.jpg)
ភាគីពាក់ព័ន្ធក្នុងកិច្ចប្រជុំនៅក្រសួងការងារពីថ្ងៃទី ២៤ សីហា។ រូប ក្រសួងការងារ
ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈ កំណត់យកថ្ងៃទី ៣១ សីហា ខាងមុខ ដើម្បីបន្តកិច្ចពិភាក្សាលើប្រាក់ឈ្នួលក្នុងវិស័យវាយនភណ្ឌកាត់ដេរ ផលិតស្បែកជើង និងផលិតផលធ្វើដំណើរ និងកាបូបសម្រាប់ឆ្នាំ ២០២៣ ខណៈសហជីពកំណត់តួលេខ ២១៥ ដុល្លារ ចំណែកនិយោជកកំណត់តួលេខ ១៩៤ ដុល្លារដូចឆ្នាំមុន ដើម្បីធ្វើការចរចា។
នៅថ្ងៃទី ២៤ ខែសីហា ក្រុមប្រឹក្សាជាតិប្រាក់ឈ្នួលអប្បបរមាបានបន្តកិច្ចប្រជុំជាលើកទី២ ដើម្បីពិភាក្សាកំណត់ប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប សម្រាប់ឆ្នាំ ២០២៣។ ក្រោយចប់កិច្ចប្រជុំ ក្រសួងការងារបានប្រកាសថា ក្រោយការប្រជុំផ្ទៃក្នុងចំនួន ២ លើក ភាគីទាំង ២ (សហជីព និងនិយោជក) បានលើកហេតុផល និងបង្ហាញនូវគោលជំហរផ្ទៃក្នុងរបស់ខ្លួនទៅវិញទៅមកប្រកបដោយវិជ្ជាជីវៈ និងភាពចាស់ទុំអំពីសំណើរបស់ខ្លួន។
ក្រសួងបានបញ្ជាក់ក្នុងសេចក្តីប្រកាសថា៖ «នៅក្នុងកិច្ចប្រជុំនេះ ភាគីរាជរដ្ឋាភិបាល ក៏បានសម្របសម្រួល និងផ្តល់នូវការពន្យល់បន្ថែមលើចំណុចនានា ដែលភាគីតំណាងកម្មករនិយោជិតនិងភាគីតំណាងនិយោជកមានចម្ងល់ផងដែរ។ អង្គប្រជុំបានឯកភាពគ្នាកំណត់កិច្ចពិភាក្សាបន្តទៀត នៅម៉ោង ២:៣០ នាទីរសៀល ថ្ងៃទី ៣១ សីហា ឆ្នាំ ២០២២»។
លោក អាត់ ធន់ ប្រធានសហភាពការងារកម្ពុជាបានប្រាប់ ភ្នំពេញ ប៉ុស្តិ៍ នៅថ្ងៃទី ២៤ សីហាថា លទ្ធផលបឋមនៃការចរចាប្រាក់ឈ្នួលអប្បបរមា នៅក្នុងកិច្ចប្រជុំលើកទី២ នេះ គឺតំណាងសហជីព បានស្នើតួលេខ ២១៥ ដុល្លារ ខណៈនិយោជកស្នើដាក់តួលេខ១៩៤ ដុល្លារ ដូចប្រាក់ឈ្នួលឆ្នាំចាស់ដដែល។ បន្ថែមពីនេះ លោក អាត់ ធន់ ដែលបានចូលរួមក្នុងកិច្ចប្រជុំត្រីភាគីដែរនោះ បានបញ្ជាក់ទៀតថា ចំពោះភាគីរាជរដ្ឋាភិបាល រហូតមកដល់ពេលនេះ គឺមិនទាន់បញ្ចេញតួលេខផ្លូវការក្នុងការកំណត់ប្រាក់ឈ្នួលថ្មីក្នុងវិស័យវាយនភណ្ឌកាត់ដេរ ផលិតស្បែកជើង និងផលិតផលធ្វើដំណើរ និងកាបូបសម្រាប់ឆ្នាំ ២០២៣ នៅឡើយទេ។
លោកបញ្ជាក់ថា៖ «កិច្ចប្រជុំនេះ ត្រូវបានលើកឡើងដោយខាងក្រសួងដើម្បីឱ្យភាគីទាំង ២ បានជជែកគ្នាក្នុងទឡ្ហីករណ៍រៀងៗខ្លួន ហើយខាងសហជីពយើងបានប្រជុំគ្នាជាច្រើនដង ដោយបានសម្រេចដាក់តួលេខ ២១៥ ដុល្លារ ចំណែកនិយោជក បានស្នើតួលេខ ១៩៤ ដដែល ដោយសារតែនិយោជកឃើញសហជីពមិនមានការចុះតួលេខនោះទេ»។
