កំពង់ធំៈ រដ្ឋបាលខេត្តកំពង់ធំ បានជំរុញដល់អាជ្ញាធរក្រុង-ស្រុកត្រៀមកម្លាំង និងមធ្យោបាយចុះអន្តរាគមន៍ជួយច្រូតស្រូវប្រជាកសិករ ដែលកំពុងលិចលង់ដោយគ្រោះទឹកជំនន់ ដើម្បីកាត់បន្ថយកង្វះស្បៀងអាហារនៅក្នុងសហគមន៍មូលដ្ឋាន។
លោក ងួន រតនៈ អភិបាលខេត្តកំពង់ធំ បានប្រាប់ ភ្នំពេញ ប៉ុស្តិ៍ នៅថ្ងៃទី ២៤ សីហាថា នៅពេលនេះ ស្រូវរបស់ប្រជាកសិករមួយចំនួន ដែលជន់លិចដោយជំនន់ទឹកភ្លៀង និងទឹកជំនន់ស្ទឹងសែន បានចាប់ផ្ដើមទុំជាបណ្ដើរៗហើយ។ ប៉ុន្តែស្ថានភាពទឹកនៅបន្តលិចក្នុងស្រែក្នុងជម្រៅត្រឹមគល់ភ្លៅ និងជ្រៅជាងនេះដោយកន្លែង។
លោកបានបញ្ជាក់ថា៖ «យើងបានចុះពិនិត្យកាលពីថ្ងៃទី ២៣ សីហា ឃើញថា ស្រូវភាគច្រើនបានទុំហើយ ប៉ុន្តែទឹកវានៅលិចជ្រៅនៅឡើយ»។
លោករតនៈបន្តថា ក្នុងស្ថានភាពនេះ ប្រជាកសិករមិនអាចចល័តគ្រឿងចក្រចុះច្រូតស្រូវក្នុងទឹកដ៏ជ្រៅបែបនេះបានទេ គឺមានតែចុះច្រូតកាត់ដោយដៃផ្ទាល់ប៉ុណ្ណោះ។ ទន្ទឹមជាមួយគ្នានេះ លោកបានជំរុញឱ្យអាជ្ញាធរពាក់ព័ន្ធ ជាពិសេសអាជ្ញាធរក្រុង-ស្រុក ដែលកំពុងប្រឈមគ្រោះទឹកជំនន់ ត្រូវត្រៀមកម្លាំងនិងមធ្យោបាយ ចុះអន្តរាគមន៍ជួយច្រូតស្រូវជូនដល់កសិករ ដើម្បីជួយកាត់បន្ថយកង្វះស្បៀងអាហារ នៅក្នុងសហគមន៍មូលដ្ឋាន។
លោក ម៉ាក់ ប៊ុនហុង អភិបាលក្រុងស្ទឹងសែន បានប្រាប់ភ្នំពេញប៉ុស្តិ៍ថា រដ្ឋបាលក្រុងស្ទឹងសែន បានត្រៀមកម្លាំងនិងមធ្យោបាយនិងសម្ភារសម្រាប់កិច្ចអន្តរាគមន៍នេះរួចរាល់ហើយ រង់ចាំតែសំណើពីកសិករតែប៉ុណ្ណោះ។
លោកថ្លែងថា៖ «កសិករគាត់ថា ស្រូវមិនទាន់ទុំល្អ សុំឱ្យកម្លាំងយើងរង់ចាំ ៣-៤ ថ្ងៃទៀតសិន ព្រោះពេលនេះទឹកនៅក្នុងដីស្រែក៏បានស្រកចុះផងដែរ»។
បើតាមលោក ប៊ុនហុង ជំនន់ទឹកភ្លៀង និងទឹកស្ទឹងសែន កាលពីប៉ុន្មានថ្ងៃមុន បានបង្កផលប៉ះពាល់ដំណាំស្រូវ ជាង ១ ៦០០ ហិកតា ក្នុងនោះ ខូចខាតទាំងស្រុងជិត ៤៥០ ហិកតា។
យ៉ាងណាក៏ដោយ ប្រជាកសិករនៅភូមិ-សង្កាត់ អូរកន្ធរ លោក សាន សំអាត បានប្រាប់ ភ្នំពេញ ប៉ុស្តិ៍ថា ស្រូវដែលកំពុងលិចទឹកនោះ ភាគច្រើនមិនទាន់ទុំល្អនោះទេ ហេតុដូច្នេះហើយទើបពួកគាត់មិនទាន់សម្រេចចិត្តច្រូតកាត់នៅពេលនេះ ។ ម្យ៉ាងទៀត ឈ្មួញទិញស្រូវ គេមិនទិញស្រូវ ដែលមិនទាន់ទុំល្អ នោះទេ ព្រោះគ្រាប់ស្រូវងាយនឹងពុកផុយ ។
