.jpg)
កន្លែងលក់ស៊ីមកាត ១ កន្លែងនៅក្រុងភ្នំពេញ ពីឆ្នាំ ២០១៩។ រូបថត ភ្នំពេញប៉ុស្តិ៍
ភ្នំពេញៈ ក្រសួងប្រៃសណីយ៍ និងទូរគមនាគមន៍ ទុកពេល ៦ ខែឱ្យក្រុមហ៊ុនប្រតិបត្តិករទូរស័ព្ទចល័តនៅកម្ពុជា លុបបំបាត់ការលក់ ឬចែកចាយស៊ីមកាតមិនយកឯកសារសម្គាល់អត្តសញ្ញាណពីអ្នកទិញ ដោយក្រសួងព្រមានចាត់វិធានការតាមច្បាប់ បើរឿងមិនប្រក្រតីនេះនៅបន្តកើតឡើង ខណៈត្រឹមខែឧសភា ឆ្នាំនេះ ការប្រើប្រាស់ស៊ីមកាតដែលបានចុះឈ្មោះមានជាង ១៩ លានស៊ីមកាត។
ការប្រកាសដាក់ឱសានវាទរយៈពេល ៦ ខែនេះបានធ្វើឡើង បន្ទាប់ពីទីស្ដីការគណៈរដ្ឋមន្ត្រីបានចេញលិខិតជាផ្លូវការឱ្យក្រសួងប្រៃសណីយ៍ និងទូរគមនាគមន៍ចាត់វិធានការលុបបំបាត់ការប្រើប្រាស់ឯកសារសម្គាល់អត្តសញ្ញាណក្រោមឈ្មោះតែម្នាក់ សម្រាប់អ្នកប្រើរាប់រយនាក់។
លោក សូ វិសុទ្ធី អ្នកនាំពាក្យក្រសួងប្រៃសណីយ៍ និងទូរគមនាគមន៍ប្រាប់ភ្នំពេញប៉ុស្តិ៍នៅថ្ងៃទី ៣០ សីហាថា ការកំណត់រយៈពេល ៦ ខែនេះជាការកំណត់ថ្មីដែលទទួលបានការអនុញ្ញាតជាគោលការណ៍ពីរាជរដ្ឋាភិបាល ដើម្បីលុបបំបាត់ការលក់ ឬចែកចាយស៊ីមកាតដោយមិនយកឯកសារអត្តសញ្ញាណ និងការប្រើប្រាស់ឯកសារសម្គាល់អត្តសញ្ញាណក្រោមឈ្មោះបុគ្គលម្នាក់ សម្រាប់អ្នកប្រើប្រាស់រាប់រយនាក់។
លោកបញ្ជាក់ថា៖ «ការកំណត់រយៈពេល ៦ ខែនេះ គឺគិតចាប់ពីខែសីហា ឆ្នាំ ២០២២ នេះតទៅ។ បន្ទាប់ពីផុតការកំណត់រយៈពេល ៦ ខែនេះ ហើយបាតុភាពអសកម្មនេះនៅតែបន្ត ក្រសួង និងនិយតករ ទូរគមនាគមន៍នឹងសហការជាមួយ អាជ្ញាធរពាក់ព័ន្ធ ចាត់វិធានការតាមច្បាប់ និងលិខិតបទដ្ឋានគតិយុត្តជាធរមាន»។
ម្ចាស់ហាងលក់ទូរស័ព្ទ និងស៊ីមកាត ១ កន្លែងនៅរាជធានីភ្នំពេញដែលសុំមិនបញ្ចេញឈ្មោះប្រាប់ភ្នំពេញប៉ុស្តិ៍នៅថ្ងៃទី ៣០ សីហាថា ហាងរបស់លោកនៅតែទទួលបានការចែកចាយស៊ីមកាតដែលមិនតម្រូវឱ្យមានការផ្តល់អត្តសញ្ញាណពីអ្នកទិញ តាមរយៈភ្នាក់ងារលក់របស់ក្រុមហ៊ុនមួយចំនួន និងឈ្មួញកណ្តាល។
ម្ចាស់ហាងរូបនេះបន្តថា បច្ចុប្បន្នហាងរបស់លោកនៅតែបន្តលក់ស៊ីមកាតទាំងនេះ ដោយសារតែអតិថិជនភាគច្រើននៅតែស្វែងរកប្រភេទស៊ីមកាតដែលមិនតម្រូវឱ្យ បញ្ជាក់អត្តសញ្ញាណ ខណៈអតិថិជនដែលស្វែងរកស៊ីមកាតត្រឹមត្រូវហាក់មិនសូវមាននោះទេ។
