សៀមរាបៈ នៅព្រឹកថ្ងៃទី ២៧ ខែសីហា នេះមានពលរដ្ឋដែលបានតាំងទីលំនៅខុសច្បាប់ក្នុងរមណីយដ្ឋានអង្គរចំនួន ១១៦ គ្រួសារទៀត បានទៅចាប់ឆ្នោតទទួលយកដីនិងស្ម័គ្រចិត្តទទួលយកការទៅតាំងលំនៅថ្មី នៅភូមិធម្មជាតិរុនតាឯក។ នេះបើតាមលោក ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងដែនដីនគរូបនីយកម្ម សំណង់ និងសុរិយោដី។
លោក ជា សុផារ៉ា សរសេរលើហ្វេសប៊ុកនៅព្រឹកនេះថា៖ «គិតត្រឹមម៉ោង ៩ ព្រឹក ថ្ងៃទី ២៧ ខែ សីហា ឆ្នាំ ២០២២ នេះ មានប្រជាពលរដ្ឋមកចូលរួមចាប់ឆ្នោតជ្រើសរើសទីតាំងទៅរស់នៅភូមិធម្មជាតិរុនតាឯកចំនួន ១១៦គ្រួសារហើយ»។
ដោយឡែក នៅព្រឹកថ្ងៃទី ២៥ ខែសីហា នៅសាលាខេត្តសៀមរាប ប្រជាពលរដ្ឋតាំងទីលំនៅខុសច្បាប់ក្នុងរមណីយដ្ឋានអង្គរសរុបចំនួន ៧២៧ គ្រួសារ ដែលបានស្ម័គ្រចិត្តរុះរើ និងគ្រប់លក្ខខណ្ឌក្នុងការទទួលបានការទៅតាំងលំនៅថ្មី នៅភូមិធម្មជាតិរុនតាឯក ក្នុងនោះ ២៣៤ គ្រួសារ ស្ថិតនៅភូមិទក្សិណត្បូង និង ៤៩៣ គ្រួសារ ស្ថិតនៅភូមិត្រពាំងសេស បានចូលរួមចាប់ឆ្នោតយកដីឡូត៍។
លោកឧបនាយករដ្ឋមន្ត្រីបានឱ្យដឹងទៀតថា វឌ្ឍនភាពនៃការរៀបចំភូមិធម្មជាតិរុនតាឯក ដើម្បីទទួលបងប្អូនប្រជាពលរដ្ឋពីតំបន់ត្រពាំងសេស និងទក្សិណត្បូង គឺកងវិស្វកម្មតេជោ ហ៊ុន សែន សៀមរាប បានធ្វើផ្លូវភូមិបាន ៨ ខ្សែ ប្រវែង ១ ៣៣០ ម៉ែត្រ ធ្វើការសម្អាតព្រៃអនុវត្តដោយកម្លាំងមន្ត្រីក្រសួងបរិស្ថាន និងអាជ្ញាធរជាតិអប្សរា សរុបបាន ៣២ ០៧ ហិកតា និង មានប្រជាពលរដ្ឋដែលបានចាប់ឆ្នោតរួចបានចុះមកពិនិត្យទីតាំងដីបណ្តើរៗ ប្រមាណជាង ៩០០ គ្រួសារហើយ៕