ភ្នំពេញៈ ក្រសួងសាធារណការ និងដឹកជញ្ជូនបានទទួលរបាយការណ៍ចំនួន ៦ ០០០ ករណីអំពីការខូចខាតផ្លូវ ដូចជា ជង្ហុកសម្បុកមាន់ ដែលប្រជាពលរដ្ឋបានផ្ដល់តាមរយៈកម្មវិធីថែទាំងផ្លូវ ឬ ROAD CARE Mobile App ដែលជាកម្មវិធីស្មាតហ្វូនបានដាក់ឱ្យប្រើប្រាស់ចាប់តាំងពីឆ្នាំ ២០១៨ ដើម្បីជាព័ត៌មានសម្រាប់ជួសជុលថែទាំផ្លូវនៅទូទាំងប្រទេស។
អ្នកប្រើកម្មវិធីនេះ ដោយគ្រាន់តែថតរូបភាពនៃបញ្ហាផ្លូវថ្នល់ ភ្ជាប់ជាមួយទីតាំងច្បាស់លាស់ដែលកើតមានបញ្ហាផ្លូវខូច រួចបញ្ជូនតាមរយៈកម្មវិធីថែទាំផ្លូវជាការស្រេច។ កម្មវិធីនេះ ត្រូវបានក្រសួងសាធារណការ និងដឹកជញ្ចូន ដាក់ឱ្យប្រើប្រាស់កាលពីថ្ងៃ ទី ១៣ ខែធ្នូ ឆ្នាំ ២០១៨។
លោក ហ៊ាង សុទ្ធាយុទ្ធ អ្នកនាំពាក្យ និងជាប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈនៃក្រសួងសាធារណការ និងដឹកជញ្ចូន បានប្រាប់ភ្នំពេញប៉ុស្តិ៍នៅថ្ងៃទី ២៨ ខែសីហាថា ចាប់តាំងពីខែធ្នូ ឆ្នាំ ២០១៨ រហូតមកដល់ ខែកក្កដា ឆ្នាំ ២០២២ ក្រសួងបានទទួលការរាយការណ៍បង្ហាញពីផ្លូវ តាមរយៈ កម្មវិធីនេះ ចំនួន ៥ ៩២២ របាយការណ៍។
លោកបន្តថា ក្រសួងបានសហការជាមួយអាជ្ញាធរមូលដ្ឋាន ដោះស្រាយបានទាន់ពេលវេលា ខណៈការាយការណ៍មួយចំនួនទៀត ត្រូវបានដាក់បញ្ចូលក្នុងផែនការនៃការអភិវឌ្ឍ ដែលទាមទារឱ្យមានការដោះស្រាយនៅពេលបន្ទាប់។
លោកបានបញ្ជាក់ថា៖ «យើងនិយាយពីប្រសិទ្ធភាពការងារ បានជំរុញឱ្យការងារថែទាំផ្លូវហ្នឹង ល្អប្រសើរច្រើន។ ល្អប្រសើរច្រើននេះ គឺសំដៅទៅលើការដោះស្រាយជាអាទិភាពជូនប្រជាពលរដ្ឋ មិនមែនមានន័យថា ធ្វើឱ្យដោះស្រាយបានបញ្ហាទាំងស្រុងទេ។ ជាធម្មតានៅពេលយើងទទួលបានមតិយោបល់ពីប្រជាពលរដ្ឋ យើងត្រូវយកចិត្តទុកដាក់ ដូច្នេះការដែលក្រសួងទទួលបានការរាយការណ៍ពីប្រជាពលរដ្ឋតាមរយៈ Mobile App នេះ គឺបានធ្វើឱ្យយើង មើលឃើញពីបញ្ហារបស់ប្រជាពលរដ្ឋ»។
លោក ហ៊ាង សុទ្ធាយុទ្ធ ថ្លែងថា Mobile App មានគោលបំណង់ក្នុងការដោះស្រាយបញ្ហាផ្លូវជង្ហុកសម្បុកមាន់។ ដូច្នេះបញ្ហាដែលពលរដ្ឋរាយការណ៍ជាទូទៅ គឺបានចូលរួមចំណែកឱ្យក្រសួងរៀបចំផែនការណ៍សម្រាប់អនុវត្តនៅពេលបន្ទាប់ចំពោះបញ្ហាផ្លូវមួយចំនួន ដែលពលរដ្ឋបានរាយការណ៍មក។ លោក ទទួលស្គាល់ថា បញ្ហាដែលទទួលបានពីប្រជាពលរដ្ឋ ១ ចំនួន មានការឆ្លើយតបមិនទាន់ពេលវេលា ព្រោះក្រសួង ត្រូវការពេលវេលា ក្នុងការដោះស្រាយជូនពលរដ្ឋ។
