ភ្នំពេញៈ ប្រជាសហគមន៍នេសាទទួលស្នួល បន្តសហការជាមួយកម្លាំងអធិការដ្ឋាននគរបាលស្រុកក្រូចឆ្មារ ចុះបង្ក្រាបបទល្មើសជលផលនៅចំណុចបឹងខ្លុយ ដែលកំពុងកើតមានយ៉ាងអនាធិបតេយ្យ។ នេះបើតាម មន្ត្រីនគរបាលមូលដ្ឋាន។
លោក ខេ សេងហាក់ នាយនគរបាលប៉ុស្តិ៍ទួលស្នួល បានប្រាប់ ភ្នំពេញ ប៉ុស្តិ៍ នៅថ្ងៃទី ២៩ ខែសីហាថា ដើម្បីចូលរួមចំណែកក្នុងកិច្ចការពារ ធនធានជលផលនៅកម្ពុជា ក្រុមកម្លាំងនគរបាលរដ្ឋបាលប៉ុស្តិ៍ទួលស្នួល បានពង្រឹងកិច្ចសហការជាមួយក្រុមគណៈកម្មការសហគមន៍នេសាទទួលស្នួល ចុះបង្ក្រាបបទល្មើសនេសាទជាបន្តបន្ទាប់ នៅក្នុងភូមិសាស្ត្ររបស់ខ្លួន។
លោកបានបន្តថា កាលពីថ្ងៃទី ២៨ ខែ សីហា ឆ្នាំ ២០២២ ក្រុមការងាររបស់លោក បានសហការជាមួយក្រុមគណៈកម្មការសហគមន៍នេសាទទួលស្នួល ចុះស្រាវជ្រាវនិងបង្ក្រាបបទល្មើសជលផល ១ កន្លែង នៅចំណុចបឹងខ្លុយ ជាប់ព្រំប្រទល់ឃុំរកាពរប្រាំ ស្ថិតក្នុងភូមិមុខភ្នំ ឃុំទួលស្នួល ស្រុកក្រូចឆ្មារ ខេត្តត្បូងឃ្មុំ។
លោក សេងហាក់ បានបញ្ជាក់ថា៖ «ក្នុងប្រតិបត្តិការនោះ ក្រុមការងារយើងបានរុះរើនិងបំផ្លាញចោលឧបករណ៍នេសាទ ប្រភេទលូស្បៃមុងចំនួន ៨ មាត់ របាំងព្រួលធ្វើពីឫស្សី ប្រវែង ៥៨០ ម៉ែត្រ និង ដោះលែងកូនត្រីចម្រុះប្រភេទសរុបជាង ២០ គីឡូក្រាមចូលទៅក្នុងបឹងធម្មជាតិវិញ»។
បើតាមលោក សេងហាក់ នៅក្នុងរដូវត្រីពងកូននេះ បទល្មើសនេសាទបានកើតឡើងដោយអន្លើ នៅតាមបណ្ដាភូមិសាស្ត្រដាច់ស្រយាលមួយចំនួន ដែលមានបឹង ស្ទឹង ព្រែក និងដងអូរ ជាពិសេសក្នុងតំបន់ទំនាបព្រៃលិចទឹក។
ស្រដៀងគ្នានេះ តំណាងសហគមន៍នេសាទទួលស្នួល លោក ជីវ សុផៃ បានប្រាប់ ភ្នំពេញ ប៉ុស្តិ៍ថា នៅក្នុងរដូវត្រីពងកូន ការនេសាទត្រូវបានហាមឃាត់។ ប៉ុន្តែក្រុមជនប្រព្រឹត្តបទល្មើសនេសាទ នៅតែបន្តលួចធ្វើសកម្មភាពនេសាទត្រីខុសច្បាប់ ដោយប្រើប្រាស់ឧបករណ៍លូស្បៃមុង លបកន្ទុយកណ្ដុរ លបយក្ស ដែលមានរបាំងព្រួលវែងៗរាប់រយម៉ែត្រ។
លោកថ្លែងថា៖ «បើក្នុងរដូវត្រីពងកូននេះ យើងអាចការពារមិនឱ្យមានបទល្មើសនេសាទកើតឡើង នោះនៅក្នុងបឹង ស្ទឹង ព្រែក និងដងអូរនានានឹងសម្បូរត្រី»។
