ភ្នំពេញៈ សៀមរាបៈប្រជាពលរដ្ឋតាំងទីលំនៅខុសច្បាប់ក្នុងរមណីយដ្ឋានអង្គរសរុបចំនួន ៧២៧ គ្រួសារ នៅភូមិទក្សិណត្បូង ភូមិត្រពាំងសេះ ដែលស្ម័គ្រចិត្តរុះរើចេញពីតំបន់អង្គរបានទៅចូលរួមចាប់ឆ្នោត នៅសាលាខេត្តសៀមរាបនៅព្រឹកថ្ងៃទី ២៥ ខែសីហា ដើម្បីយកទីតាំងថ្មីនៅភូមិធម្មជាតិរុនតាឯក ចំណែកទីតាំងដីដែលបានរុះរើចេញជំនួសមកវិញដោយការដាំកូនឈើប្រណីត។ នេះបើតាមរដ្ឋមន្ត្រីក្រសួងរៀបចំដែនដី។
លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ សរសេរលើហ្វេសប៊ុកនៅព្រឹកថ្ងៃទី ២៥ ខែសីហា ឱ្យដឹងថា ប្រជាពលរដ្ឋដែលតាំងលំនៅខុសច្បាប់ក្នុងតំបន់អង្គរ ៧២៧ គ្រួសារ បានទៅចូលរួមចាប់ឆ្នោតយកទីតាំងដីថ្មី ដោយសម្តែងក្តីករីយរាយក្រៃលែង។
លោកសរសេរថា៖ «នៅសាលាខេត្តសៀមរាប ប្រជាពលរដ្ឋតាំងទីលំនៅខុសច្បាប់ក្នុងរមណីយដ្ឋានអង្គរសរុបចំនួន ៧២៧ គ្រួសារ ដែលបានស្ម័គ្រចិត្តរុះរើ និងគ្រប់លក្ខខណ្ឌក្នុងការទទួលបានការទៅតាំងលំនៅថ្មី នៅភូមិធម្មជាតិរុនតាឯក ក្នុងនោះ ២៣៤ គ្រួសារ ស្ថិតនៅភូមិទក្សិណត្បូង និង ៤៩៣ គ្រួសារ ស្ថិតនៅភូមិត្រពាំងសេះ បានចូលរួមចាប់ឆ្នោតយកដីឡូត៍»។
លោកថា ទីតាំងដីដែលពលរដ្ឋបានរុះរើចេញមួយចំនួន បានដាក់ដាំកូនឈើបេង និងធ្នង់ជាដើម ដើម្បីបរិស្ថានក្នុងតំបន់ឧទ្យានអង្គរ។
ថ្លែងបន្ទាប់ពីចាប់ឆ្នោតបាននៅថ្ងៃទី ២៥ ខែសីហា អ្នកស្រី ហឿន ស៊ីណា ជាប្រជាពលរដ្ឋនៅភូមិត្រពាំងសេះ បានសម្តែងក្តីរីករាយ និងថ្លែងការអរគុណដល់លោកនាយករដ្ឋមន្ត្រី ហ៊ុន សែន ព្រមទាំងថ្នាក់ដឹកនាំទាំងអស់ ដែលបានដោះដូរដីជូនប្រជាពលរដ្ឋ។ យ៉ាងណាក៏ដោយ អ្នកស្រីបានលើកឡើងជាសំណូមពរឱ្យមានការអភិវឌ្ឍតំបន់ដីនៅភូមិធម្មជាតិរុនតាឯក មានប្រព័ន្ធទឹក មានផ្លូវ មន្ទីរពេទ្យ និងជាពិសេសសាលារៀនដើម្បីកុមារា-កុមារី ដែលជាទំពាំងស្នងឫស្សីបានសិក្សារៀនសូត្រ។
