ក្រចេះ៖ លោក វ៉ា ថន អភិបាលខេត្តក្រចេះ និងលោក ជា ធារិទ្ធ ជាជំនួយការលោកនាយករដ្ឋមន្ត្រី ហ៊ុន សែន បានធ្វើពិធីក្រុងពាលីសាងសង់ព្រះទីនាំងបុស្បុក និងរូបសំណាកព្រះធម្មាចារ្យ គឹម ច្រែង និងរូបសំណាកលោក ហ៊ុន សែន កាលពីកុមារភាព នៅភូមិតាលុស ឃុំបុសលាវ ស្រុកចិត្របុរី ខេត្តក្រចេះ នាព្រឹកថ្ងៃទី ២៧ សីហា ២០២២ ដើម្បីតម្កល់ជាប្រវត្តិសាស្រ្ត។
លោក វ៉ា ថន អភិបាលខេត្តក្រចេះ ថ្លែងថា ការសាងសង់នេះ គឺដើម្បីជាការរំឭកនឹកគុណដល់ព្រះគ្រូឧបជ្ឈារបស់លោកនាយករដ្ឋមន្ត្រី ហ៊ុន សែន ដែលជាគ្រូដំបូងបានអប់រំទូន្មានប្រៀនប្រដៅលោក កាលពីនៅវ័យកុមារភាពឱ្យមានចំណេះចេះដឹងក្លាយជាបញ្ញវន្ត និងជាវីរជនឆ្នើមរបស់កម្ពុជា ដែលបានដឹកនាំកសាងប្រទេសជាតិឱ្យមានការអភិវឌ្ឍ រីកចម្រើនមកទល់សព្វថ្ងៃ។
លោកថា ទីតាំងខេត្តក្រចេះនេះ ក៏ជាតំបន់ប្រវត្តិសាស្រ្តនៃការរំដោះប្រទេសជាតិកម្ពុជា ឱ្យរួចផុតពីរបបប្រល័យពូជសាសន៍ ប៉ុល ពត។ ការសាងសង់នេះគឺដើម្បីទុកជាកេរដំណែលប្រវត្តិសាស្ត្រ ដល់សាធារណជន និងយុវជនជំនាន់ក្រោយបានដឹង។
លោកបានគូសបញ្ជាក់ថា ទីតាំងនៃការសាងសង់រូបសំណាកនេះ នឹងក្លាយទៅជាទីតាំងតំបន់ទេសចរណ៍ថ្មីមួយកន្លែងទៀត ជាការលើកមុខមាត់នៃខេត្តក្រចេះផងដែរ។ ស្របពេលនេះដែរ ខេត្តក្រចេះ ក៏កំពុងត្រៀមអបអរសាទរនូវការទទួលបានស្ពានឆ្លងទន្លេប្រវត្តិសាស្រ្ត ១ខ្សែ នៅពេលខាងមុខនេះ ដើម្បីពង្រីកការអភិវឌ្ឍរបស់ខេត្ត និងការបង្កើននូវកំណើនសេដ្ឋកិច្ចដល់ប្រជាពលរដ្ឋ កាត់បន្ថយការចំណាកស្រុក កាត់បន្ថយការធ្វើដំណើរឆ្លងកាត់ និងការដឹកជញ្ជូនកសិផល ទិន្នផល និងផលិតផលនានាឆ្លងកាត់ខេត្តនីមួយៗ៕