បើតាមលោក សុផៃ នៅក្នុងរដូវត្រីពងកូននេះ ថ្វីដ្បិតតែមានការហាមឃាត់តឹងរ៉ឹងចំពោះការនេសាទបែបពាណិជ្ជកម្ម ប៉ុន្តែរដ្ឋបាលជលផល បានអនុញ្ញាតឱ្យពលរដ្ឋ នេសាទត្រី ជាលក្ខណៈគ្រួសារ ដោយប្រើឧបករណ៍សំណាញ់ សន្ទូចបង្កៃផ្លែ១ និងតុម្ព សម្រាប់ដោះស្រាយជីវភាពរស់នៅប្រចាំថ្ងៃផងដែរ។
ជុំវិញករណីបទល្មើសនេសាទក្នុងរដូវត្រីពងកូននេះផងដែរ ប្រធានរាជបណ្ឌិត្យសភាកម្ពុជា លោក សុខ ទូច បានអះអាងថា ការនេសាទខុសច្បាប់នៅរដូវហាមឃាត់កំពុងកើតឡើងជាទ្រង់ទ្រាយធំនៅតំបន់បឹងទន្លេសាប ជាពិសេសក្នុងភូមិសាស្ត្រខេត្តពោធិ៍សាត់ និងខេត្តកំពង់ធំ។ឮ
តាមរបាយការណ៍ ដែលត្រូវបានចុះផ្សាយជាសាធារណៈ កាលពីថ្ងៃសៅរ៍ (២៧-០៨-២០២២) លោក សុខ ទូច បានបង្ហាញពីបញ្ជីឈ្មោះបុគ្គលប្រព្រឹត្តបទល្មើសនេសាទចំនួន៥៥នាក់ ដែលបានលួចរាយលូស្បៃមុងចាប់ត្រីជាទ្រង់ទ្រាយធំ ដោយក្នុងនោះ ៣៩ នាក់ ប្រព្រឹត្តសកម្មភាពក្នុងភូមិសាស្ត្រឃុំកំពង់លួង និងឃុំអន្សាចំបក់ ក្នុងស្រុកក្រគរ ខេត្តពោធិ៍សាត់ មានរបាំងសាច់អួនចំនួន ៤៧ ខ្សែ។ ដោយឡែក ១៦ នាក់ទៀត ប្រព្រឹត្តក្នុងភូមិសាស្ត្រ ឃុំផាត់សណ្តាយ ស្រុកកំពង់ស្វាយ ខេត្តកំពង់ធំ។
ទន្ទឹមនឹងនេះលោកបានព្រមានចាត់វិធានការតាមផ្លូវច្បាប់ ដោយគ្មានការលើកលែង ប្រសិនបើក្រុមជនប្រព្រឹត្តបទល្មើសនេសាទទាំងនោះ មិនបញ្ឈប់សកម្មភាពល្មើសច្បាប់របស់ពួកគេ។
លោកបានបញ្ជាក់ថា៖ «ក្នុងករណីក្រុមស្រាវជ្រាវនៃរាជបណ្ឌិត្យសភាកម្ពុជា ចុះទៅឃើញប្រព្រឹត្តជាលើកទី២ យើងខ្ញុំនឹងស្នើសុំដីកា[តុលាការ]ចាប់បញ្ជូនខ្លួនទៅចាត់ការតាមនីតិវិធីច្បាប់»។
បើតាមលោក សុខ ទូច ការនេសាទខុសច្បាប់ក្នុងតំបន់បឹងទន្លេសាប ក្នុងភូមិសាស្ត្រខាងលើនេះ គឺក្រុមជនប្រព្រឹត្តបទល្មើស បានរាយលូស្បៃមង់ ព័ទ្ធព្រៃលិចទឹកជាលក្ខណៈទ្រង់ទ្រាយធំមានប្រវែងរាប់គីឡូដី។
