សៀមរាបៈ ក្រុមការងាររបស់ក្រសួងបរិស្ថាន និងអាជ្ញាធរជាតិអប្សរាបានរៀបចំដីឡូត៍នៅតំបន់អភិវឌ្ឍន៍រុនតាឯកបានទំហំ ៩៥ ហិកតាហើយ គិតចាប់ពីថ្ងៃទី ១៨ ដល់ថ្ងៃទី ២៨ ខែសីហា។ ចំណែកការស្ថាបនាផ្លូវក្រួសក្រហមដោយកងវិស្វកម្មតេជោ ហ៊ុន សែន សៀមរាបក្នុងភូមិធម្មជាតិរុនតាឯកសម្រេចបានប្រវែង ២ ៨៥០ ម៉ែត្រ។ នេះបើតាមលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់។
លោក ជា សុផារ៉ា បានឱ្យដឹងតាមរយៈហ្វេសប៊ុករបស់លោកនៅថ្ងៃទី ២៩ ខែសីហាថា៖ «គិតត្រឹមថ្ងៃទី ២៨ ខែសីហា ការរៀបចំដីឡូត៍នៅតំបន់អភិវឌ្ឍន៍រុនតាឯក សម្រាប់ប្រជាពលរដ្ឋដែលស្ម័គ្រចិត្តរុះរើសំណង់ខុសច្បាប់មកតាំងទីលំនៅថ្មី អនុវត្តដោយក្រុមការងាររបស់ក្រសួងបរិស្ថាន និងអាជ្ញាធរជាតិអប្សរាបានទំហំ ៩៥ ហិកតា»។
លោករដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់បានឱ្យដឹងទៀតថា ដោយឡែកការស្ថាបនាផ្លូវក្រួសក្រហមដោយកងវិស្វកម្មតេជោ ហ៊ុន សែន សៀមរាប ក្នុងតំបន់ទី ១ និងតំបន់ទី ២ ក្នុងភូមិធម្មជាតិរុនតាឯក សម្រេចបានប្រវែង ២ ៨៥០ ម៉ែត្រស្មើនឹង ១៦,៨៧ ភាគរយនៃប្រវែងផ្លូវដែលត្រូវស្ថាបនាសរុប ១៦ ៨៨៧ ម៉ែត្រ។
ជាមួយនេះ លោក ជា សុផារ៉ា ក៏បានថ្លែងអំណរគុណចំពោះសប្បុរសជនដែលបានឧបត្ថម្ភកូនឈើប្រណីតចំនួន ៦ ០០០ ដើមជូនដល់អាជ្ញាធរជាតិអប្សរាផងដែរ។ ដើមឈើទាំងនោះផ្តល់ជូនដោយមន្ត្រី អនុប្រធានការិយាល័យបច្ចេកទេស សុរិយោដី និងភូមិសាស្ត្រនៃមន្ទីររៀបចំដែនដី នគរូបនីយកម្មសំណង់ និងសុរិយោដីរាជធានីភ្នំពេញ និងមន្ទីររៀបចំដែនដីនៃខេត្តបន្ទាយមានជ័យ តាកែវ កំពត កំពង់ឆ្នាំង និងខេត្តមណ្ឌលគិរី ដែលមានកូនឈើធ្នង់ និងកូនគ្រញូងកម្ពស់ ២ ម៉ែត្រ។
លោក ហាយ យុង តំណាងក្រុមការងារតម្រង់ទិសបានឱ្យដឹងនៅថ្ងៃទី ២៩ ខែសីហាថា ក្រុមការងារលោកបាននិងកំពុងបន្តយុទ្ធនាការចុះវាស់វែង កំណត់និយាមកាក្បាលដី និងអត្តសញ្ញាណអ្នកកាន់កាប់ដី និងសំណង់ខុសច្បាប់ក្នុងតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា។
