ភ្នំពេញៈ ក្នុងពិធីបើកការដ្ឋានសាងសង់ស្ពានអាកាសក្នុងរាជធានីភ្នំពេញចំនួន ២ បន្ថែមទៀតនៅការដ្ឋានស្ពានអាកាសព្រះមុនីវង្សនៅព្រឹកថ្ងៃទី ៣១ សីហាលោកនាយករដ្ឋមន្ត្រី ហ៊ុន សែន បានថ្លែងអំណរគុណដល់ប្រជាពលរដ្ឋដែលយល់ព្រមចាកចេញពីតំបន់អង្គរ ព្រោះបើមិនចាកចេញហើយបន្តនៅដោយខុសច្បាប់ នោះអង្គរវត្តនឹងត្រូវគេដកចេញពីបេតិកភណ្ឌពិភាពលោក។
លោកនាយករដ្ឋមន្ត្រីថ្លែងថា៖ «ប្រជាពលរដ្ឋនៅតំបន់អង្គរសូមអរគុណហើយ ជាមួយនឹងការចាកចេញ ប្រសិនបើមិនចាកចេញហើយនៅតែនៅខុសច្បាប់ក្នុងតំបន់អង្គរ អង្គរវត្តនឹងត្រូវគេដកចេញពីបេតិកភណ្ឌពិភពលោក ព្រោះវាបាត់បង់លក្ខណសម្បត្តិជាបេតិកភណ្ឌពិភពលោកហើយ ព្រោះយើងមិនអនុវត្តតាមកាតព្វកិច្ចតម្រូវដោយគណៈកម្មការបេតិកភណ្ឌពិភពលោក»។
លោក ហ៊ុន សែន បានមានប្រសាសន៍ថា ដើម្បីរក្សាតំបន់អង្គរជាបេតិកភណ្ឌពិភពលោកឱ្យនៅគង់វង្សបន្ត លោកបានចាត់ឱ្យឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ទៅឈរជើងដោះស្រាយសំណង់ខុសច្បាប់នៅទីនោះ។ ជាមួយគ្នានោះលោកក៏បានបញ្ជាឱ្យរៀបចំតំបន់រុនតាឯក សម្រាប់ពលរដ្ឋទៅតាំងលំនៅថ្មីដោយរៀបចំផ្លូវលំប្រវែងសរុប ១៤៤ គីឡូម៉ែត្រដែលនឹងអាចចាក់បេតុងនៅថ្ងៃអនាគត ក្រៅពីនោះក៏រៀបចំឱ្យមានសាលារៀន និងមន្ទីរពេទ្យផងដែរ។
លោក ហ៊ុន សែន បានលើកឡើងថា មានប្រជាពលរដ្ឋមួយចំនួន [ក្រុមលោក ខឹម វាសនា] បានចាញ់បោកការឃោសនាថា មកសៀមរាបនឹងទទួលបានដីដែលរាជរដ្ឋាភិបាលចែកជូននៅតំបន់រុនតាឯក ដូចអ្នកនៅតំបន់អង្គរ តែការពិតមិនមានចែកដីដូចការឃោសនានោះទេ។
លោកថែមទាំងបានដាក់បញ្ជាមិនឱ្យក្រុមលោក ខឹម វាសនា ទៅដណ្តើមដីនៅតំបន់រុនតាឯកទៀតផង។
លោកបញ្ជាក់ថា៖ «អ៊ីចឹងមួយចំនួនត្រូវបានគេឃោសនាថាមក គេចែកដីឱ្យ។ សុំទោសដីអត់បានចែកជូនទេ ហើយបើសិនជាលោក ខឹម វាសនា ចិត្តល្អ ដី ១២ ហិកតារបស់លោកចែកឱ្យប្រជាពលរដ្ឋដែលខ្លះបានលក់ដីបាត់ទៅហើយ ដើម្បីយកលុយធ្វើដំណើរមក [ចម្ការ ខឹម វាសនា] ត្រឡប់ទៅវិញ រកដីនៅមិនបាន អ៊ីចឹងលោក ខឹម វាសនា គួរតែឱ្យជួយធ្វើផ្ទះ ព្រោះអាចមានមួយចំនួនទៅវិញរកកន្លែងនៅអត់បានទេ»។
យ៉ាងណាក្ដី លោក ហ៊ុន សែន បានអំពាវនាវដល់អ្នកចាញ់បោកការឃោសនាថា មានទឹកលិចផែនដី ហើយនាំគ្នាប្រមូលផ្តុំនៅចម្ការលោក ខឹម វាសនា ដែលមានការខ្វែងគំនិតគ្នា បែកបាក់គ្រួសារ ប្រពន្ធកូន ឪពុកម្តាយជាដើមនោះសូមឱ្យមានការស្រុះស្រួលគ្នា ហើយត្រឡប់ទៅផ្ទះវិញ។
ចំណែកអ្នកនៅតាមមូលដ្ឋានកុំរើសអើង ចំពោះអ្នកដែលចាញ់បោកគេទាំងនោះហើយរាប់អានគ្នាធម្មតា ដោយសារអ្នកទាំងនោះក៏ជាជនរួមជាតិដែរ។
លោកថា៖ «គាត់ជឿជំនឿរបស់គាត់ខុស ប៉ុន្តែយើងត្រូវតែមានការសន្ដោស។ ក្រៅពីនោះខ្ញុំបានប្រាប់ទៅអភិបាលខេត្តសូមឱ្យរៀបចំមធ្យោបាយដឹកជញ្ជូនសម្រាប់អ្នកដែលគ្មានមធ្យោបាយធ្វើដំណើរទៅផ្ទះដោយប្រើប្រាស់រថយន្តយោធភូមិភាគទី ៤ និងកងពលធំលេខ ២ តែម្តង»។
លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងដែនដីបានសរសេរលើហ្វេសប៊ុកនៅថ្ងៃទី ៣១ ខែសីហាថា នៅព្រឹកថ្ងៃទី ៣១ ខែសីហា លោកបានចុះពិនិត្យទីតាំង និងជួបបងប្អូនប្រជាពលរដ្ឋកាន់កាប់ដី និងសំណង់ខុសច្បាប់ក្នុងតំបន់រមណីយដ្ឋានអង្គរ (ភូមិទក្សិណខាងត្បូង) ស្ថិតក្រោមការគ្រប់គ្រងរបស់អាជ្ញាធរជាតិអប្សរា។
លោកបានឱ្យដឹងថា ចាប់ពីថ្ងៃទី ១៨ សីហាដល់ថ្ងៃទី ២៩ សីហា ឆ្នាំ ២០២២ ការអនុវត្តយុទ្ធនាការចុះវាស់វែងកំណត់និយាមកាក្បាលដី និងអត្តសញ្ញាណអ្នកកាន់កាប់ដី និងសំណង់ខុសច្បាប់ក្នុងតំបន់អង្គរ និងតំបន់ដទៃទៀត ក្រុមការងារបានវាស់វែងក្បាលដី ៧៩ ភូមិនៃគោលដៅ ១១៤ ភូមិ រៀបចំដីឡូត៍បានទំហំ ១១១,១០ ហិកតា ផ្លូវក្រួសក្រហមបាន ៣ ២៣០ ម៉ែត្រ និងបោះបង្គោលព្រំដីនៅភូមិធម្មជាតិរុនតាឯកបាន ៨១៩ ឡូត៍៕