ជុំវិញករណីនេះ លោក ជិន ស៊ីថា នាយខណ្ឌរដ្ឋបាលខេត្តកំពង់ធំមិនអាចទាក់ទងស្នើសុំការអធិប្បាយ បានទេ កាលពីថ្ងៃទី ២៩ ខែ សីហា ឆ្នាំ ២០២២ ជុំវិញការចាត់វិធានការប្រឆាំង ទៅលើក្រុមជនប្រព្រឹត្តបទល្មើសនេសាទនៅក្នុងភូមិសាស្ត្រស្រុកកំពង់ស្វាយ ទាំង ១៦ នាក់ ដែលលោក សុខ ទូច បានបង្ហាញ។
លោក ភុំ វិមល នាយខណ្ឌជលផលខេត្តពោធិ៍សាត់ បានប្រាប់ ភ្នំពេញ ប៉ុស្តិ៍ថា ក្រុមការងាររបស់លោកបានចុះធ្វើការអប់រំណែនាំដល់ប្រជានេសាទទាំងនោះ ឱ្យធ្វើកិច្ចសន្យាបញ្ឈប់ធ្វើសកម្មភាពល្មើសច្បាប់ និងបានដាក់កំហិតឱ្យក្រុមប្រជានេសាទទាំងនោះ ធ្វើការរុះរើឧបករណ៍របស់ខ្លួនឱ្យអស់មុនថ្ងៃទី ៣១ ខែសីហា បើពុំនោះក្រុមការងាររបស់លោក នឹងចុះអនុវត្តវិធានការរដ្ឋបាល តាមច្បាប់ជលផលដោយគ្មានការលើកលែងឡើយ។
លោកបានបញ្ជាក់ថា៖ «ក្រុមការងាររបស់យើង បានចុះអប់រំណែនាំ ប្រជានេសាទដែលមានឈ្មោះនៅក្នុងបញ្ជីនោះនិងបានឱ្យពួកគាត់ធ្វើកិច្ចសន្យាបញ្ឈប់សកម្មភាពល្មើសច្បាប់នោះរួចរាល់ហើយ ក្នុងករណីពួកគាត់មិនអនុវត្តតាមការណែនាំ សមត្ថកិច្ចយើងនឹងចាត់វិធានការតាមនីតិវិធីច្បាប់ ដោយគ្មានការលើកលែងឡើយ»។
កាលពីថ្ងៃទី ៣០ ខែ ឧសភា ឆ្នាំ ២០២២ រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានចេញសេចក្តីជូនដំណឹង ចំពោះរដូវបិទនេសាទទឹកសាបនៅឆ្នាំនេះ ចាប់ផ្តើមពីថ្ងៃទី ១ ខែមិថុនា ដល់ថ្ងៃទី ៣០ ខែ កញ្ញា ឆ្នាំ ២០២២ សម្រាប់ខេត្តជាប់បឹងទន្លេសាប និងទន្លេមេគង្គលើ រហូតដល់១ផ្នែកនៃរាជធានីភ្នំពេញ និងខេត្តកណ្តាល ដែលស្ថិតនៅខាងជើងខ្សែស្របទន្លេចតុមុខ។ ចំណែក រដូវបិទនេសាទត្រូវធ្វើឡើងចាប់ពីថ្ងៃទី ១ ខែកក្កដា ដល់ថ្ងៃទី ៣១ ខែតុលា សម្រាប់ខេត្តព្រៃវែង ស្វាយរៀង តាកែវ ខេត្តកំពង់ស្ពឺ និង ១ ផ្នែកនៃរាជធានីភ្នំពេញ និងខេត្តកណ្ដាលដែលស្ថិតនៅខាងត្បូងខ្សែស្របទន្លេចតុមុខ។
រដ្ឋបាលជលផលបញ្ជាក់ថា នៅក្នុងរយៈពេលបិទនេសាទនេះ អ្នកនេសាទទាំងអស់ត្រូវប្រើតែឧបករណ៍នេសាទលក្ខណៈគ្រួសារដែលមានចែងក្នុងប្រកាសចុះថ្ងៃទី ២២ ខែ តុលា ឆ្នាំ ២០១២ ដូចជា ឧបករណ៍ លប សំណាញ់ មង សន្ទូចផ្លែ ១ តុម្ព អង្រុត និងឧបករណ៍មួយចំនួនទៀតដែលច្បាប់អនុញ្ញាត៕