លោក Liu Jianchao រដ្ឋមន្ត្រីក្រសួងទំនាក់ទំនងអន្តរជាតិមជ្ឈិមបក្សកុម្មុយនីស្តចិន ក្នុងជួបពិភាក្សាការងារជាមួយព្រះអង្គម្ចាស់ក្សត្រិយ៍ នរោត្តម រតនាទេវី អនុប្រធានគណបក្សហ្វ៊ុនស៊ិនប៉ិច កាលពីថ្ងៃទី ២៤ ខែសីហា។
ភ្នំពេញៈ ក្រោមស្ថានភាពថ្មី គណបក្សកុម្មុយនីស្តចិនប្តេជ្ញាពង្រឹងទំនាក់ទំនង និងកិច្ចសហប្រតិបត្តិការជាមួយគណបក្សហ្វ៊ុនស៊ិនប៉ិច ដើរតួនាទីយ៉ាងសកម្មក្នុងការជំរុញអភិវឌ្ឍទំនាក់ទំនងរវាងចិន-កម្ពុជានិងការកសាងសហគមន៍វាសនារួមគ្នា។
នេះបើតាម លោក Liu Jianchao រដ្ឋមន្ត្រីក្រសួងទំនាក់ទំនងអន្តរជាតិមជ្ឈិមបក្សកុម្មុយនីស្តចិន ជួបពិភាក្សាការងារជាមួយព្រះអង្គម្ចាស់ក្សត្រិយ៍ នរោត្តម រតនាទេវី អនុប្រធានគណបក្សហ្វ៊ុនស៊ិនប៉ិចកាលពីថ្ងៃទី ២៤ ខែសីហា និងត្រូវផ្សព្វផ្សាយដោយស្ថានទូតចិនប្រចាំកម្ពុជាកាលពីថ្ងៃទី ២៥ ខែ សីហា ឆ្នាំ ២០២២។
លោកបន្តទៀតថា គណបក្សហ្វ៊ុនស៊ិនប៉ិច តែងប្រកាន់ខ្ជាប់នូវគោលនយោបាយមិត្តភាពជាមួយភាគីចិន តែងប្រកាន់ខ្ជាប់នូវភាពយុត្តិធម៌សច្ចធម៌លើបញ្ហាទាក់ទងនឹងផលប្រយោជន៍ស្នូលរបស់ចិនមានដូចជាបញ្ហាកោះតៃវ៉ាន់ជាដើម ហើយបានគាំទ្រយ៉ាងម៉ឺងម៉ាត់ចំពោះគោលជំហររបស់ចិន គឺជាមិត្តល្អនិងមិត្តពិតប្រាកដរបស់គណបក្សកុម្មុយនីស្តចិន។
បើតាម លោក Liu Jianchao ថា ទំនាក់ទំនងចំណងមិត្តភាពជាប្រពៃណីរវាងចិននិងកម្ពុជាត្រូវបានបង្កើតឡើងដោយព្រះករុណាព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ» និង លោក ម៉ៅ សេទុង, លោក ចូវ អេនឡាយ និងថ្នាក់ដឹកនាំចិនជំនាន់មុន។ សម្តេច «ព្រះបរមរតនកោដ្ឋ» ជានិមិត្តរូបដ៏សំខាន់នៃចំណងមិត្តភាពរវាងចិន-កម្ពុជាដែលឆ្លាក់ជាប់ក្នុងក្រអៅបេះដូងប្រជាជនទាំង ២។
លោកថ្លែងថា៖ «ភាគីចិនសូមវាយតម្លៃខ្ពស់ចំពោះការរួមព្រះរាជសកម្មភាពដ៏ថ្លៃថ្លារបស់សម្តេច «ព្រះបរមរតនកោដ្ឋ» ក៏ដូចជាព្រះរាជវង្សានុវង្សសម្រាប់ទំនាក់ទំនងចំណងមិត្តភាពយូរអង្វែងមួយនេះ ហើយរីករាយបន្តសហការជាមួយភាគីកម្ពុជា ដើម្បីបន្តផ្សព្វផ្សាយទំនាក់ទំនងមិត្តភាពជាប្រពៃណីរវាងចិននិងកម្ពុជា ផ្តល់ផលប្រយោជន៍ជូនដល់ប្រទេសនិងប្រជាជនទាំង ២»។
ព្រះអង្គម្ចាស់ក្សត្រិយ៍ នរោត្តម រតនាទេវី បានវាយតម្លៃខ្ពស់ចំពោះសមិទ្ធផលដែលទទួលបានដ៏មហិមារបស់ប្រជាជនចិនដែលក្រោមការដឹកនាំរបស់គណបក្សកុម្មុយនីស្តចិន បានថ្លែងអរគុណដល់គណបក្សកុម្មុយនីស្តចិន និងរដ្ឋាភិបាលចិនដែលតែងផ្តល់ការគាំទ្រ និងជំនួយយ៉ាងពេញទំហឹងមកកាន់កម្ពុជារយៈពេលវែង។
ព្រះអង្គក៏មានព្រះរាជបន្ទូលថា គណបក្សហ្វ៊ុនស៊ិនប៉ិចប្រកាន់ខ្ជាប់ព្រះរាជដំបូន្មានរបស់សម្តេច «ព្រះបរមរតនកោដ្ឋ» រក្សាទំនាក់ទំនងមិត្តភាពពិសេសរវាងកម្ពុជា និងចិន យកចិត្តទុកដាក់ខ្ពស់ចំពោះទំនាក់ទំនង និងកិច្ចសហប្រតិបត្តិការជាមួយគណបក្សកុម្មុយនីស្តចិន នឹងបន្តប្រកាន់ខ្ជាប់នូវគោលនយោបាយមិត្តភាពជាមួយភាគីចិន គាំទ្រយ៉ាងមុតមាំនូវគោលជំហរត្រឹមត្រូវរបស់ចិន បន្តផ្សព្វផ្សាយទំនាក់ទំនងមិត្តភាពជាប្រពៃណីរវាងកម្ពុជានិងចិន៕
.jpg)
