ២០២២ ម៉ោង ១៧:១១នាទី ដោយមូលហេតុឪម៉ាល់ទិច។ សេចក្តីបំភ្លឺបន្តថា ការពិនិត្យបង្ហាញ សភាពទូទៅ ដូចជា សម្ពាធ ឈាម ៨៨/៧៥ mmHg ជីពចរ ១៥០ /នាទីសីតុណ្ហភាព៣៧.៥អង្សាសេ ចង្វាក់ដង្ហើម ៣០ដង/នាទី កំហាប់ អុកស៊ីហ៊្សែន ៩៥% អ្នកជំងឺមានអាការសន្លឹម មានស្នាមជាលក្ខណៈសត្វឪម៉ាល់ទិច ។
មន្ទីរសុខាភិបាលបញ្ជាក់ថា៖ «ក្រុមគ្រូពេទ្យបានពិនិត្យឃើញថា មានស្នាមកន្ទួលច្រើនកន្លែង ប្រហែលលើសពី៣០ទ្រនិច នៅលើដៃទាំងសងខាង ជើងទាំងសងខាង នៅលើក្បាល និងដងខ្លួន ដោយមានការឈឺចាប់យ៉ាងខ្លាំងនៅត្រង់កន្លែងទិចនីមួយៗ ហើយមានស្នាមកន្ទួល ក្រហម-ហើម»។
បើតាមសេចក្តីបំភ្លឺ កុមារីមានភាពធ្ងន់ធ្ងរ ដែលតម្រូវឱ្យក្រុមគ្រូពេទ្យធ្វើការសង្គ្រោះបឋម ដោយផ្អែកទៅលើស្ថានភាពស្លេកស្លាំង ឈឺចាប់ ឡេះឡះ ក្ដៅខ្លួន ត្រជាក់ចុងដៃជើង ឡើងស្វាយ ជីពចរដើរញាប់ និងខ្សោយ រយៈពេលបំពេញឈាមនៅចុងដៃលើសពី៣វិនាទី ជីពចរដើរញាប់ហើយខ្សោយ សម្ពាធឈាមត្បៀត។ ក្នុងនោះការសង្គ្រោះបឋម ក្រុមគ្រូពេទ្យបានផ្ដល់ការព្យាបាលតាមលក្ខណៈបច្ចេកទេស ដូចជាការដាក់អុកស៊ីហ៊្សែន ផ្តល់សេរ៉ូម ផ្តល់ឱសថ បន្តការតាមដាន និងសង្គ្រោះជាបន្តបន្ទាប់ ព្រមទាំងពន្យល់ពីស្ថានភាពធ្ងន់ធ្ងរ របស់អ្នកជំងឺដល់ក្រុមគ្រួសារ។
សេចក្តីបំភ្លឺបន្ថែមថា៖«លុះនៅវេលាម៉ោង១៧:៤០នាទី ក្រុមគ្រូពេទ្យបានធ្វើការវាយតម្លៃពីស្ថានភាពអ្នកជំងឺឡើងវិញ ដោយពិនិត្យឃើញថា កន្លែងឪម៉ាល់ទិច ហើមធំជាងមុន ត្រជាក់ចុងដៃចុងជើង ឡើងស្វាយ ជីពចរញាប់១៥៥/នាទី និងខ្សោយ កំហាប់អុកស៊ីហ៊្សែន ៩០% ចង្វាក់ដង្ហើម ៣២ដង/នាទី សម្ពាធឈាម ៨៥/៦២ mmHg ពុំមានទឹកនោម កុមារសន្លឹម»។
ក្រោយពិនិត្យឃើញបែបនេះ ក្រុមគ្រូពេទ្យបានពន្យល់ទៅដល់ក្រុមគ្រួសារថា ជាតិពុលរបស់សត្វទិច បានពុលទៅលើសរីរាង្គសំខាន់ៗ គ្រប់ទីកន្លែង ដូចជា តម្រងនោម ខួរក្បាល បេះដូង ប្រព័ន្ធដកដង្ហើម ក្រុមគ្រូពេទ្យនៅតែបន្តការព្យាបាលដោយយកចិត្តទុកដាក់។ ប៉ុន្តែក្រោយពីការសង្គ្រោះអស់រយៈពេលជាង២ម៉ោង ស្ថានភាពជំងឺនៅតែធ្ងន់ធ្ងរ។
មន្ទីរសុខាភិបាល បញ្ជាក់ថា នៅវេលាម៉ោង ២០:១០នាទី ដោយមានការទទូចស្នើសុំពីក្រុមគ្រួសារ ក្រុមគ្រូពេទ្យបានសម្រេចចិត្តធ្វើការបញ្ជូនអ្នកជំងឺតាមរថយន្តសង្គ្រោះ ទៅមន្ទីរពេទ្យគន្ធបុប្ផាភ្នំពេញ ទាំងស្ថានភាពនៅតែធ្ងន់ធ្ងរដដែល និងទៅដល់មន្ទីរពេទ្យនៅវេលាម៉ោង ២២:១៥នាទី ។
