ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈ ប្រកាសឱ្យកម្មករនិយោជិតក្នុងក្រុមហ៊ុន ស៊ុនស៊ីង នៅស្រុកអង្គស្នួល ខេត្តកណ្តាលចំនួន ២២ នាក់ ទៅបើកប្រាក់បុរេប្រទានចំនួន៣ចំណុចពីរដ្ឋាភិបាល ចាប់ពីថ្ងៃទី ១ ខែកញ្ញា តទៅ ដែលមន្ត្រីអះអាងថា កញ្ចប់ថវិកាចំណាយលើកម្មករក្នុងក្រុមហ៊ុននេះអស់ប្រមាណ ១ ម៉ឺនដុល្លារ។
ក្រុមហ៊ុនស៊ុនស៊ីង ហ្គាមិន គឺជារោងចក្រកាត់ដេរស៊ីឈ្នួលបន្តពីរោងចក្រផ្សេង ដែលមានកម្មករ សរុបចំនួន ៤២ នាក់។ កាលពីថ្ងៃទី ១០ ខែ សីហា ឆ្នាំ ២០២២ ថៅកែជនជាតិចិន បានរត់ចោលកម្មករ បន្ទាប់ពីដោះស្រាយជូនកម្មករបានចំនួន ២០ នាក់។ ការប្រកាសដោះស្រាយជូនកម្មកររបស់ក្រសួងនាពេលនេះ បន្ទាប់ពីកម្មករបានធ្វើការតវ៉ាដោយសន្តិវិធី និងបានដាក់ពាក្យបណ្តឹងទៅសាលាស្រុកឱ្យជួយដោះស្រាយ។
សេចក្តីជូនដំណឹងរបស់ក្រសួងការងារ ចុះថ្ងៃទី ៣១ សីហា បានឱ្យដឹងថា ដោយអនុវត្តតាមអនុសាសន៍របស់លោកនាយករដ្ឋមន្ត្រី ហ៊ុន សែន ក្រសួងនឹងចាប់ផ្តើមបើកផ្តល់ថវិកាបុរេប្រទានរបស់រដ្ឋាភិបាលកម្ពុជា ជូនកម្មករចាប់ពីម៉ោង ២ រសៀលថ្ងៃទី ១ កញ្ញា តទៅ នៅសាលាស្រុកអង្គស្នួល ស្ថិតក្នុងភូមិព្រៃពពេល ឃុំពើក ខេត្តកណ្តាល។
ក្រសួងបញ្ជាក់ថា៖ «សូមបងប្អូនកម្មករ និយោជិត យកមកជាមួយ នូវឯកសារមួយចំនួន ដូចជាបណ្ណសម្គាល់ខ្លួនកម្មករនិយោជិត ឬកិច្ចសន្យាការងារ និងសៀវភៅការងារកម្មករនិយោជិត ឬបណ្ណបេឡាជាតិសន្តិសុខសង្គម ឬអត្តសញ្ញាណប័ណ្ណសញ្ជាតិខ្មែរ ឬលិខិតឆ្លងដែន។ សូមភ្ជាប់មកជាមួយនូវបណ្ណបើកប្រាក់ឈ្នួលប្រចាំខែរបស់កម្មករនិយោជិតម្នាក់ៗបើមាន»។
លោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ ប្រាប់ ភ្នំពេញ ប៉ុស្តិ៍ នៅថ្ងៃទី ១ កញ្ញាថា ក្រសួងនឹងធ្វើការបើកផ្តល់ជូនកម្មករនៅក្រុមហ៊ុននេះចំនួន ២២ នាក់ ដែលគ្រោងនឹងចំណាយថវិកាប្រមាណ ១ ម៉ឺនដុល្លារ។
ជាមួយគ្នានេះ លោក ហេង សួរ អះអាងថា ក្រសួងនឹងបន្តពិនិត្យមើលទៅលើគោលការណ៍ផ្លូវច្បាប់ក្នុងការដោះស្រាយទៅតាមស្ថានភាពជាក់ស្តែងរបស់រោងចក្រដទៃទៀត ដែលជួបប្រទះនឹងបញ្ហាដូចគ្នានេះ ដើម្បីឱ្យប្រាកដថា រាល់បញ្ហារបស់កម្មករ គឺត្រូវបានដោះស្រាយ។