លោកបានឱ្យដឹងថា សំណង់រឹងខុសច្បាប់ក្នុងតំបន់ទាំងនោះ ត្រូវរុះរើចេញដោយខ្លួនឯង ហើយអ្នកដែលគ្រប់លក្ខខណ្ឌ និងស្ម័គ្រចិត្តរុះរើចេញអាចចាប់ឆ្នោតយកទីតាំងដីនៅតំបន់រុនតាឯក។ លោកបញ្ជាក់ថា ករណីក្បាលដីដែលប្រជាពលរដ្ឋអាស្រ័យផលនឹងមិនត្រូវបានដកហូតនោះទេ ពោលគឺពលរដ្ឋអាចនៅបន្តអាស្រ័យផលទៀតបាន ដូចជា ដីធ្វើស្រែជាដើម។
លោកថ្លែងថា៖ «អ្នកដែលមានសំណង់ទើបមានសិទ្ធិមកចាប់ឆ្នោត ដើម្បីទទួលយកដីឡូត៍ ហើយរុះរើសំណង់ដែលមាននៅជុំវិញប្រាសាទអង្គរទៅរស់នៅឯរុនតាឯក។ ដោយឡែកចំពោះបងប្អូន ដែលមានតែដីអាស្រ័យផល ដូចជា បង្កបង្កើនផលស្រូវ ដំណាំអីនោះ ជាគោលការណ៍គឺគាត់នៅតែមានសិទ្ធិបន្តអាស្រ័យផលដដែល តែមិនអាចសាងសង់សំណង់អីផ្សេងៗបានទេ»។
សូមរំឭកថា ក្នុងពេលបើកយុទ្ធនាការនេះ លោក ជា សុផារ៉ា បានជំរុញដល់ពលរដ្ឋដែលសង់សំណង់ខុសច្បាប់ក្នុងតំបន់រមណីយដ្ឋានអង្គរឱ្យប្រញាប់រុះរើចេញដោយខ្លួនឯង ជាជាងការប្រើប្រាស់កម្លាំងអាជ្ញាធរចុះរុះរើ។ លោកថាក្នុងរមណីយដ្ឋានអង្គរមានសំណង់ខុសច្បាប់ប្រមាណជាង ៨ ពាន់សំណង់ ដែលជាសំណង់ដ៏គួរឱ្យខ្មាសអៀន។
លោក ជា សុផារ៉ា ដែលក៏ជាប្រធានក្រុមការងារតម្រង់ទិស ដើម្បីដោះស្រាយបញ្ហាសំណង់ខុសច្បាប់ និងដីធ្លីតំបន់រមណីយដ្ឋានអង្គរ និងតំបន់ដទៃទៀតដែលស្ថិតក្រោមការគ្រប់គ្រងរបស់អាជ្ញាធរជាតិអប្សរាដែរនោះបានគូសបញ្ជាក់ថា យុទ្ធនាការនេះ មានគោលដៅការពារតំបន់រមណីយដ្ឋានអង្គរដែលបានចុះបញ្ជីក្នុងសម្បត្តិបេតិកភណ្ឌពិភពលោកឆ្នាំ ១៩៩២ មានទំហំ ៤០១ គីឡូម៉ែត្រការ៉េ ជាតំបន់ដែលចាត់ទុកជាសម្បត្តិសាធារណៈរបស់រដ្ឋត្រូវរក្សាការពារដាច់ខាត មិនអាចកាត់ឆ្វៀលបានឡើយ។
លោកបញ្ជាក់ថា៖ «កម្ពុជាក្នុងនាមរដ្ឋសមាជិកមានភារកិច្ចរក្សាការពារតំបន់រមណីយដ្ឋានអង្គរដែលជាមរតកកេរដូនតា ជាអត្តសញ្ញាណ និងដួងព្រលឹងរបស់ជាតិក៏ដូចជា តម្លៃជាសកលនៃសម្បត្តិបេតិកភណ្ឌពិភពលោក សម្រាប់មនុស្សជាតិទាំងមូល»៕