.jpg)
ក្រុមអ្នកសារព័ត៌មានសហគមន៍ និងអ្នកសារព័ត៌មានអាជីព ក្នុងសន្និសីទសារព័ត៌មានសហគមន៍សម័យឌីជីថលស្តីពីបញ្ហា និងដំណោះស្រាយពិតក្នុងសហគមន៍ នាថ្ងៃទី ២៤ សីហា។ ហេង ជីវ័ន
ភ្នំពេញៈ តំណាងសហគមន៍មកពីខេត្តស្វាយរៀង និងកំពង់ស្ពឺ លើកឡើងថា ការយល់ដឹងពីបច្ចេកវិទ្យាឌីជីថល និងរបៀបនៃការសរសេរព័ត៌មាន ធ្វើឱ្យអ្នកសារព័ត៌មានសហគមន៍ មានភាពងាយស្រួលក្នុងទំនាក់ទំនងទៅកាន់អ្នកសារព័ត៌មានអាជីព ខុសកាលពីមុន ដែលអ្នកសារព័ត៌មានសហគមន៍ មានការលំបាកខ្លាំងក្នុងការបញ្ចេញព័ត៌មានដោយខ្វះខាតទាំងឧបករណ៍ទំនាក់ទំនង។
ថ្លែងក្នុងកិច្ចពិភាក្សា ១ ក្នុងសន្និសីទអ្នកសារព័ត៌មានសហគមន៍ សម័យឌីជីថល ស្តីពី «បញ្ហា និងដំណោះស្រាយពិតក្នុងសហគមន៍» រៀបចំដោយសមាគមសម្ព័ន្ធសហគមន៍កសិករកម្ពុជា ធ្វើឡើងនៅមជ្ឈមណ្ឌលដាយកូនៀ ថ្ងៃទី ២៤ ខែសីហា លោក ស៊ឹង សុខុម តំណាងសហគមន៍ត្រពាំងជោ ខេត្តកំពង់ស្ពឺ ថ្លែងថា ព័ត៌មានដែលសហគមន៍រាយការណ៍ ឬផ្តល់ឱ្យទៅអ្នកសារព័ត៌មាន ភាគច្រើនជាព័ត៌មាន ដែលរសើប ហើយអ្នកសារព័ត៌មានផ្សេងៗក្រៅពីអ្នកសារព័ត៌មានអាជីពមិនហ៊ានចុះផ្សាយការពិតឡើយ។ លោកថា ដំបូងឡើយសហគមន៍មានការលំបាកខ្លាំង ក្នុងការស្វែងរក និងទំនាក់ទំនងទៅអ្នកសារព័ត៌មានអាជីព ព្រោះគ្មានឧបករណ៍ទំនាក់ទំនងគ្រប់គ្រាន់។
លោកបន្តថា យ៉ាងណាក៏ដោយ ក្នុងរយៈពេលចុងក្រោយនេះ ការរីកចម្រើនសម័យឌីជីថល សហគមន៍របស់លោកបានសន្សំប្រាក់ទិញទូរស័ព្ទទំនើប ដើម្បីងាយស្រួលក្នុងការទាក់ទង និងផ្តល់ព័ត៌មាន។ ក្នុងពេលបច្ចុប្បន្ន សហគមន៍មួយចំនួនមានបណ្តាញទំនាក់ទំនងផ្ទាល់ខ្លួន ក្នុងការផ្សព្វផ្សាយព័ត៌មានទៀតផង។
លោកថ្លែងថា៖«ឥឡូវនេះយើងបានល្អប្រសើរច្រើន ទី១ សហគមន៍បានទទួលការបណ្តុះបណ្តាលពីរបៀបផ្តល់ព័ត៌មាន និងបានចេះខ្លះៗ ពីរបៀបសរសេរព័ត៌មាន ដើម្បីចែករំលែកទៅអ្នកសារព័ត៌មានអាជីព ងាយទទួលបានងាយយល់សាច់រឿងយើងអ៊ីចឹងទៅ»។
អ្នកស្រី ខៀវ សារ៉ុន តំណាងសហគមន៍សាមគ្គីរមាសហែក នៅខេត្តស្វាយរៀង ថ្លែងថា នៅមុនឆ្នាំ ២០១០ សហគមន៍ពិតជាមានការលំបាកខ្លាំងក្នុងទំនាក់ទំនង និងផ្តល់ព័ត៌មានពិតទៅអ្នកសារព័ត៌មានអាជីព។ នេះដោយសារតែគ្មានទូរស័ព្ទទំនើបប្រើសម្រាប់បង្ហោះព័ត៌មាន និងមិនមានអ្វីមួយដែលអាចបញ្ជាក់ និងរាយការណ៍បានថា ប្រជាសហគមន៍កំពុងស្ថិតក្នុងហេតុការណ៍ណាមួយឡើយ ជាពិសេសគឺពេលបញ្ហាកំពុងកើតឡើង។
