.jpg)
លោក ខឹម វាសនា នៅពេលអាជ្ញាធរចុះណែនាំឱ្យបញ្ឈប់សកម្មភាពប្រមូលផ្ដុំមនុស្ស។ រូបថត ហ្វេសប៊ុក
ភ្នំពេញៈ លោកនាយករដ្ឋមន្ត្រី ហ៊ុន សែន បញ្ជាក់ពីមូលហេតុដែលរដ្ឋាភិបាលមិនចាត់វិធានការលើលោក ខឹម វាសនា ប្រធានគណបក្សសម្ព័ន្ធ ដើម្បីប្រជាធិបតេយ្យ ដោយចាត់ទុកថា បុគ្គលរូបនេះមិនបានអំពាវនាវឱ្យកម្លាំងប្រដាប់អាវុធផ្តួលរំលំរាជរដ្ឋាភិបាល ឬឱ្យបរទេសកាត់ជំនួយនោះទេ បើប្រៀបធៀបជាមួយបុគ្គលផ្សេងៗ។
ការបញ្ជាក់ជំហរនេះ ធ្វើឡើងដើម្បីឆ្លើយតបទៅនឹងការស្នើឱ្យចាត់វិធានការលើលោក ខឹម វាសនា បន្ទាប់ពីមេបក្សរូបនេះ បង្ហោះសារនៅលើបណ្តាញសង្គមកាលពីយប់ថ្ងៃទី ៣០ ខែសីហា ដោយបានជេរប្រមាថ បែបអសីលធម៌។
ក្នុងឱកាសអញ្ជើញជាអធិបតីបើកការដ្ឋានសាងសង់ស្ពានអាកាសក្នុងរាជធានីភ្នំពេញចំនួន ២ បន្ថែមទៀត នៅថ្ងៃទី ៣១ សីហា ឆ្នាំ ២០២២ លោកនាយករដ្ឋមន្ត្រី ហ៊ុន សែន បានថ្លែងថា បើមើលពីសកម្មភាពរបស់លោក ខឹម វាសនា មិនបានពាក់ព័ន្ធការផ្តួលរំលំរដ្ឋាភិបាលនោះទេ។
លោកថា៖ «ហោចណាស់ ខឹម វាសនា គាត់អត់បានអំពាវនាវឱ្យមនុស្សផ្តួលរំលំរដ្ឋាភិបាល ដូចអ្នកដទៃទេ គាត់អត់បានអំពាវនាវឱ្យកម្លាំងប្រដាប់អាវុធ ផ្ទេរចុងកាណុងកាំភ្លើងមកបំផ្លាញរដ្ឋាភិបាល។ គាត់អត់បានអំពាវនាវឱ្យបរទេសកាត់ជំនួយពីស្រុកខ្មែរទេ ខុសពីអ្នកដទៃ គាត់ត្រឹមតែអបិយជំនឿរបស់គាត់ថា ពិភពលោកនឹងលិចលង់ស្លាប់អស់នៅសល់តែកន្លែងគាត់»។
លោកបន្តថា ស្ថានភាពនៅចម្ការលោក ខឹម វាសនា ខុសគ្នាបាតុកម្មនៅផ្លូវវ៉េងស្រេង ដែលបង្ខំចិត្តឱ្យអាជ្ញាធរប្រើប្រាស់កម្លាំង ដើម្បីការពារខ្លួន ការពារទ្រព្យសម្បត្តិសាធារណៈ និងឯកជន។ លោកថា៖ «វាមិនដែលធ្វើបាតុកម្មដល់ម៉ោង ៣ ភ្លឺ ហើយចែកនំប៉័ងនៅម៉ោង ៣ ភ្លឺដើម្បីត្រៀមធ្វើសកម្មភាព និងស្រែកឱ្យខ្ញុំចុះចេញពីតំណែង»។
លោក ហ៊ុន សែន គូសបញ្ជាក់ដែរថា ការធ្វើនយោបាយត្រូវពិនិត្យមើលឱ្យគ្រប់ជ្រុងជ្រោយ មិនត្រូវធ្វើតាមកំហឹងនោះទេ គឺនាំតែឱ្យចូលអន្ទាក់របស់គេ។ លោកថា៖ «ខ្ញុំគួរតែនិយាយទៅកាន់អ្នកគាំទ្រខ្ញុំដែលយប់មិញបានបង្ហាញកំហឹងពុះកញ្ជ្រោលអំពីសារដ៏ធ្ងន់ធ្ងរ ដែលឯកឧត្តម ខឹម វាសនា ធ្វើការប្រមាថចំពោះខ្ញុំ ជេរគ្រប់សព្វ ប៉ុន្តែជាបន្ទាន់ខ្ញុំបានចេញបទបញ្ជា ថាអ្វីដែលលោក ខឹម វាសនា ចង់បាននោះ គឺចាប់បង្ខំឱ្យរាជរដ្ឋាភិបាលប្រើប្រាស់កម្លាំងគឺផ្ទេរពីអបិយជំនឿទៅកាន់នយោបាយតែម្តង សូមកុំចូលអន្ទាក់ឱ្យសោះ»។