ការបកស្រាយបំភ្លឺនេះ បន្ទាប់ពីអ្នកស្រីឈ្មោះហ៊ូ ស៊ីណា អាយុ៣៦ឆ្នាំ ត្រូវជាម្តាយជនរងគ្រោះ បានលើកឡើងថា គាត់ដឹកកូនទៅដល់មន្ទីរពេទ្យស្វាយរៀង នៅវេលាម៉ោងប្រមាណ៥ល្ងាច ប៉ុន្តែគ្រូពេទ្យ ហាក់បីដូចជា មិនសូវយកចិត្តទុកដាក់ ទើបធ្វើឱ្យអាការកូនរបស់ខ្លួន កាន់តែធ្ងន់ទៅៗ។
អ្នកស្រីបញ្ជាក់ថា៖«ពេលទៅដល់ពេទ្យម៉ោង៥ល្ងាចក្រុមគ្រូពេទ្យបានធ្វើតេស្តកូវីដ១៩(លទ្ធផលអវិជ្ជមាន) ទើបពេទ្យឱ្យឪពុកបីកូនទៅអគារកុមារ រួចដាក់សេរ៉ូម១ប្លោក និងចាក់ថ្នាំ២ម្ជុល ក៏ទៅបាត់»។
អ្នកស្រីបន្តថា៖«រហូតដល់ម៉ោ៧ និង៣០នាទីយប់មានលោកគ្រូពេទ្យម្នាក់មកមើល ហើយនិយាយថា កូននេះធ្ងន់ណាស់ ហើយក៏ទៅបាត់។ ក្រោយមកមានគ្រូពេទ្យក្មេងៗ២នាក់មកមើល ហើយថា ទុកពេល១ម៉ោងទៀតក្រែងកូនក្មេងបត់ជើងតូចក្រែងធូរ»។
អ្នកស្រីបន្ថែមទៀតថា ដោយសារអាការកាន់តែធ្ងន់ទៅៗ នៅវេលាម៉ោងជាង ៨យប់ ទើបបញ្ជូនទៅមន្ទីរពេទ្យគន្ធបុប្ផាភ្នំពេញ តាមរយៈរថយន្តសាមុយឯកជន ក្នុងតម្លៃ១៨០ដុល្លារ ប៉ុន្តែនៅពេលទៅដល់ នៅវេលាម៉ោង១០និង៣០យប់ កូនស្រីរបស់ខ្លួនបានដាច់ខ្យល់ទៅហើយ។
ក្នុងហេតុការណ៍នេះ អ្នកស្រីស្នើឱ្យគ្រូពេទ្យខេត្តស្វាយរៀងទទួលខុសត្រូវចំពោះការស្លាប់របស់កូនស្រីគាត់ និងស្នើដល់លោកប្រធានមន្ទីរសុខាភិបាលខេត្ត រដ្ឋមន្ត្រីក្រសួងសុខាភិបាល អភិបាលខេត្តស្វាយរៀង ជួយចុះអធិការកិច្ច បញ្ហាគ្រូពេទ្យ មិនសូវយកចិត្តទុកដាក់ផ្តល់សេវាថែទាំព្យាបាលអ្នកជំងឺ ដែលត្រូវសង្គ្រោះបន្ទាន់ ឈានដល់ការបាត់បង់ជីវិត។
បើតាមការរៀបរាប់របស់អ្នកស្រីហ៊ូ ស៊ីណា កូនស្រីរបស់ខ្លួន រៀនថ្នាក់ទី១ នៅសាលាបឋមសិក្សា២ធ្នូ បានជិះកង់ទៅលេងនៅវាលស្រែតាមជីតាទៅឃ្វាលគោនៅមាត់បឹង។ ខណៈដែលកំពុងជិះកង់ទៅដល់បឹង ស្រាប់តែមានខ្យល់យ៉ាងខ្លាំងបោកបក់បណ្តាលឱ្យដាច់ធ្លាក់សម្បុកឪម៉ាល់ដ៏ធំ ពីលើចុងត្នោតមកដី ចំពីមុខកង់ជនរងគ្រោះ និងបានទិចកូនរបស់ខ្លួនជាច្រើនមេ។
មន្ទីរសុខាភិបាលខេត្តស្វាយរៀង ក៏បានសម្តែងនូវការសោកស្តាយ និងចូលរួមរំលែកនូវមរណៈទុក្ខ ជាមួយក្រុមគ្រួសារនៃសព។ ចំណែកសាកសពកុមារីត្រូវបានរថយន្តសង្គ្រោះដឹកដល់លំនៅឋាន ដោយពុំគិតថ្លៃសេវាដឹកជញ្ជូន រីឯថ្លៃសេវាដឹកបញ្ជូនទៅសង្គ្រោះនៅភ្នំពេញ ក៏បានប្រគល់ជូនក្រុមគ្រួសារនៃសព ដើម្បីជាការចូលរួមរំលែកទុក្ខ។
ភ្នំពេញប៉ុស្តិ៍មិនទាន់អាចសុំអត្ថាធិប្បាយបន្ថែមពីប្រធានមន្ទីរសុខាភិបាលខេត្តស្វាយរៀង លោកគុជ ស៊ីថា បាននៅឡើយទេ នាថ្ងៃទី២៤ សីហា។ ប៉ុន្តែលោកចិន ប៊ុនថុល ប្រធានកម្មវិធីសុខភាពផ្លូវចិត្ត នៃមន្ទីរសុខាភិបាលខេត្ត បានថ្លែងថា លោកមិនទាន់ទទួលបទបញ្ជាអ្វីលើករណីនោះទេ ប៉ុន្តែមន្ទីរ ក៏កំពុងតាមដានរឿងនេះដែរ៕