.jpg)
លោក គង់ សោភ័ណ្ឌ អភិបាលខេត្តដឹកនាំសម្អាតតាមដងទន្លេ នៅតាមបណ្តោយសួនច្បារមាត់ទន្លេ ក្រុងតាខ្មៅ។ រូបថត RIVER OCEAN CLEANUP
ភ្នំពេញៈ សង្គមស៊ីវិល និងអ្នកស្ម័គ្រចិត្ត ដែលស្រឡាញ់បរិស្ថានប្រមាណ ៥០០ នាក់ មានគម្រោងជួបជុំគ្នានៅថ្ងៃទី ២៦ ខែសីហា ដើម្បីសម្អាតតាមដងទន្លេ នៅតាមបណ្តោយសួនច្បារមាត់ទន្លេ ក្រុងតាខ្មៅ ដោយមន្ត្រីសង្គមស៊ីវិល រំពឹងថា សកម្មភាពទាំងនេះ នឹងចូលរួមធ្វើឱ្យទន្លេកម្ពុជាគ្មានសំរាម។
កម្មវិធីនៃការជួបជុំសម្អាតតាមដងទន្លេ ជាមួយអ្នកស្ម័គ្រចិត្តប្រមាណ ៥០០ នាក់នេះ ត្រូវបានរៀបចំដោយអង្គការសម្អាតទន្លេសមុទ្រ ហើយបន្ទាប់ពីបញ្ចប់សកម្មភាពសម្អាតទន្លេ អង្កការនេះ ក៏មានកម្មវិធីចាប់ឆ្នោតដើម្បីឈ្នះរងា្វន់អាវយឺត ដបទឺក និងកាបូបដ៏ស្រស់ស្អាតសម្រាប់អ្នកចូលរួមផងដែរ។
កញ្ញា ភាព ច័ន្ទជាលីន ជំនួយការផ្នែកទីផ្សារ និងប្រព័ន្ធផ្សព្វផ្សាយសង្គមនៃអង្គការសម្អាតទន្លេសមុទ្រប្រាប់ ភ្នំពេញ ប៉ុស្តិ៍ នៅថ្ងៃទី ២៥ ខែសីហាថា សកម្មភាពនៃការប្រមូលសំរាមនេះ គឺធ្វើឡើងនៅថ្ងៃទី ២៦ ខែសីហា ដើម្បីឆ្លុះបញ្ចាំងឱ្យមានការយកចិត្តទុកដាក់ពីបញ្ហាសំរាម ជាពិសេសសំរាមដែលហូរចូលទៅក្នុងទន្លេ ដែលធ្វើឱ្យប៉ះពាល់ដល់បរិស្ថាន និងទឹកទន្លេ ដែលជាប្រភពទឹកដ៏សំខាន់របស់ពលរដ្ឋទូទាំងប្រទេស។
កញ្ញាបន្តថា៖ «ការប្រមូលសំរាមលើកនេះ ក្រៅពីការចូលរួមរបស់អ្នកស្ម័គ្រចិត្ត ក៏មានការចូលរួមពីសំណាក់អាជ្ញាធរ និងវិស័យឯកជនផងដែរ អាចមានអ្នកចូលរួម ប្រមាណ ៥០០ នាក់។ យើងយល់ថា ការចូលរួមសម្អាតទន្លេនេះ គឺចូលរួមលើកកម្ពស់ និងការទប់ស្កាត់បញ្ហាសំរាម ជាពិសេសគឺការបំពុលទឹកទន្លេដោយប្លាស្ទិក»។
ជាមួយគ្នានេះកញ្ញា ភាព ច័ន្ទជាលីន ក៏បានអះអាងទៀតថា ចំពោះការប្រមូលសំរាមនៅតាមដងទន្លេនេះ អង្គការសម្អាតទន្លេសមុទ្រ នឹងបន្តធ្វើនៅតាមតំបន់ផ្សេងៗជុំវិញទន្លេកម្ពុជាបន្តទៀត ដើម្បីឱ្យប្រាកដថា ដងទន្លេ ឬទឹកទន្លេកម្ពុជា គ្មានសំរាមក្នុងរយៈពេល ៥ ឆ្នាំខាងមុខ។
សកម្មភាពអ្នកស្ម័គ្រចិត្តប្រមូលសំរាម។ រូបថត RIVER OCEAN CLEANUP
សូមជម្រាបថា តាមរយៈសកម្មភាពនៃការប្រមូលសំរាមតាមដងទន្លេ របស់អង្គការសម្អាតទន្លេសមុទ្រ មកដល់បច្ចុប្បន្ន សំរាមប្រមាណ ៨០ តោន ត្រូវបានប្រមូល ហើយសំរាមទាំងនោះ ភាគច្រើនជាប្លាស្ទិក ខណៈសំរាមទាំងនោះ ត្រូវបានប្រមូលយកមកស្តុកទុកដើម្បីប្រើប្រាស់ឱ្យក្លាយទៅជាប្រយោជន៍ និងអាចប្រើប្រាស់បានឡើងវិញ ចៀសវាងបង្កផលប៉ះពាល់ដល់បរិស្ថានផងដែរ។
លោក នេត្រ ភត្ត្រា អ្នកនាំពាក្យក្រសួងបរិស្ថាន ធ្លាប់ថ្លែងថា នៅក្នុងក្របខ័ណ្ឌនៃការកាត់បន្ថយសំណល់សំរាមនៅលើទីលានចាក់សំរាម រាជរដ្ឋាភិបាល បានដាក់ចុះ នូវគោលនយោបាយ នៃការលើកទឹកចិត្ត ទៅលើការកែច្នៃផ្សេងៗ ដើម្បីកាត់បន្ថយសំណល់សំរាមនៅលើទីលាន។ ក្នុងនោះ ក៏មានការជំរុញលើកទឹកចិត្ត ឱ្យមានការញែកសំរាមទៅតាមប្រភេទរបស់វាឱ្យបានត្រឹមត្រូវ ហើយយើងអាចទាញផលសេដ្ឋកិច្ចពីសំរាមវិញផងដែរ។
បច្ចុប្បន្ន ការបញ្ចេញសំរាម នៅទូទាំងប្រទេសមានទំហំប្រមាណជាង ១ ម៉ឺនតោន ក្នុង ១ ថ្ងៃ ហើយក្នុង ១ ឆ្នាំ បញ្ចេញជាង ៤ លានតោន ក្នុងនោះពី ៦៥ ទៅ ៦៨ ភាគរយ ជាសំណល់សរីរាង្គ ដែលអាចច្នៃជាជីកំប៉ុស និងសំរាមជាង ២០ ភាគរយ ជាសំណល់ប្លាស្ទិក ដែលអាចច្នៃប្រើប្រាស់ឡើងវិញបាន ខណៈ ១០ ភាគរយជាសំណល់រឹង។ នេះបើតាមលោក នេត្រ ភក្ត្រា៕
