ភ្នំពេញៈ ក្រសួងសង្គមកិច្ច អតីតយុទ្ធជន និងយុវនីតិសម្បទាបានឱ្យដឹងថា រយៈពេលជាង ២ ឆ្នាំ ក្រសួងចំណាយថវិការដ្ឋអស់ជាង ៣ ពាន់ប៊ីលានរៀល ឬស្មើនឹង ៧៧៥,១១ លានដុល្លារអាមេរិកក្នុងការបើកសាច់ប្រាក់ពីកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងកូវីដ ១៩។
សេចក្តីជូនដំណឹងរបស់ក្រសួងសង្គមកិច្ចអតីតយុទ្ធជន និងយុវនីតិសម្បទាចុះថ្ងៃទី ២៤ សីហា បានឱ្យដឹងថា សរុបការចំណាយលើការអនុវត្តកម្មវិធីចាប់ពីថ្ងៃទី ២៥ ខែមិថុនា ឆ្នាំ ២០២០ ដល់ថ្ងៃទី ២៤ ខែសីហា ឆ្នាំ ២០២២ ដែលមានចំនួន ២៦ លើក រដ្ឋបានចំណាយអស់ថវិកាចំនួន ៣ ១០០ ៤២៧ ៣២៧ ០០០រៀល ឬស្មើនឹង ៧៧៥,១១ លានដុល្លារអាមេរិក។
ក្រៅពីនេះ ក្រសួងក៏បានប្រកាសដែរថា សម្រាប់ការបើកផ្តល់ប្រាក់ឧបត្ថម្ភជុំទី ១០ លើកទី ២ ចាប់ផ្តើមពីថ្ងៃទី ២៥ ខែសីហា ឆ្នាំ ២០២២ រហូតដល់ថ្ងៃទី ២៤ ខែកញ្ញា ឆ្នាំ ២០២២ ដែលមានរយៈពេល ៣០ ថ្ងៃ។ ចំពោះគ្រួសារដែលបានផ្ទៀងផ្ទាត់ទាំង ២៦ លើករួចហើយសូមទៅបើកប្រាក់ឧបត្ថម្ភនៅតាមបញ្ជរវឹងដោយមិនតម្រូវឱ្យទៅសាលាឃុំ សង្កាត់សាជាថ្មីទេ។
បន្ថែមពីនេះ ក្រសួងក៏បានណែនាំដែរថា៖ «ចំពោះគ្រួសារក្រីក្រ និងងាយរងគ្រោះ ដែលមានបណ្ណសមធម៌មានសុពលភាពហើយមិនទាន់បានផ្ទៀងផ្ទាត់ទាំង ១០ ជុំ (២៦ លើក) និងគ្រួសារក្រីក្រដែលទើបទទួលបានបណ្ណសមធម៌ថ្មី សូមអញ្ជើញទៅផ្ទៀងផ្ទាត់នៅសាលា ឃុំ- សង្កាត់ណាមួយ ដើម្បីទទួលបានការឧបត្ថម្ភសាច់ប្រាក់ក្នុងជុំទី ១០ លើកទី ២ នេះពេលទៅបើកប្រាក់ឧបត្ថម្ភជុំទី ១០ លើកទី ២»។
ក្រៅពីនេះ ក្រសួងសង្គមកិច្ចក៏ក្រើនរំឭកដល់ពលរដ្ឋកុំឱ្យចាញ់បោកជនខិលខូចដែលឃោសនាថា ករណីចង់បានបណ្ណតម្រូវឱ្យគ្រួសារក្រីក្របង់ប្រាក់ ដែលទង្វើនោះគឺមិនត្រឹមត្រូវឡើយ ព្រោះការផ្តល់បណ្ណក្រីក្រគឺត្រូវធ្វើឡើងតាមនីតិវិធីនៃការកំណត់អត្តសញ្ញាណគ្រួសារក្រីក្រពីក្រសួងផែនការដោយមិនមានរើសអើងនិន្នាការនយោបាយ និងយកកម្រៃឡើយ។
ក្រសួងបញ្ជាក់ថា «ក្នុងករណីពលរដ្ឋ ឬសាធារណជនពិនិត្យឃើញភាពមិនប្រក្រតីណាមួយក្នុងការអនុវត្តកម្មវិធី ឬដកសាច់ប្រាក់មិនបាននៅតាមបញ្ជរវឹងណាមួយនោះសូមសាធារណជន និងអ្នកទទួលផលទាំងអស់ទាក់ទងជាមួយអ្នកកាន់កម្មវិធីនៅតាមឃុំសង្កាត់ ឬនៅមន្ទីរសង្គមកិច្ចអតីតយុទ្ធជន និងយុវនីតិសម្បទា ឬមន្ទីរផែនការរាជធានីខេត្ត ឬតាមរយៈប្រព័ន្ធទូរស័ព្ទទាន់ហេតុការណ៍របស់មូលនិធិជាតិជំនួយសង្គមលេខ ០៩២ /០១៥ ២១៩ ៨៨៨»។
បើតាមក្រសួងសង្គមកិច្ច ការអនុវត្តកម្មវិធីនេះចាប់ពីថ្ងៃទី ២៥ ខែមិថុនា ឆ្នាំ ២០២០ ដល់ថ្ងៃទី ២៤ ខែសីហា ឆ្នាំ ២០២២ មានពលរដ្ឋ ៦៨៩ ៦៥៧ គ្រួសារ ក្នុងនោះក្រីក្រ ១ មានជាង ២៥ ម៉ឺនគ្រួសារ និងក្រីក្រ ២ មានជាង ៤៣ ម៉ឺនគ្រួសារ ស្មើនឹងសមាជិកជាង ២ លាន ៧ សែននាក់៕