លោកបញ្ជាក់ថា៖ «ស៊ីមកាតដែលខ្ញុំលក់មិនតម្រូវភ្ជាប់អត្តសញ្ញាណនេះ គឺមានតាមប្រភេទស៊ីម ព្រោះបើក្រុមហ៊ុនមិត្តហ្វូនតែម្តង គឺហាងយើងខ្ញុំទទួលពីភ្នាក់ងារក្រុមហ៊ុនផ្ទាល់។ ប៉ុន្តែបើស៊ីមផ្សេងទៀត គឺមានអ្នកបោះលក់បន្ត ហើយមានការចែកចាយនៅតាមហាងនីមួយៗ។ សំខាន់អ្នកទិញហ្នឹង គាត់រកតែប្រភេទហ្នឹង ដូចជាក្នុងហាងខ្ញុំ គឺពេលខ្លះ អ្នកទិញមុខដដែលៗ គាត់ប្រើហើយបោះចោលៗ»។
ទោះយ៉ាងណា ក្នុងនាមជាអ្នកលក់ម្នាក់ លោកគាំទ្រឱ្យក្រសួងប្រៃសណីយ៍ ចាត់វិធានការដោយស្មើភាពគ្នាចំពោះមុខច្បាប់ ក្នុងការលុបបំបាត់ការលក់ ឬចែកចាយស៊ីមកាតដោយមិនយកឯកសារសម្គាល់អត្តសញ្ញាណពីអ្នកទិញនេះ។
លោកនិយាយថា៖ «ខ្ញុំសាទរ បើសិនជាក្រសួងគាត់ធ្វើអ៊ីចឹងបានគ្រប់គ្នា គ្រប់កន្លែងទាំងអស់។ ដូចស៊ីម ដែលលក់នៅកន្លែងខ្ញុំ គឺអ្នកលក់ហ្នឹង គាត់មានអត្តសញ្ញាណប័ណ្ណ ១ គាត់ភ្ជាប់រាប់រយស៊ីម ហើយប្រាប់ពួកខ្ញុំថា មិនចាំបាច់ត្រូវការអត្តសញ្ញាណប័ណ្ណនោះទេ។ សូម្បីតែខ្ញុំ ជាអ្នកលក់បន្ត ក៏ខ្ញុំមិនដឹងថា កត្តានេះមកពីក្រុមហ៊ុន ឬក៏បុគ្គលណាដែរ។ អ៊ីចឹងអ្វីដែលជាសំណូមពររបស់ខ្ញុំ បើក្រសួងអាចលុបបំបាត់ទាំងស្រុងតែម្តង គឺជាការប្រសើរ»។
ភ្នំពេញប៉ុស្តិ៍ មិនអាចសុំអត្ថាធិប្បាយពីបណ្តាក្រុមហ៊ុនប្រតិបត្តិករទូរស័ព្ទចល័តនៅកម្ពុជាបានទេ នាថ្ងៃទី ៣០ សីហា។ ប៉ុន្តែ តាមរយៈការចុះផ្សាយដោយក្រសួងព័ត៌មានបានដកស្រង់សម្តី ប្រធានគ្រប់គ្រងផ្នែកលក់របស់ក្រុមហ៊ុនមិត្តហ្វូន (Metfone) ដែលមិនបានបញ្ចេញឈ្មោះថា ខ្លួនក៏កំពុងជំរុញសាជាថ្មីឱ្យអតិថិជនរបស់ខ្លួន ចុះឈ្មោះប្រើប្រាស់ស៊ីមកាតឱ្យបានត្រឹមត្រូវស្របតាមច្បាប់ មិនថាតាមរយៈភ្នាក់ងារ ឬចុះឈ្មោះតាមគេហទំព័រ និងកម្មវិធីអ៊ែបនោះទេ។
ប្រធានគ្រប់គ្រងផ្នែកលក់របស់ក្រុមហ៊ុនមិត្តហ្វូន (Metfone) រូបនេះបញ្ជាក់ថា៖ «ក្រុមហ៊ុនមិត្តហ្វូនតែងតែជំរុញលើកទឹកចិត្តឱ្យអតិថិជនរបស់ខ្លួនគោរពតាមច្បាប់ ពីព្រោះរដ្ឋាភិបាល ជាពិសេសក្រសួងប្រៃសណីយ៍ និងទូរគមនាគមន៍បានណែនាំឱ្យប្រតិបត្តិករទូរស័ព្ទចល័តទាំងអស់បញ្ចូលព័ត៌មានអតិថិជនរបស់ខ្លួន នៅពេលដែលពួកគាត់ទិញស៊ីមកាតថ្មី ឬធ្វើបច្ចុប្បន្នភាពព័ត៌មានរបស់អតិថិជនចាស់ៗរបស់ខ្លួនឱ្យបានត្រឹមត្រូវ និងហ្មត់ចត់»។
បើតាមលោក សូ វិសុទ្ធី គិតត្រឹមខែឧសភា ឆ្នាំ ២០២២ នេះ ចំនួនស៊ីមកាត ដែលត្រូវបានប្រើប្រាស់រាល់ថ្ងៃនៅកម្ពុជាមានប្រមាណ ១៩,៤៤ លានស៊ីមកាត។ ក្រសួងប្រៃសណីយ៍នៅតែបន្តជំរុញឱ្យពលរដ្ឋចូលរួមប្រើប្រាស់ស៊ីមកាតទាំងអស់នេះ ដោយធ្វើការចុះឈ្មោះឱ្យបានត្រឹមត្រូវ៕