អ្នកស្រីថ្លែងថា៖ «ពួកយើងទាំងអស់គ្នាក៏សូមអរគុណដល់សម្តេច និងថ្នាក់ដឹកនាំទាំងអស់ដែលបានដោះដូរដីឱ្យប្រជាពលរដ្ឋពួកយើងខ្ញុំ ហើយក៏សូមឱ្យសម្តេចពុកជួយដើម្បីឱ្យតំបន់អភិវឌ្ឍន៍អាចមានជា សាលារៀន ប្រព័ន្ធទឹកប្រើប្រាស់ មានផ្លូវជាតិ ផ្លូវថ្នល់ ដើម្បីឱ្យប្រជាពលរដ្ឋបានធ្វើដំណើរស្រួលផងដែរ ហើយក៏សូមឱ្យមានមន្ទីរពេទ្យ និងសាលារៀនផងដែរ»។
លោក ហាយ យុង តំណាងក្រុមការងារវាស់វែងដីក្នុងតំបន់អង្គរ ថ្លែងនៅថ្ងៃទី ២៥ ខែសីហាថា គោលការណ៍ផ្ដល់ដីដំបូងដល់ប្រជាពលរដ្ឋមានចំនួនជាង ៧០០ គ្រួសារ គឺពួកគាត់បានស្ម័គ្រចិត្ដទទួលយកក្បាលដីទីតាំងថ្មី បន្ទាប់ពីបានវាស់វែងរកឃើញថា ពួកគាត់សាងសង់លំនៅឋាននៅលើដីតំបន់អង្គរគ្មានច្បាប់អនុញ្ញាត ខណៈដែលប្រជាពលរដ្ឋមួយចំនួនទៀតមិនព្រមទទួល និងមិនទាន់រកម្ចាស់ឃើញដោយមានតែផ្ទះ។
លោកបានបន្ដថា ការផ្ដល់ដីទីតាំងថ្មីដល់ប្រជាពលរដ្ឋជំហានដំបូងនេះ អាចនឹងចាប់ផ្ដើមរុះរើលំនៅឋានឱ្យពួកគាត់នៅចុងឆ្នាំ២០២២នេះ ដោយសារប្រជាពលរដ្ឋខ្លះជាប់មានកូនរៀន និងជួបបញ្ហាផ្សេងៗ ប៉ុន្ដែមានប្រជាពលរដ្ឋខ្លះពួកគាត់បានរុះរើមួយចំនួនហើយ។
លោកបញ្ជាក់ថា៖ «អាជ្ញាធរ នឹងឱ្យពួកគាត់ទៅពិនិត្យមើលក្បាលដី ក្រោយពីចាប់ឆ្នោតរួចបានចាប់ពី ៤ ទៅ ៥ ថ្ងៃ ខណៈក្រុមការងារកំពុងឈូសឆាយរៀបចំប្លង់ដីស្របច្បាប់ ដែលទីតាំងដីថ្មីនេះ ស្ថិតនៅឃុំរុនតាឯក ស្រុកបន្ទាយស្រី ព្រមទាំងមានការអភិវឌ្ឍគ្រប់វិស័យ ដូចជាសាលារៀន មន្ទីរពេទ្យ ទីវត្ដអារាម និងមានផ្លូវថ្នល់ខ្វាត់ខ្វែងផងដែរ»។
តាមសេចក្តីប្រកាសព័ត៌មានរបស់ក្រសួងដែនដីនៅថ្ងៃទី ២៤ ខែសីហា បញ្ជាក់ថា ចាប់ពីថ្ងៃទី ១៨ ដល់ថ្ងៃទី ២៣ ខែ សីហា ឆ្នាំ ២០២២ ក្រុមការងារបច្ចេកទេសបានវាស់វែងក្បាលដីបានចំនួន ២០ ០៣១ ក្បាលដី ក្នុងនោះក្បាលដីមានសំណង់ចំនួន ១២ ៣១៥ ក្បាលដី ក្បាលដីគ្មានសំណង់ចំនួន ៦ ៧៣៧ ក្បាលដី ក្នុងទំហំសរុប ៤០ ១១៨ ហិកតានៃទីតាំង ទាំង ៣ ដែលស្ថិតក្រោមការគ្រប់គ្រងរបស់អាជ្ញាធរជាតិអប្សរា។ ជាមួយគ្នានោះ ក្រុមការងារក៏បានបំពេញសម្រង់ព័ត៌មានរបស់អ្នកសាងសង់ និងកាន់កាប់ដីបានចំនួន ១៧ ៣២២ គ្រួសារ៕