ព្រះវិហារៈ កម្ពស់ទឹកស្ទឹងសែនក្នុងទីរួមខេត្តព្រះវិហារនៅព្រឹកថ្ងៃទី ៣០ សីហា បានបន្ដហក់ឡើងដល់ ១២,៧២ ម៉ែត្រ លើសកម្រិតប្រកាសឱ្យប្រុងប្រយ័ត្នជាង ១,២២ ម៉ែត្រ។
លោក ចាប កុយ ប្រធានមន្ទីរធនធានទឹក និងឧតុនិយម ខេត្តព្រះវិហារប្រាប់ភ្នំពេញប៉ុស្តិ៍ថា នៅពេលនេះ ទឹកបានបន្តជន់លិចលំនៅឋានពលរដ្ឋមួយចំនួនបន្ថែមទៀតនៅភាគពាយព្យនៃក្រុងព្រះវិហារ ដែលជាតំបន់ទំនាបបាតខ្ទះ។
លោកថ្លែងថា៖ «ការជន់ឡើងនៃកម្ពស់ទឹកស្ទឹងសែននៅព្រះវិហារនាពេលនេះ គឺបណ្ដាលមកពីមានការបើករំដោះទឹកពីអាងទឹករក្សាក្នុងស្រុកជ័យសែន បន្ទាប់ពីទឹកក្នុងអាងនេះ ហក់ឡើងដល់កម្រិតកម្ពស់ ៤៤,៤៣ ម៉ែត្រ កាលពីថ្ងៃទី ២៩ ខែសីហា »។
បើតាមលោក ចាប កុយ អាងទឹករក្សាដែលទើបសាងសង់រួចរាល់ជាស្ថាពរកាលពីជាង ១ ខែមុនមានសមត្ថភាពផ្ទុកទឹកបានជាង ២៩៣ លានម៉ែត្រគុប។ បច្ចុប្បន្ន អាងទឹកនេះបានទទួលទឹកពីព្រែក អូរ នានា នៅផ្នែកខាងលើនៃក្បាលស្ទឹងសែនបានជាង ២៥៦ លានម៉ែត្រគុបហើយ ដែលបរិមាណនេះ តម្រូវឱ្យធ្វើការបើកបង្ហូរទឹកចេញខ្លះ ដើម្បីសម្រាលសម្ពាធទំនប់អាងទឹកនេះការពារការបាក់ស្រុត។
តាមការព្យាករអាកាសធាតុរបស់ក្រសួងធនធានទឹក និងឧតុនិយមចេញផ្សាយនៅថ្ងៃទី ៣០ ខែសីហា ប្រទេសកម្ពុជានៅបន្តទទួលរងឥទ្ធិពលនៃជ្រលងសម្ពាធទាបឥណ្ឌា និងខ្យល់មូសុងនិរតី ក្នុងកម្រិតពីខ្សោយទៅមធ្យម រួមទាំងប្រព័ន្ធសម្ពាធទាបដែលកំពុងអូសកាត់ភាគខាងជើងប្រទេសថៃ ឡាវ និងវៀតណាម ដែលអាចបង្កឱ្យមានភ្លៀងធ្លាក់ដោយអន្លើ ក្នុងកម្រិតពីខ្សោយទៅមធ្យម និងមានលាយឡំផ្គររន្ទះ។
លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយមថ្លែងថា នៅក្នុងរយៈពេលពេញ ១ សប្ដាហ៍នេះ ស្ថានភាពអាកាសធាតុនៅក្នុងខេត្តព្រះវិហារ ពុំមានភ្លៀងធ្លាក់ខ្លាំងនៅក្នុងតំបន់ផ្ទៃរងទឹកភ្លៀងនៃខេត្តនេះទេ។ លោកថា៖ «បើពិនិត្យទៅលើស្ថានភាពអាកាសធាតុបច្ចុប្បន្ន ជំនន់ទឹកស្ទឹងសែននៅក្នុងខេត្តព្រះវិហារក៏នៅមិនទាន់បង្កជាហានិភ័យអ្វីធ្ងន់ធ្ងរនោះដែរ ព្រោះទឹកនៅតាមអូរព្រំដែនភាគខាងលើក្បាលស្ទឹងនេះបានស្រកអស់ហើយ»។
យោងតាមគណៈកម្មាធិការជាតិគ្រប់គ្រងគ្រោះមហន្តរាយ ជំនន់ទឹកស្ទឹងសែន ក្នុងភូមិសាស្ត្រខេត្តព្រះវិហារគិតត្រឹមថ្ងៃទី ៣០ ខែសីហា បានធ្វើឱ្យខូចខាត និងប៉ះពាល់ដំណាំស្រូវចំនួន ៣ ២៦២ ហិកតា ដំណាំរួមផ្សំ ២ ០៨៣ ហិកតា និងផ្លូវលំជនបទមួយចំនួននៅក្នុងក្រុង-ស្រុកចំនួន ៤ និងធ្វើឱ្យប៉ះពាល់ពលរដ្ឋចំនួន ៤៨៧ គ្រួសារ៕