អ្នកស្រីបន្តថា ខុសពីមុន ក្នុងពេលបច្ចុប្បន្ន អ្នកសារព័ត៌មានសហគមន៍ មានឧបករណ៍ទំនាក់ទំនងគ្រប់គ្រាន់ តាមរយៈទូរស័ព្ទទំនើប ដែលអាចផ្ញើសារបានទាំងសំឡេង និងរូបភាព ក៏ដូចជាខ្លឹមសារ ដើម្បីផ្សព្វផ្សាយចេញឱ្យសាធារណជនបានដឹង។ ជាមួយគ្នានោះការទទួលបានការអប់រំ អំពីការសរសេរព័ត៌មានមួយចំនួនទៀត កាន់តែមានភាពងាយស្រួលក្នុងការបញ្ចេញខ្លឹមសារសំខាន់ៗទៅអ្នកសារព័ត៌មានអាជីព។
អ្នកស្រី កាន់ វិច្ឆិកា អ្នកសារព័ត៌មានឯករាជ្យថ្លែងថា ព័ត៌មាន បញ្ហាផ្សេងៗរបស់សហគមន៍ មានសារៈសំខាន់ សម្រាប់អ្នកសារព័ត៌មានអាជីពក្នុងការចេញផ្សាយ ប៉ុន្តែអ្នកសារព័ត៌មាន មិនមានពេលវេលាគ្រប់គ្រាន់ចុះទៅសម្ភាសគ្រប់សហគមន៍នោះទេ។ ហេតុនេះ ការបញ្ចេញសារតាមរយៈបណ្តាញសង្គម ជាពិសេសហ្វេសប៊ុកដែលកំពុងមានអ្នកប្រើប្រាស់ច្រើន គឺជាចំណុចមួយសម្រួលដល់អ្នកសារព័ត៌មានអាជីព អាចឆាប់ដឹងពីរឿងរ៉ាវ ដែលកើតឡើងបាន។
អ្នកស្រីថ្លែងថា៖ «នៅពេលដែលសហគមន៍ ឬប្រជាពលរដ្ឋ កសិករ ឬសកម្មជនអីផ្សេងៗ ពួកគាត់មានបញ្ហា ឬកំពុងតែកើតមានបញ្ហាណាមួយក្នុងសហគមន៍ពួកគាត់ ហើយពួកគាត់បង្ហោះលើបណ្តាញសង្គម ជាពិសេសហ្វេសប៊ុកហ្នឹង គឺងាយស្រួលធ្វើឱ្យអ្នកសារព័ត៌មានទទួលបានព័ត៌មាន ហើយពួកគាត់[មាន]ទំនាក់ទំនងបន្ថែមទៀតពាក់ព័ន្ធរឿងដែលកើតឡើង»។
បើតាមអ្នកស្រី កាន់ វិច្ឆិកា ដើម្បីឱ្យអ្នកសារព័ត៌មានកាន់តែងាយស្រួលធ្វើទំនាក់ទំនងទៅសហគមន៍ គឺនៅពេលបង្ហោះសារ ឬមួយការផូស្តណាមួយដែលសហគមន៍បង្ហោះនោះអាចដាក់បញ្ចូលលេខទូរស័ព្ទ ជាមួយទីតាំងជាក់លាក់ បន្ថែមកាន់តែប្រសើរ។
លោក ញឹម សុខន អ្នកសារព័ត៌មានវីអូឌី ថ្លែងក្នុងកិច្ចពិភាក្សានៃសន្និសីទនោះថា ទំនាក់ទំនងរវាងអ្នកសារព័ត៌មានសហគមន៍ និងអ្នកសារព័ត៌មានអាជីពក្នុងពេលបច្ចុប្បន្ន មានភាពងាយស្រួលច្រើន។ ក្នុងនោះគេសង្កេតឃើញថា ស្ថាប័នសារព័ត៌មានតែងមានគេហទំព័រ ដែលនៅលើនោះមានលេខទូរស័ព្ទ Hot Line ដែលអំណោយផលដល់ប្រជាពលរដ្ឋសហគមន៍អាចស្វែងរក ដើម្បីធ្វើទំនាក់ទំនងបាន។ ករណីទាក់ទងមិនបានក៏នៅមានបណ្តាញសង្គម ដែលអាចធ្វើការផ្ញើសារបានផងដែរ។
លោកថ្លែងថា៖ «ឥឡូវយើងមានប្រព័ន្ធតេឡេក្រាម យើងមានហ្វេសប៊ុក យើងមានស្អីៗផ្សេងទៀតក្នុងការទាក់ទងគ្នា យើងអាចឆាត។ ឧទាហរណ៍ថា ស្អែកយើងណាត់គ្នានៅកន្លែងនេះ ឬកន្លែងនោះ ហើយនៅពេលដែលយើងមានបញ្ហានៅក្នុងសហគមន៍ យើងអាចឡាយផ្ទាល់ដែលអាហ្នឹងមកដល់ព័ត៌មានអាជីព។ អ៊ីចឹងព័ត៌មានអាជីពគេមើលឃើញគេទាក់ទងយើងភ្លាម»។
លោក ញឹម សុខន លើកឡើងផងដែរថា ការផ្សព្វផ្សាយដោយចងក្រងជាសៀវភៅ ដែលមានលេខទូរស័ព្ទ របស់តំណាងសហគមន៍ គឺជាភាពងាយស្រួលបន្ថែមទៀត សម្រាប់អ្នកសារព័ត៌មានអាជីព អាចងាយស្រួលស្វែងរកទំនាក់ទំនងសួរព័ត៌មាន នៅពេលមានបញ្ហាណាមួយកើតឡើងក្នុងសហគមន៍មូលដ្ឋានប្រជាពលរដ្ឋ៕