លោកបញ្ជាក់ទៀតថា៖ «ខ្ញុំបញ្ជាទៅសៀមរាបឱ្យប្រយ័ត្នអត់ត្រូវធ្វើសកម្មភាពអ្វីទាំងអស់ដល់ម៉ោង ១២ យប់ត្រូវផុតឱសានវាទ អ៊ីចឹងសូមកុំមើល ១ ជ្រុង អ្វីដែល ខឹម វាសនា ចង់បានគឺចង់ប្រើប្រាស់កម្លាំងរដ្ឋាភិបាល និងចាប់ខ្លួនគាត់ភ្លាម។ បើសិនជាយើងធ្វើបែបនេះ គឺចូលអន្ទាក់ ខឹម វាសនា។ ធ្វើនយោបាយត្រូវមើលព្រៃទាំងមូល កុំមើលឈើ ១ ដើមៗឱ្យសោះ»។ ជាមួយគ្នានេះដែរលោក ហ៊ុន សែន មិនទាន់អាចសន្និដ្ឋានថា លោក ខឹម វាសនា ជាមនុស្សមានបញ្ហាស្មារតីនោះទេ ដោយចាត់ទុកថា ការនិយាយបែបនេះដោយគ្មានភ័ស្តុតាងជាការប្រមាថមួយ។
លោកបន្តថា៖ «ខ្ញុំអត់យកការសន្និដ្ឋានថា គាត់ជាមនុស្សឡប់ សរសៃប្រសាទ ឬមិនគ្រប់ទេ នេះជាការប្រមាថមួយ ប៉ុន្តែអ្វីដែល ខឹម វាសនា គាត់លេង គឺបានសេចក្តីថា ១ ចាននេះគឺគាត់លេងដោយយករឿងរ៉ាវអបិយជំនឿយកមកដាក់បែបនេះ គាត់នឹងចាញ់ ប្រសិនបើអត់មានអ្វីកើតឡើងដូចដែលគាត់គិតថា ពិភពលោកនឹងស្លាប់ នោះបានសេចក្តីថា មនុស្សមិនធ្លាប់ជឿ ឬមនុស្សធ្លាប់ជឿ នឹងត្រូវឈប់ជឿគាត់ ព្រោះគាត់និយាយអត់ពិត»។
លោក ហ៊ុន សែន បញ្ជាក់ជាថ្មីថា ពិតណាស់សកម្មភាពរបស់ ខឹម វាសនា បើតាមផ្លូវច្បាប់គឺខុស ដោយសារគាត់បំភិតបំភ័យពលរដ្ឋឱ្យប្រមូលផ្តុំនៅចម្ការរបស់គាត់ ដែលនាំឱ្យខូចប្រយោជន៍ប្រជាពលរដ្ឋ និងពលករក្រៅស្រុក។ ជាមួយគ្នានេះលោកនាយករដ្ឋមន្ត្រីស្នើឱ្យមេបក្សរូបនេះបញ្ឈប់សកម្មភាពប្រមូលផ្តុំ និងអនុញ្ញាតឱ្យប្រជាពលរដ្ឋវិលត្រឡប់ទៅផ្ទះវិញ ដោយសន្តិវិធីដោយមិនត្រូវបង្ខាំងពលរដ្ឋឡើយ បើពុំនោះទេ កម្លាំងសមត្ថកិច្ចនឹងចាត់វិធានការ។ បន្ថែមពីនោះលោក ហ៊ុន សែន បានដាក់បញ្ជាទៅអាជ្ញាធរខេត្តសៀមរាបត្រូវតាមដានដោយយកចិត្តទុកដាក់នៅបរិវេណចម្ការលោក ខឹម វាសនា និងបិទទីតាំងនោះមិនឱ្យប្រមូលផ្តុំទៀតឡើយ ដោយលោកអំពាវនាវដល់ពលរដ្ឋផ្សេងទៀត កុំរើសអើងអ្នកទាំងនោះ។