លោកសំអាតបាននិយាយថា៖«កសិករខ្លះគាត់បង្ខំចិត្តចុះច្រូតយកតែកួរស្រូវមេៗដែលទុំល្អ ដើម្បីយកមកទុកពូជផង និង បរិភោគខ្លះផង ព្រោះខ្លាចទុកយូរទៅវាជ្រុះឬ បាក់កួរធ្លាក់ចូលទៅក្នុងទឹក នាំឱ្យខាតបង់កាន់តែច្រើន»។
លោកបានបញ្ជាក់ថា៖«អ្នកខ្លះគាត់ច្រូតបាន ២ តោន ក្នុង ១ ហិកតា ខ្លះទៀតក៏ច្រូតបានប្រមាណ ១ តោន ក្នុង ១ ហិកតា អាស្រ័យលើទឹកលិចជ្រៅឬរាក់ តែយ៉ាងណាវាប្រសើរជាងកសិករខ្លះ ដែលស្រូវរបស់គាត់បានលិចខូចខាតទាំងស្រុងដែរ»។
ជាមួយគ្នានេះ លោក សំអាត បាននិយាយដោយក្ដីអំណួតថា៖«សម្រាប់ខ្ញុំ គ្មានស្រែណាមួយដែលប្រមូលផលក្រោម ៥ តោន ក្នុង ១ ហិកតានោះទេ ព្រោះខ្ញុំបានប្រមូលផលមុនពេលមានគ្រោះទឹកជំនន់កើតឡើង ១ សប្ដាហ៍»។
បើតាមលោកសំអាត មុខរបរធ្វើស្រែនាពេលបច្ចុប្បន្ន កសិករត្រូវចេះតាមដានស្ដាប់ព័ត៌មានស្ដីពីការព្យាករឧតុនិយមរបស់ក្រសួងធនធានទឹក និងត្រូវចេះរៀបចំដីស្រែឱ្យបានល្អតាមការណែនាំរបស់មន្ត្រីជំនាញផ្នែកកសិកម្ម ពោលគឺមិនត្រូវធ្វើតាមតែទម្លាប់ពីបុរាណនោះទេ។
យោងតាមសេចក្ដីរាយការណ៍ពីមន្ត្រីធនធានទឹកនិងឧតុនិយមខេត្តកំពង់ធំ នៅថ្ងៃទី ២៤ ខែ សីហា ឆ្នាំ ២០២២ ទឹកស្ទឹងសែនបានស្រកចុះមកនៅក្រោមកម្រិតប្រកាសឱ្យប្រុងប្រយ័ត្ន ២ សង់ទីម៉ែត្រ ហើយទឹកនៅតាមវាលទំនាប និងដីស្រែកសិករក៏បានស្រកចុះបន្តិចផងដែរ។
ដោយឡែកនៅឯខេត្តក្រចេះ ជំនន់ទឹកភ្លៀងកាលពីវេលាម៉ោង៣ទៀបភ្លឺ ថ្ងៃទី ២៤ ខែ សីហា ឆ្នាំ ២០២២ បានបង្កឱ្យទឹកនៅក្នុងអាងទំនប់បង្ហៀរថ្ពង ស្ថិតក្នុងភូមិថ្ពង ឃុំ-ស្រុកស្នួល ជន់ឡើងហៀរហូរលើខ្នងទំនប់ក្នុងកម្ពស់ ០,៣ ម៉ែត្រ។ នេះបើតាម លោក សាម ណាល់ អភិបាលស្រុកស្នួល។
លោកបានបញ្ជាក់ថា៖«នៅពេលនេះស្ថានភាពទឹកនៅចំណុចទីតាំងខាងលើនេះ បានស្រកមកនៅកម្រិតត្រឹមតែ ០,១៥ម៉ែត្រ ពីលើខ្នងទំនប់បង្ហៀរប៉ុណ្ណោះ ប៉ុន្តែទឹកនៅតែបន្តហូរកួចខ្លាំង ដែលអាចបង្កគ្រោះថ្នាក់ដល់អ្នកធ្វើដំណើរដែលឆ្លងកាត់លើខ្នងទំបន់នេះ»។
ជាមួយគ្នានេះ លោក បានអំពាវនាវ ឱ្យពលរដ្ឋនិងអ្នកដំណើរផ្អាកការធ្វើចរាចរណ៍ឆ្លងកាត់តាមខ្នងទំនប់នេះជាបណ្ដោះអាសន្ន ដើម្បីការពារគ្រោះថ្នាក់កើតឡើងជាយកថាហេតុ។ លោកបានបន្តថា នៅពេលនេះ ជំនន់ទឹកភ្លៀង បានជន់លិចផ្នែកខ្លះនៃឃុំខ្សឹម និង ឃុំគ្រញូងសែនជ័យ ។ ប៉ុន្តែផលប៉ះពាល់នៅមិនទាន់ធ្ងន់ធ្ងរជាដុំកំភួននៅឡើយទេ៕