លោកបានបញ្ជាក់ថា៖ «យើងនិយាយជារួម កម្មវិធីនេះ មានចំណុចល្អប្រសើរច្រើនហើយរវាងការគ្មានកម្មវិធី និងមានកម្មវិធី។ ប៉ុន្តែបញ្ហាប្រឈមក៏យើងនៅតែមានដែរ អាស្រ័យទៅលើកត្តា ការរាយការណ៍នេះ យើងដោះស្រាយបានលឿនកម្រិតណា ព្រោះបើបញ្ហាយើងដោះស្រាយមិនលឿនទេ ក៏ជាចំណុចដែលមិនល្អប្រសើរដែរ តែវាក៏ជាចំណុចមួយ ជាមូលដ្ឋានសម្រាប់យើងធ្វើឱ្យមានភាពប្រសើរឡើងក្នុងពេលខាងមុខ»។
កាលពីថ្ងៃទី ២៨ សីហា ក្រសួងសាធារណការ និងដឹកជញ្ចូន បានប្រកាសនៅក្នុងទំព័រហ្វេសប៊ុករបស់ខ្លួន ដោយបានអំពាវនាវឱ្យប្រជាពលរដ្ឋរាយការណ៍ពីបញ្ហាផ្លូវជង្ហុកសម្បុកមាន់បានភ្លាមៗតាមរយៈកម្មវិធីទូរស័ព្ទស្មាតហ្វូនមួយដែលមានឈ្មោះថា កម្មវិធីថែទាំផ្លូវ (ROAD CARE Mobile App) ។ ក្រសួងបានអះអាងថា កម្មវិធីនេះអាចជួយសម្រួលឱ្យមានភាពងាយស្រួលក្នុងការរាយការណ៍ និងផ្ដល់ព័ត៌មានបានលឿនរហ័សដល់មន្ត្រីមានសមត្ថកិច្ចក្នុងការជួសជុលផ្លូវឱ្យបានទាន់ពេលវេលា។
លោក គឹម បញ្ហា នាយកអង្គការមូលនិធិបង្ការរបួសអាស៊ីប្រចាំនៅកម្ពុជា បានថ្លែងដោយចាត់ទុកការបង្កើតកម្មវិធីនេះ គឺជាគំនិតល្អ ហើយក្រសួង គួរតែធ្វើការពិនិត្យមើលយន្តការក្នុងការឆ្លើយតបចំពោះមតិចូលរួមរបស់ប្រជាពលរដ្ឋ ឱ្យបានកាន់តែមានសកម្មភាព និងប្រសិទ្ធភាពជាងនេះ ដើម្បីឱ្យប្រជាពលរដ្ឋបានមើលឃើញពីសារៈប្រយោជន៍នៃកម្មវិធីនេះ។ លោកថា នៅពេលដែលពលរដ្ឋ បានមើលឃើញនូវការចូលរួមចំណែករបស់ខ្លួនបានចូលរួមចំណែកក្នុងការកែប្រែជាវិជ្ជមាននោះ នឹងនាំឱ្យប្រសិទ្ធនៃការធ្វើការ និងការបង្កើតកម្មវិធីទាំងនេះ មានប្រសិទ្ធភាព និងកាន់តែមានតម្លៃ។
លោក គឹម បញ្ញា ថ្លែងថា ក្រសួងក៏គួរធ្វើការផ្សព្វផ្សាយអំពីលទ្ធផលដែលបានដោះស្រាយជាសាធារណៈនៅលើទំព័ហ្វេសប៊ុក និងធ្វើការឆ្លើយតបឱ្យមានប្រសិទ្ធភាព ជាពិសេសធ្វើការផ្សព្វផ្សាយទៅកាន់ក្រុមយុវជនដែលមានរចនាសម្ព័ន្ធហើយស្រាប់នៅកម្ពុជា។
លោក បានបញ្ជាក់ថា៖ «ដើម្បីជំរុញឱ្យមានមតិចូលរួមពីពលរដ្ឋឱ្យបានសកម្ម ខ្ញុំ គិតថា ក្រសួងសាធារណការ ដែលភាគច្រើនផ្លូវដែលក្រសួងគ្រប់គ្រង គឺផ្លូវជាតិ ឬផ្លូវធំៗ ហើយបើអាចបាន ក្រសួងគួរតែផ្តោតទៅលើក្រុមយុវជន តាមរយៈការផ្សព្វផ្សាយ និងការបណ្តុះបណ្តាលដល់យុវជនរបស់យើង ដែលមានរចនាសម្ព័ន្ធស្រាប់ ដូចជាកាកបាទក្រហម យុវជនកាយឫទ្ធិ និងយុវជនសហភាពសហព័ន្ធយុវជនឱ្យគាត់យល់ ពីរបៀបប្រើ ដើម្បីចូលរួមជាមតិយោបល់»៕