ពោធិ៍សាត់ៈនគរបាលព្រហ្មទណ្ឌខេត្តពោធិ៍សាត់បានបញ្ជូនបុរសជាជនសង្ស័យ ២ នាក់ទៅសាលាដំបូងខេត្តនេះ នៅថ្ងៃទី ២៨ សីហា បន្ទាប់ពីចាប់ខ្លួនបាន ១ ថ្ងៃ ពាក់ព័ន្ធនឹងការប្រើអន្ទាក់ខ្សែលួសឆក់សត្វព្រៃនិងកាំភ្លើងម៉ាកសេកាសេ១ដើម សម្រាប់បាញ់សត្វព្រៃប្រព្រឹត្តនៅភូមិព្រងិល ឃុំព្រងិល ស្រុកភ្នំក្រវាញ ខេត្តពោធិ៍សាត់។
លោកឧត្តមសេនីយ៍ត្រី ម៉ូ លីដា ស្នងការរងនគរបាលខេត្តពោធិ៍សាត់ប្រាប់ភ្នំពេញប៉ុស្តិ៍នៅថ្ងៃទី ២៨ សីហា ថា បុរសជនសង្ស័យដែលសមត្ថកិច្ចរបស់លោកកសាងសំណុំរឿងបញ្ជូនទៅសាលាដំបូងខេត្តទាំងនោះ ឈ្មោះ ស្រស់ ហឿន អាយុ ៤៣ ឆ្នាំ និងឈ្មោះ អឿន សុភ័ណ្ឌ អាយុ ៣៩ ឆ្នាំ ។ពួកគេរស់នៅភូមិទួលក្រួស សង្កាត់ចំរើនផល ក្រុង-ខេត្តពោធិ៍សាត់។
លោកថ្លែងថា៖ «សមត្ថកិច្ចយើងបញ្ជូនពួកគេទៅតុលាការនៅថ្ងៃនេះ (ថ្ងៃទី ២៨ សីហា) ហើយជនទាំង ២ នាក់នេះពាក់ព័ន្ធនឹងការប្រើប្រាស់អាវុធខុសច្បាប់ ព្រោះវត្ថុតាងមានអាវុធ១ដើម។ យើងចាប់ពួកគេនៅថ្ងៃម្សិលមិញ (ថ្ងៃទី ២៧ សីហា)»។
លោកបានរំឭកប្រាប់ថា ជនសង្ស័យទាំង ២ នាក់ ត្រូវបានសមត្ថកិច្ចនគរបាលស្រុកភ្នំក្រវាញឃាត់ខ្លួនកាលពីម៉ោង ៩ កន្លះយប់នៅថ្ងៃទី ២៧ សីហា ២០២២ ខណៈពួកគេកំពុងជិះម៉ូតូម្នាក់ ១ គ្រឿងម៉ាកវេវអាល់ហ្វាពណ៌ខ្មៅ គ្មានស្លាកលេខសម្គាល់ និងម្នាក់ទៀតជិះម៉ូតូម៉ាកហុងដាឌ្រីម ពណ៌ខ្មៅ ស៊េរីឆ្នាំ ២០១៧ ចេញពីផ្ទះបម្រុងចូលទៅក្នុងព្រៃដើម្បីបាញ់សត្វ និងដាក់អន្ទាក់យកសត្វព្រៃ។ ជនទាំង ២ នាក់ ត្រូវបានសមត្ថកិច្ចឃាត់ខ្លួននៅចំណុចច្រកផ្លូវដំរី ស្ថិតក្នុងភូមិព្រងិល ឃុំព្រងិល ស្រុកភ្នំក្រវាញ ខេត្តពោធិ៍សាត់។
បើតាមលោក ម៉ូ លីដា ចំពោះវត្ថុតាងរួមមាន កាំភ្លើងម៉ាកសេកាសេ ១ ដើម និងគ្រាប់ចំនួន ៨ គ្រាប់ អាគុយកម្លាំង ៤០ អំពែរចំនួន ៣ គ្រាប់ ខ្សែលួសអន្ទាក់សម្រាប់ឆក់សត្វព្រៃចំនួន ១ ដុំធំ ព្រមទាំងម៉ូទ័រដុំឆក់ចំនួន ១ ដុំផង ។
ក្រោយឃាត់ខ្លួនជនសង្ស័យឈ្មោះ ស្រស់ ហឿន បានឆ្លើយសារភាពថា កាំភ្លើងម៉ាកសេកាសេ ១ ដើមនោះគឺគាត់បានទិញពីបុរសម្នាក់មិនស្គាល់ឈ្មោះក្នុងតម្លៃ ៥០០ ០០០ រៀល (ហាសិបម៉ឺនរៀល) នៅអំឡុងឆ្នាំ ២០១៩ ទុកសម្រាប់បាញ់សត្វព្រៃ ប៉ុន្តែគេមិនបានប្រាប់សមត្ថកិច្ចថា តាំងពីទិញមកបានបាញ់សម្លាប់សត្វព្រៃអស់ប៉ុន្មានក្បាលនោះទេ។
ពាក់ព័ន្ធនឹងការចោទប្រកាន់ពីតំណាងអយ្យការយ៉ាងណានោះ នៅថ្ងៃទី ២៨ សីហា ភ្នំពេញប៉ុស្តិ៍បានទាក់ទងទៅលោក ផាន់ សុគន្ធថង អ្នកនាំពាក្យអយ្យការអមសាលាដំបូងខេត្តពោធិ៍សាត់ តែទូរស័ព្ទរបស់លោកគ្មានអ្នកទទួល។
ជុំវិញការប្រើអន្ទាក់ចាប់សត្វព្រៃនេះ ក្រសួងបរិស្ថានបានចាប់ផ្តើមធ្វើយុទ្ធនាការអន្ទាក់សូន្យចាប់ពីខែមីនាដល់ខែតុលាឆ្នាំ ២០២២។ លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានធ្លាប់បានប្រាប់ភ្នំពេញប៉ុស្តិ៍ថា យុទ្ធនាការអន្ទាក់សូន្យបានធ្វើនៅតាមបណ្តាខេត្តចំនួន ៥ ដែលមកទល់ពេលនេះអនុវត្តបានជាង ៥ ខែមកហើយដោយទទួលបានលទ្ធផលជាវិជ្ជមាន។ ក្នុងនោះពលរដ្ឋទទួលបានការអប់រំ កាត់បន្ថយការគំរាមកំហែងដោយសារអន្ទាក់ក្នុងតំបន់ការពារធម្មជាតិ និងធ្វើឱ្យសត្វព្រៃមានជម្រកប្រកបដោយសុវត្ថិភាព។
លោកបន្តទៀតថា ចំពោះករណីបទល្មើសធនធានធម្មជាតិ គិតទាំងបទល្មើសបរបាញ់ និងដាក់អន្ទាក់ចាប់សត្វព្រៃ ដែលបានបង្ក្រាបនៅក្នុងតំបន់ការពារធម្មជាតិទាំង ៦ ក្នុងឆ្នាំ ២០២១ មានចំនួនសរុប ១ ១៤១ ករណី ក្នុងនោះបានបញ្ជូនសំណុំរឿងទៅតុលាការចំនួន ៧៩ ករណី ជាមួយជនល្មើស ៩០ នាក់។ ប៉ុន្តែនៅក្នុងឆមាសទី ១ ដើមឆ្នាំ ២០២២ ការបរបាញ់ និងការដាក់អន្ទាក់ចាប់សត្វព្រៃបានថយចុះប្រហែលជា ៧៥ ភាគរយ បើធៀបទៅនឹងឆ្នាំ ២០២១៕