ជាមួយគ្នានេះលោក អាត់ ធន់ បានធ្វើការសន្និដ្ឋាន ដោយផ្អែកនៅក្នុងការជជែកគ្នានៅក្នុងកិច្ចប្រជុំថា ការកំណត់តួលេខរបស់ភាគីនិយោជក គឺអាចនឹងមានចំនួនខ្ពស់ជាងនេះនៅក្នុងពេលខាងមុខខណៈការជជែកគ្នា អាចនឹងមានតួលេខមួយក្នុងរង្វង់ចន្លោះ ១៩៧ ដុល្លារ ហើយមានការបូកបន្ថែមពីលោកនាយករដ្ឋមន្ត្រី ហ៊ុន សែន នឹងធ្វើឱ្យប្រាក់ឈ្នួលថ្មីសម្រាប់ឆ្នាំ ២០២៣ ខាងមុខ អាចនឹងហក់ឡើងដល់ក្នុងរង្វង់ ២០០ ដុល្លារ ក្នុង ១ ខែ។
កាលពីឆ្នាំ ២០២១ លោកនាយករដ្ឋមន្ត្រី ហ៊ុន សែន បានបន្ថែមទឹកប្រាក់ចំនួន ២ ដុល្លារអាមេរិក ពីលើទឹកប្រាក់ចំនួន ១៩២ ដុល្លារ ដែលបានស្នើឡើងដោយក្រុមប្រឹក្សាជាតិប្រាក់ឈ្នួលអប្បបរមា សម្រាប់យកមកអនុវត្តក្នុងឆ្នាំ ២០២២ ដែលប្រាក់ឈ្នួលគោលឆ្នាំ ២០២១ មានចំនួន ១៩២ ដុល្លារ ក្នុង ១ ខែ។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា (GMAC) ធ្លាប់ប្រាប់ ភ្នំពេញ ប៉ុស្តិ៍ថា ក្នុងដំណាក់កាលនេះសមាគមពិតជាទទួលស្គាល់ពីការលំបាករបស់កម្មករ ប៉ុន្តែស្ថានភាពគឺពិតជាមិនអំណោយផល សម្រាប់ភាគីទាំង ២ ដែលវាពិតជាបញ្ហា ១ ក្នុងការជួយដល់ជីវភាពរបស់កម្មករ និងការគាំទ្រដល់ការប្រកួតប្រជែងរបស់ឧស្សាហកម្ម។
លោកបញ្ជាក់ថា៖ «ទោះបីជាការនាំចេញក្នុងឆមាសទី១ ឆ្នាំនេះ ល្អក៏ដោយ យើងមានការព្រួយបារម្ភយ៉ាងខ្លាំងចំពោះស្ថានភាពនាំចេញសម្រាប់ឆមាសទី២ នៃឆ្នាំនេះ ដោយមើលទៅលើស្ថានភាពសកលលោកមិនស្ថិតស្ថេរ និងលទ្ធភាពនៃការធ្លាក់ចុះនៃសេដ្ឋកិច្ច ដែលភាគច្រើននៅប្រទេសលោកខាងលិច ដែលជាទីផ្សារនាំចេញសម្លៀកបំពាក់ដ៏សំខាន់របស់កម្ពុជា»។
ការសិក្សាថ្មីៗ របស់ JETRO បានបង្ហាញថា ក្នុងឆ្នាំ ២០២១ គឺមានតែ ៣៩ ភាគរយ នៃក្រុមហ៊ុននៅប្រទេសកម្ពុជា តែប៉ុណ្ណោះ ដែលរកបានប្រាក់ចំណេញ ខណៈជាង ៤៣ ភាគរយ បានខាតបង់ប្រាក់ និង ១៨ ភាគរយ បានបិទទ្វារក្រុមហ៊ុនរបស់ពួកគេ។ នេះបើតាមការអះអាងរបស់លោក កាំង ម៉ូនីកា។
ចំណែកការសិក្សាថ្មីមួយរបស់លោក គី សេរីវឌ្ឍន៍ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា ដែលបានស្រាវជ្រាវស្តីពីប្រាក់ឈ្នួលអប្បបរមា និងការប្រកួតប្រជែងរបស់កម្ពុជាបានបង្ហាញថា ប្រទេសវៀតណាម គឺជាដៃគូដ៏ខ្លាំងរបស់កម្ពុជា ក្នុងការប្រកួតប្រជែងនៃការនាំចេញផលិតផលកាត់ដេរ ខណៈប្រាក់-ឈ្នួលកម្លាំងពលកម្មរបស់ប្រទេសនេះទាបជាងកម្ពុជា ហើយការកើនឡើងនៃតម្លៃដឹកជញ្ជូន និងឡូជីស្ទិក អគ្គិសនីមានតម្លៃខ្ពស់ គឺជាបញ្ហាប្រឈមដែលអាចធ្វើឱ្យកម្ពុជាបាត់បង់ឧត្តមភាពនៃការប្រកួតប្រជែង៕
វីដេអូ៖
