ភ្នំពេញៈ អគ្គនាយកដ្ឋានសុខភាពសត្វ និងផលិតកម្មសត្វ បានអំពាវនាវ ឱ្យកសិករចិញ្ចឹមសត្វ ត្រៀមលក្ខណៈសង្គ្រោះសត្វ និងចាត់វិធានការទប់ស្កាត់ការឆ្លងរាលដាលជំងឺសត្វនៅក្នុងរដូវវស្សានេះ ជាពិសេស កសិករដែលរស់នៅក្នុងតំបន់ជាប់មាត់ទន្ល បឹង ស្ទឹង ព្រែក ដែលងាយប្រឈមនឹងគ្រោះទឹកជំនន់។
លោក តាន់ ផាន់ណារ៉ា អគ្គនាយកដ្ឋានសុខភាពសត្វ និងផលិតកម្មសត្វ បានថ្លែងថា នៅក្នុងរដូវវស្សានេះ តំបន់មួយចំនួន ដែលស្ថិតនៅជាប់មាត់ទន្ល បឹង ស្ទឹង ព្រែក បានជួបប្រឈមគ្រោះទឹកជំនន់ ជាហេតុដែលអាចបណ្តាលឱ្យជំងឺឆ្លងសត្វផ្ទុះឡើង ដូចនេះកសិករចិញ្ចឹមសត្វ ត្រូវត្រៀម លក្ខណៈសង្គ្រោះសត្វ និងចាត់វិធានការទប់ស្កាត់ការឆ្លងរាលដាលជំងឺសត្វផ្សេងៗ។
លោកថ្លែងថា៖ «សូមបងប្អូនប្រជាកសិករចិញ្ចឹមសត្វ ត្រៀមបង្ការ និងសង្គ្រោះសត្វ ពីគ្រោះទឹកជំនន់ និង ជំងឺឆ្លងនានា ដោយត្រូវត្រៀមទីទួលសុវត្ថិភាពដែលនៅជិតបំផុត និងមធ្យោបាយសម្រាប់សង្គ្រោះសត្វ ត្រៀមចំណី និងទឹកឱ្យបានគ្រប់គ្រាន់សម្រាប់សត្វ ព្រមទាំងធ្វើអនាម័យទ្រុងឬក្រោលសត្វឱ្យបានស្អាត និងតាមដានសុខភាព ឱ្យបានជាប់ជាប្រចាំ ចៀសវាងលែងសត្វឱ្យដើរពាសវាលពាសកាល»។
លោកបានបន្តថា ក្នុងករណីមានសត្វឈឺត្រូវបំបែកចេញពីសត្វជា និងរាយការណ៍ ជាបន្ទាន់ទៅភ្នាក់ងារសុខភាពសត្វភូមិ ឬអាជ្ញាធរមូលដ្ឋានដែលនៅជិតបំផុត ឬមន្ត្រីបសុពេទ្យ ដើម្បីចុះអន្តរាគមន៍ពិនិត្យ និងព្យាបាលបានទាន់ពេលវេលា។
ជាមួយគ្នានេះ លោកបានប្រកាស ឱ្យពលរដ្ឋអ្នកចិញ្ចឹមសត្វ ទាក់ទងផ្ទាល់មកអគ្គនាយកដ្ឋានសុខភាពសត្វ និងផលិតកម្មសត្វ ឬមន្ទីរកសិកម្ម រុក្ខាប្រមាញ់ និងនេសាទ រាជធានី-ខេត្ត តាមរយៈទូរស័ព្ទលេខ ០១២ ៤៨៣ ៥៧៤ និង លេខ ០១២ ៩៥២៥១៨ ក្នុងករណីមានជំងឺឆ្លងរាលដាលសត្វ។
កាលពីពេលប៉ុន្មានខែកន្លងទៅថ្មីៗនេះ មានសេចក្ដីរាយការណ៍ពីបណ្ដាខេត្តមួយចំនួននៅភាគពាយ័ព្យ ឦសាន និងភាគអគ្នេយ៍ នៃប្រទេសកម្ពុជា បានកើតជំងឺសាទឹក និង ជំងឺដុំពក ក្នុងនោះសត្វគោ-ក្របីចំនួន៣៥ក្បាលបានងាប់។
ទោះយ៉ាងណាក្រុមមន្ត្រីបសុសត្វនៃបណ្ដាខេត្តនីមួយៗ បានបើកយុទ្ធនាការចុះត្រួតពិនិត្យ និងចាក់ថ្នាំបង្ការជំងឺសារទឹក និងជំងឺដុំពកដល់សត្វគោ-ក្របី ជូនប្រជាកសិកររួចរាល់ទាំងស្រុងហើយកាលពី ដើមខែសីហា។
លោក សេវ លិញ អាយុ ៤៥ ឆ្នាំ ជាប្រជាកសិករ នៅឃុំជ័យឧត្តម ស្រុកលំផាត់ ខេត្តរតនគិរី បានប្រាប់ ភ្នំពេញ ប៉ុស្តិ៍ថា នៅពេលនេះ ទឹកជំនន់ទន្លេស្រែពកបានស្រកវិញហើយ ប៉ុន្តែភូមិរបស់គាត់នៅតែបន្តទុកគោ-ក្របី នៅលើទីទួលសុវត្ថិភាព ព្រោះបារម្ភខ្លាចមានទឹកជំនន់កើតឡើងជាថ្មីទៀត។
លោកថ្លែងថា៖ «គោ-ក្របីទាំងអស់របស់អ្នកភូមិ ដែលនៅលើទីទួលសុវត្ថិភាពនោះ ត្រូវបានក្រុមពេទ្យសត្វភូមិចុះចាក់វ៉ាក់សាំងការពារជំងឺឆ្លងរួចរាល់ហើយ»។
បើតាមលោកលិញ ការចងគោ-ក្របីនៅក្នុងក្រោល មិនមែនជាប្រពៃណីរបស់ជនជាតិទំពូនរបស់ពួកគាត់ឡើយ។ តាមទម្លាប់របស់ជនជាតិដើមភាគតិចទំពូន គោ-ក្របី ត្រូវបានគេដោះលែងឱ្យដើរស៊ីស្មៅ និងល្បះខ្ចីៗនៅតាមដងព្រៃ និងវាលស្រែ ក្រោយពីប្រើប្រាស់វាជាកម្លាំងអូសទាញរួច។ ប៉ុន្តែដោយសារមានគ្រោះទឹកជំនន់ ទើបពួកគាត់ក៏សម្រេចចងគោ-ក្របីទុកនៅក្នុងក្រោលលើទីទួលសុវត្ថិភាព តាមការណែនាំរបស់អាជ្ញាធរ និងមន្ត្រីជំនាញ ហើយនាំគ្នាដើរច្រូតស្មៅ និងល្បះខ្ចីៗឱ្យពួកវាស៊ី។
លោក លិញ ដែលអះអាងថា មានក្របី ៦ ក្បាលនៅក្នុងក្រោល បានប្រាប់ឱ្យដឹងទៀតថា៖ «បន្ទាប់ពីទឹកលិចមក ឥឡូវនេះក្របីរបស់ខ្ញុំវាស្គមជាងមុន ព្រោះខ្សត់ស្មៅឱ្យវាស៊ី»៕