លោកបញ្ជាក់ថា៖ «អំពាវនាវចំពោះប្រជាពលរដ្ឋក៏ដូចជាអំពាវនាវទៅកាន់អាជ្ញាធរ និងកម្លាំងប្រដាប់អាវុធ ត្រូវធ្វើកិច្ចនេះ ព្រោះនៅទីនោះចេញបាន ប៉ុន្តែចូលអត់បាន នេះគឺជាបទបញ្ជា និងការអនុវត្តរបស់អាជ្ញាធរនៅទីនោះ។ នៅពេលព្រឹត្តិការណ៍កើត ខ្ញុំឱ្យបទបញ្ជាតែ ២ ទី ១ ប្រយ័ត្នប្រយែងត្រូវការពារសន្តិសុខឱ្យខាងតែបាន កុំឱ្យបាតដៃទី ៣ ឆ្លៀតប្រើពេលនោះ ដើម្បីបំផ្លាញបងប្អូនប្រជាពលរដ្ឋនៅទីនោះ ជួនកាលបោកគ្រាប់បែក បង្កើតព្រឹត្តិការណ៍ទម្លាក់មករដ្ឋាភិបាល និងត្រូវពិនិត្យមើលអ្នកជំងឺ ព្រោះសុទ្ធតែជាប្រជាពលរដ្ឋដែលចាញ់បោកគេ»។ លោកបន្តថា៖ «ខ្ញុំសូមអំពាវនាវសូមឱ្យក្រុមគ្រួសារទាំងឡាយដែលមានការខ្វែងគំនិតគ្នារឿង ខឹម វាសនា សូមឱ្យរួបរួមគ្រួសារវិញ ហើយអ្នកនៅតាមមូលដ្ឋាននានាកុំរើសអើងចំពោះអ្នកដែលចាញ់បោកគេនេះ»។
ប្រធានវិទ្យាស្ថានទំនាក់ទំនងអន្តរជាតិនៃរាជបណិ្ឌត្យសភាកម្ពុជាលោក គិន ភា ថ្លែងថា សកម្មភាពរបស់លោក ខឹម វាសនា ពិតជាបានធ្វើឱ្យប៉ះពាល់ដល់ផលប្រយោជន៍ប្រជាពលរដ្ឋ និងពលករដែលកំពុងបម្រើការងារនៅបរទេសរួចទៅហើយ។ លោកថា រដ្ឋាភិបាលមិនគួរបណ្តែតបណ្តោយឱ្យអ្នកអបិយជំនឿរូបនេះបន្តសកម្មភាពទៀតទេ ពីព្រោះវាធ្វើឱ្យខូចសណ្តាប់ធ្នាប់សង្គម។
លោកបញ្ជាក់ថា៖ «វាអាចបង្កទៅជាផលវិបាកសង្គមនៅពេលក្រោយ ដ្បិតមិនមែនរឿងនយោបាយ ប៉ុន្តែជាវិបត្តិសង្គម និងធ្វើឱ្យមានផលប៉ះពាល់សង្គមធ្ងន់ធ្ងរទៅថ្ងៃក្រោយ ដែលរដ្ឋាភិបាលមិនអាចព្រងើយកន្តើយបានទេ ត្រូវតែមានវិធានការជាក់លាក់ច្បាស់លាស់»។
អ្នកនាំពាក្យក្រសួងមហាផ្ទៃ លោក ខៀវ សុភ័គ ប្រាប់ភ្នំពេញប៉ុស្តិ៍ថា ក្រសួងបានចាត់វិធានការ ដោយបានណែនាំឱ្យរដ្ឋបាលខេត្តសៀមរាបចុះណែនាំ និងឱ្យរំសាយការប្រមូលផ្តុំរួចហើយ ប៉ុន្តែការងារនេះត្រូវធ្វើដោយសន្សឹមៗ ដើម្បីបញ្ចៀសអំពើហិង្សា។
លោកថា៖ «ដូចពាក្យខ្មែរថា អូសទូកកុំឱ្យល្អានចាប់ត្រីបានកុំឱ្យល្អក់ទឹក ព្រោះតាមព័ត៌មានបឋមមកឮថា គាត់ប្រេះសរសៃ ប៉ុន្តែយើងមិនទាន់បញ្ជាក់បានទេឮតែគេថា អ៊ីចឹងទាល់តែនាំគាត់ទៅពេទ្យ ហើយយើងមិនត្រូវប្រកាន់គេទេ»។ ជាមួយគ្នានេះលោកថា ក្នុងករណីពិនិត្យឃើញថា លោក ខឹម វាសនា មានបញ្ហាផ្នែកស្មារតីមែន តាមការបញ្ជាក់របស់គ្រូពេទ្យមែននោះ គឺមិនអាចឱ្យគាត់ដឹកនាំគណបក្សនយោបាយតទៅទៀតបានទេ។ «ក្នុងស្ថានភាពនេះ យើងពិចារណាដែរ ប៉ុន្តែត្រូវមានសំបុត្របញ្ជាក់ពីមន្ទីរពេទ្យ ហើយបើគាត់ (ខឹម វាសនា) នៅអ៊ីចឹងទៀតដឹកនាំគណបក្សនយោបាយម៉េចកើត គេហៅថា បាត់សតិសម្បជញ្ញៈច្បាប់គណបក្សមានចែង»៕
