ភ្នំពេញៈ ក្រសួងវប្បធម៌ និងវិចិត្រសិល្បៈសហការជាមួយការិយាល័យអង្គការយូណេស្កូភ្នំពេញកាលពីថ្ងៃទី ២៥ ខែសីហា បានរៀបចំ សិក្ខាសាលាប្រឹក្សាយោបល់ស្តីពី “ការតម្រង់គោលនយោបាយលើកស្ទួយឧស្សាហកម្មវប្បធម៌ និងច្នៃប្រឌិត” ក្នុងគោលបំណង៣សំខាន់ដើម្បីការអភិវឌ្ឍ គាំទ្រផ្នែកច្នៃប្រឌិត និងកែទម្រង់គោលនយោបាយលើកស្ទួយដល់ឧស្សាហកម្មវប្បធម៌។
សិក្ខាសាលាប្រព្រឹត្តទៅក្រោមអធិបតី លោកស្រី ភឿង សកុណា រដ្ឋមន្ត្រីក្រសួងវប្បធម៌ និង វិចិត្រសិល្បៈ និង លោក Sardar Umar Alam តំណាងយូណេស្កូប្រចាំកម្ពុជា ព្រមទាំងតំណាងក្រសួង ស្ថាប័ននានា ចំនួន ១២ និង តំណាងអង្គទូតប្រចាំព្រះរាជាណាចក្រកម្ពុជាចំនួន ១៦ រូបផងដែរ។
អង្គសិក្ខាសាលានេះ រៀបចំឡើងក្នុងគោលបំណងសំខាន់ ៣ គឺ ទី១ ផ្សព្វផ្សាយរបាយការណ៍ជាសកលផ្សាយលើកទី៣ របស់អង្គការយូណេស្កូអំពីការរៀបចំតម្រង់គោល នយោបាយវប្បធម៌ ជំរុញឱ្យមានការច្នៃប្រឌិត ដើម្បីការអភិវឌ្ឍ។ ទី២ ពិនិត្យមើលគោលនយោបាយតាមក្រសួងស្ថាប័នជាតិ និងរដ្ឋភាគីពាក់ព័ន្ធ ដើម្បីគាំទ្រផ្នែកច្នៃប្រឌិត។ និងទី៣ សិក្សារៀនសូត្រដកស្រង់បទពិសោធពីបណ្តាប្រទេសនានាដើម្បីកែទម្រង់គោលនយោបាយលើកស្ទួយ ដល់ឧស្សាហកម្មវប្បធម៌ និងការច្នៃប្រឌិតនៅកម្ពុជា។
ឆ្លើយតបនឹងបំណងខាងលើអង្គសិក្ខាសាលាបានរៀបចំរបៀបវារៈសំខាន់គឺ បទបង្ហាញនិងការពិភាក្សាផ្តោតសំខាន់លើឧស្សាហកម្មវប្បធម៌ជាពិសេសពិនិត្យលើគោលនយោបាយ តាមបណ្តាក្រសួងដែលមានបទបង្ហាញពីតំណាងក្រសួងវប្បធម៌និងវិចិត្រសិល្បៈ ក្រសួងពាណិជ្ជកម្ម និងក្រសួងសេដ្ឋកិច្ច និងហិរញ្ញវត្ថុ។
ជាលទ្ធផលនៃបទបង្ហាញ និងកិច្ចពិភាក្សាបានបង្ហាញឱ្យដឹងពីស្ថានភាពបច្ចុប្បន្ន និងគោលនយោបាយជាតិដែលពាក់ព័ន្ធនឹងឧស្សាហកម្មវប្បធម៌នៅកម្ពុជា កម្មសិទ្ធិបញ្ញា ម៉ាកទំនិញ ម៉ាកភូមិសាស្ត្រ និងការប្រមូលពន្ធព្រមទាំងការបង់ពន្ធលើវិស័យឧស្សាហកម្មវប្បធម៌។
ឧស្សាហកម្មវប្បធម៌ក្នុងបរិបទអាស៊ី ដែលមានបទបង្ហាញពីតំណាងស្ថានទូតឥណ្ឌូនេស៊ី ហ្វីលីពីន កូរ៉េ ជប៉ុន ចិន និងវៀតណាម ដើម្បីចែករំលែកបទពិសោធស្តីអំពីគោលនយោបាយពាក់ព័ន្ធនឹងឧស្សាហកម្មវប្បធម៌ក្នុងបណ្តាប្រទេសនីមួយៗ។ ជាការកត់សម្គាល់នៅក្នុងបរិបទនៃការរាលដាលជំងឺកូវីដ ១៩ គេ សង្កេតឃើញបណ្តាប្រទេសខ្លះ នៅតែទទួលបានចំណូលថវិកាជាតិខ្ពស់តាមរយៈវិស័យឧស្សាហកម្មវប្បធម៌ និង ច្នៃប្រឌិត៕