សៀមរាបៈ មន្ទីរប្រៃសណីយ៍ និងទូរគមនាគមន៍ ខេត្តសៀមរាប សហការជាមួយវិទ្យាស្ថានអភិបាលកិច្ចឌីជីថលនៃបណ្ឌិត្យសភាឌីជីថលកម្ពុជាបើកវគ្គបណ្ដុះបណ្ដាលជំនាញឌីជីថលចាំបាច់ជូនមន្ត្រីរាជការមកពីរដ្ឋបាលខេត្ត មន្ទីរអង្គភាពនានាជុំវិញខេត្តទាំងអស់ ៣០ អង្គភាព ដែលមានសិក្ខាកាមសរុបចំនួន ១០៦ នាក់។
លោក សុខ សីហា ប្រធានមន្ទីរប្រៃសណីយ៍ និងទូរគមនាគមន៍ខេត្តសៀមរាប ថ្លែងក្នុងពេលកំពុងដំណើរការវគ្គបណ្តុះបណ្តាលនៅថ្ងៃទី ២៦ ខែសីហា ឆ្នាំ ២០២២ ឱ្យដឹងថា គោលបំណងនៃការបណ្ដុះបណ្តាលនេះ គឺដើម្បីកសាងមូលធនមនុស្សឌីជីថលឱ្យឆ្លើយតបទៅនឹងតម្រូវការការងារបច្ចុប្បន្ន និងអនាគតស្របតាមនិន្នាការវិវត្តន៍នៃបច្ចេកវិទ្យាពិភពលោក។
លោកបន្តថា ការជំរុញអក្ខរកម្មឌីជីថលនឹងធ្វើឱ្យប្រសើរឡើងនៃការសិក្សាជំនាញឌីជីថលនឹងជួយគាំទ្រដល់ការអនុវត្តក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជា ២០២១-២០៣៥ និងគោលនយោបាយរដ្ឋាភិបាលឌីជីថលកម្ពុជា ២០២២-២០៣៥ ដែលគោលនយោបាយនេះមានចក្ខុវិស័យ អភិវឌ្ឍន៍វិស័យឌីជីថលឱ្យក្លាយជាកម្លាំងចលករជំរុញល្បឿនបរិវត្តកម្មរដ្ឋាភិបាល សេដ្ឋកិច្ច និងសង្គមឌីជីថល ដើម្បីលើកកម្ពស់នវានុវត្តន៍ ឧត្តមភាពប្រកួតប្រជែងនៅលើឆាកអន្តរជាតិ និងការអភិវឌ្ឍប្រកបដោយម្ចាស់ការ ចីរភាព និងបរិយាបន្ន។
លោកថ្លែងថា៖ «នេះជាលើកទី ៣ ហើយ សម្រាប់វគ្គបណ្តុះបណ្តាលនៅខេត្តសៀមរាបក្រោមការយកចិត្តទុកដាក់របស់ថ្នាក់ដឹកនាំក្រសួងប្រៃសណីយ៍ និងទូរគមនាគមន៍ និងបណ្ឌិត្យសភាឌីជីថលកម្ពុជាសហការជាមួយមន្ទីរប្រៃសណីយ៍ និងទូរគមនាគមន៍ខេត្តសៀមរាបរៀបចំបើកវគ្គបណ្ដុះបណ្ដាលនេះឡើងស្របតាមបរិបទនៃយុគ្គសម័យបច្ចេកវិទ្យានាពេលបច្ចុប្បន្ន គឺកំពុងតែមានការអភិវឌ្ឍ រីកចម្រើនជឿនលឿនឥតឈប់ឈរ ដែលទាមទារឱ្យយើងទាំងអស់គ្នាត្រូវខិតខំយកចិត្តទុកដាក់រៀនសូត្របន្ថែម ដើម្បីចូលរួមក្នុងការអភិវឌ្ឍខ្លួនឱ្យស្របតាមអភិបាលកិច្ចឌីជីថលនៅកម្ពុជា ដើម្បីធ្វើបរិវត្តកម្មរដ្ឋាភិបាលឌីជីថល និងសេវាសាធារណ:នាពេលខាងមុខប្រកបដោយគុណភាព»។
បើតាម លោក សុខ សីហា កម្មវិធីទាំងអស់នេះសុទ្ធសឹងតែជាតម្រូវការចាំបាច់ សម្រាប់ការប្រើប្រាស់ក្នុងអង្គភាពនីមួយៗ ក៏ដូចជាជួយពង្រឹងសមត្ថភាពមន្ត្រីជាមួយនឹងចំណេះដឹង និងបទពិសោធថ្មីៗ សម្រាប់យកទៅអនុវត្តការងារប្រកបដោយជោគជ័យ និងមានប្រសិទ្ធភាព ដើម្បីចូលរួមអភិវឌ្ឍកសាង មូលដ្ឋានគ្រឹះឌីជីថលស្របតាមចក្ខុវិស័យរបស់រាជរដ្ឋាភិបាល៕