.jpg)
សៀមរាបៈ លោក ឃឹម ហ្វីណង់ អភិបាលស្រុកបន្ទាយស្រី នៅរសៀលថ្ងៃទី២៧ ខែសីហានេះ បានប្រកាសប្រាប់ពលរដ្ឋដែលនៅតាមបណ្តោយដងស្ទឹង និងនៅតាមជ្រលងជើងភ្នំគូលែនដែលមានមុខទឹកហូរឆ្លងកាត់ បង្កើនការប្រុងប្រយ័ត្នចំពោះហានិភ័យនៃជំនន់ទឹកភ្លៀងគំហុក ចៀសវាងគ្រោះថ្នាក់ជាយថាហេតុណាមួយ។
លោក ឃឹម ហ្វីណង់ បានសរសេរលើហ្វេសប៊ុក នៅថ្ងៃនេះថា៖ «សូមបងប្អូនប្រជាពលរដ្ឋនៅក្នុងស្រុកបន្ទាយស្រី ជាពិសេស អ្នករស់នៅតាមបណ្តោយដងស្ទឹង និងនៅតាមជ្រលងជើងភ្នំគូលែនដែលមានមុខទឹកហូរឆ្លងកាត់ បង្កើនការប្រុងប្រយ័ត្នចំពោះហានិភ័យនៃជំនន់ទឹកភ្លៀងគំហុក (Flash Flood) ចៀសវាងគ្រោះថ្នាក់ជាយថាហេតុណាមួយ»។
លោកបានឱ្យដឹងទៀតថា កម្ពស់ទឹកស្ទឹងបន្ទាយស្រីបានហក់ឡើងគួរឱ្យកត់សម្គាល់ក្នុងរយៈពេលប៉ុន្មានថ្ងៃចុងក្រោយនេះ ដោយសារតែស្រុកបន្ទាយស្រីកំពុងទទួលរងឥទ្ធិពលនៃភ្លៀងធ្លាក់ជោកជាំជាប់ៗគ្នា បណ្តាលឱ្យលិចផ្ទះបងប្អូនប្រជាពលរដ្ឋមួយចំនួន ប៉ុន្តែមិនទាន់មានអ្វីដែលគួរឱ្យព្រួយបារម្ភនៅឡើយទេ ហើយក៏មិនទាន់ដល់កម្រិតត្រូវប្រកាសអាសន្ននោះដែរ។
លោកបានគូសបញ្ជាក់ថា បាតុភូតនេះគឺជារឿងធម្មតានៅរៀងរាល់រដូវសម្បូរព្យុះភ្លៀងសម្រាប់ស្រុកបន្ទាយស្រី ដែលតែងរងឥទ្ធិពលពីខ្យល់មូសុងវស្សា ដោយសារតែមានស្ថានភាពភូមិសាស្ត្រជាតំបន់ខ្ពង់រាប និងមានផ្ទៃរងទឹកភ្លៀងនៃទីជម្រាលភ្នំគូលែនលាតសន្ធឹងធំហើយវែង ដែលជាហេតុធ្វើឱ្យតំបន់មួយចំនួនងាយនឹងទទួលរងហានិភ័យនៃជំនន់ទឹកភ្លៀងគំហុក ជាពិសេស ប្រសិនបើមានភ្លៀងធ្លាក់ខ្លាំងបន្តបន្ទាប់គ្នា ប៉ុន្តែក៏តែងតែហូរស្រកចុះទៅវិញយ៉ាងឆាប់ក្នុងរយៈពេលខ្លីដោយខ្លួនឯងផងដែរ នៅពេលដែលភ្លៀងឈប់ធ្លាក់ ហើយទឹកជំនន់ទាំងនោះត្រូវបានហូរបន្តទៅកាន់ស្ទឹងសៀមរាប។
លោកបានគូសបញ្ជាក់ទៀតថា ភ្លៀងធ្លាក់ជាធម្មតានៅស្រុកបន្ទាយស្រីនេះ មិនមានពាក់ព័ន្ធនឹងអានុភាពនៃកម្លាំងបឺតទាញរបស់ Black Hole នោះទេ៕
