.jpg)
នគរបាលបង្ហាញជនជាតិចិនដែលត្រូវបានសង្គ្រោះ។ រូបថត សហការី
ឧត្តរមានជ័យៈ បុរសជនជាតិចិន ៤ នាក់ ត្រូវបានកម្លាំងជំនាញនៃស្នងការដ្ឋាននគរបាលខេត្តឧត្តរមានជ័យ ចុះអន្ដរាគមន៍ជួយរំដោះ ចេញពីទីតាំងក្រុមហ៊ុនអូរស្មាច់រីសត ក្រោយប្រជាពលរដ្ឋរាយការណ៍មកកាន់សមត្ថកិច្ច តាមប្រព័ន្ធទូរស័ព្ទ Hotline ១១៧ ដោយប្រាប់ថា ពួកគេត្រូវបានគេចាប់បង្ខាំង ឱ្យធ្វើការនៅទីនោះ មិនឱ្យត្រឡប់ទៅជួបជុំក្រុមគ្រួសារក្នុងប្រទេសចិន។
លោក ហ៊ួត សុធី ស្នងការនគរបាលខេត្តឧត្តរមានជ័យ បានប្រាប់ ភ្នំពេញ ប៉ុស្តិ៍ថា នៅរសៀលថ្ងៃទី ២៨ ខែ សីហា ឆ្នាំ ២០២២ ក្រុមការងារមជ្ឈមណ្ឌលប្រចាំបញ្ជានៃអគ្គស្នងការដ្ឋាននគរបាលជាតិ បានទទួលព័ត៌មានពីករណី«ចាប់បង្ខាំមនុស្ស» នៅចំណុចក្រុមហ៊ុនអូរស្មាច់រីសត ក្នុងភូមិអូរស្មាច់ សង្កាត់អូរស្មាច់ ក្រុងសំរោង ខេត្តឧត្ដរមានជ័យ។ បន្ទាប់ពីទទួលបានបទបញ្ជាពីអគ្គស្នងការនគរបាលជាតិ លោកបានចាត់ឱ្យមន្ត្រីនគរបាលជំនាញ ចុះធ្វើការស្រាវជ្រាវភ្លាមៗ ដោយមានកិច្ច សហការពីម្ចាស់ទីតាំងក្រុមហ៊ុនអូរស្មាច់រីសត ហើយបានជួយរំដោះបុរសជនជាតិចិនរងគ្រោះ នៅក្នុងករណីនោះចំនួន ៤ នាក់។
លោកបានបញ្ជាក់ថា៖ «ប៉ុន្តែតាមរយៈការបំភ្លឺរបស់បុរសជនជាតិចិនទាំង ៤ នាក់នោះ ករណីរបស់ពួកគេ មិនមែនជាករណីបង្ខាំងចាប់ជំរិតនោះទេ»។
លោកបានបន្ថែមថា៖ «ពួកគេគ្មានការរងទារុណកម្ម ឬការគំរាមកំហែងអ្វីឡើយ គឺគ្រាន់តែតម្រូវឱ្យធ្វើការច្រើនម៉ោងនឿយហត់ចង់ឈប់ពីការងារដោយខ្លួនឯង ក្នុងនោះមានម្នាក់ចង់ទៅផ្ទះជួបប្រពន្ធដែលជិតសម្រាលកូន»។
បច្ចុប្បន្ន កម្លាំងនគរបាលជំនាញ កំពុងរៀបចំសំណុំឯកសារ និងកសាងនីតិវិធី បញ្ជូនពួកគេទៅកាន់អគ្គនាយកដ្ឋាននគរបាលអន្តោប្រវេសន៍ ដើម្បីអនុវត្តបន្ត។
ជាមួយគ្នានោះ អគ្គស្នងការដ្ឋាននគរបាលជាតិក៏បានអំពាវនាវឱ្យប្រជាជនទូទាំងប្រទេស និងគ្រប់មជ្ឈដ្ឋានទាំងអស់ សូមចូលរួមសហការលុបបំបាត់អំពើជួញដូរមនុស្ស បង្ខាំងមនុស្សខុសច្បាប់គ្រប់ទម្រង់ ដោយទាក់ទងមកលេខ Hotline ១១៧ ខណៈដែលបច្ចុប្បន្នមជ្ឈមណ្ឌលប្រចាំបញ្ជា ១១៧ បានបន្ថែមមន្ត្រីនគរបាលជាតិប្រចាំការ ដែលចេះនិយាយភាសារអង់គ្លេស ចិន និងភាសារវៀតណាម។
លេខទូរស័ព្ទ Hotline ១១៧ នេះ គឺជាមជ្ឈមណ្ឌលប្រចាំបញ្ជារបស់អគ្គស្នងការដ្ឋាននគរបាលជាតិ ដែលរង់ចាំទទួលនិងឆ្លើយតបភ្លាមៗ នៅពេលទទួលបានសេចក្ដីរាយការណ៍សុំជំនួយពិតប្រាកដពីនគរបាលជាតិ ដូចជាបទល្មើសព្រហ្មទណ្ឌ គ្រោះថ្នាក់ចរាចរណ៍, គ្រោះអគ្គិភ័យ ឬភាពអសកម្មមួយចំនួនរបស់មន្ដ្រីនគរបាលនៅតាមមូលដ្ឋានជាដើម ។
ប្រជាពលរដ្ឋអាចទូរស័ព្ទចូលលេខ ១១៧ មិនអស់ថ្លៃសេវានោះទេ ទោះបីជាទឹកប្រាក់ក្នុងគណនីអស់ក៏អាចទូរស័ព្ទចូលបានដែរ៕