លោកបានបញ្ជាក់ថា៖ «ក្រសួងនឹងពិនិត្យមើលទៅតាមចំនួនជាក់ស្តែងក្នុងរោងចក្រនីមួយៗ ដែលមានបញ្ហា»។
បើតាមមន្ត្រីគណៈកម្មការដោះស្រាយវិវាទបាតុកម្មកូដកម្ម និងគ្រប់មុខសញ្ញា សុំមិនបញ្ចេញឈ្មោះឱ្យដឹងថា ការទូទាត់ និងការផ្តល់ព័ត៌មានដល់កម្មករទាំង ២២ នាក់ បានរៀបចំរួចរាល់អស់ហើយ ដោយរង់ចាំតែការមកទទួលប្រាក់របស់កម្មករប៉ុណ្ណោះ។ ជាគោលការណ៍ក្រសួង នឹងធ្វើការទូទាត់ប្រាក់អត្ថប្រយោជន៍ចំនួន៣ចំណុច។ ទី១ ប្រាក់ឈ្នួលខែចុងក្រោយ ដែលមិនទាន់បានបើក ទី២ ប្រាក់បំណាច់ជួសការសម្រាកប្រចាំឆ្នាំដែលនៅសល់ និងទី៣ ប្រាក់បំណាច់អតីតភាពការងារថ្មីក្នុងឆ្នាំ និងប្រាក់រំឭកប្រាក់បំណាច់អតីតភាពការងារ ដែលមានមុនឆ្នាំ ២០១៩។
ទោះយ៉ាងណា លោកថា ការដោះស្រាយជូនកម្មករក្នុងក្រុមហ៊ុននេះ គឺអាស្រ័យលើស្ថានភាពរបស់កម្មករនីមួយៗថា ពួកគាត់នៅសល់ចំណុចណាខ្លះ ដែលនឹងទទួលបានអត្ថប្រយោជន៍ទៅតាមអ្វីដែលកម្មករនៅសល់។
អ្នកស្រី គឺ ហ៊ួន ជាកម្មករក្នុងក្រុមហ៊ុន ស៊ុន ស៊ីង ប្រាប់ ភ្នំពេញ ប៉ុស្តិ៍ នៅថ្ងៃទី ១ កញ្ញាថា អ្នកស្រីទើបបានមកធ្វើការនៅក្នុងរោងចក្រនេះ រយៈពេល ២ ខែប៉ុណ្ណោះ ហើយធ្វើការមិនទាន់បានប៉ុន្មានផង ក៏ជួបហេតុការណ៍នេះ។ អ្នកស្រី គឺ ហ៊ួន ដែលបានចាកចេញពីស្រុកកំណើតនៅឯខេត្តកំពង់ធំ មកធ្វើការនៅក្រុមហ៊ុននេះបន្តថា ថវិកាដែលក្រសួងបានទូទាត់ នាពេលនេះនឹងជួយអ្នកស្រីបានមួយគ្រា សម្រាប់ការហូបចុកប្រចាំថ្ងៃ និងសម្រាប់បង់ឱ្យផ្ទះជួល ខណៈអ្នកស្រីមិនទាន់អាចរកការងារថ្មីបាននៅឡើយ។
អ្នកស្រីនិយាយថា៖ «ខ្ញុំអរណាស់ ដូចកើតម្តងទៀតអ៊ីចឹង ព្រោះខ្ញុំបន់អស់ហើយ នៅពេលថៅកែរត់ចោលបាត់ទៅ។ ខ្ញុំអរគុណក្រសួង និងបងៗដែលបានជួយខ្ញុំ។ ខ្ញុំទើបតែមកធ្វើការនៅភ្នំពេញ ដល់ពេលថៅកែរត់ចោល គ្មានលុយបង់ផ្ទះជួល ណាត្រូវចំណាយចាយរាល់ថ្ងៃ ហើយផ្ទះ [នៅស្រុកកំណើត] ក៏គ្មានលុយផ្ញើឱ្យ។ ដល់គេជួយអ៊ីចឹង យើងបានមួយគ្រាដែរ»។
កាលពីថ្ងៃទី ១៧ សីហា លោកនាយករដ្ឋមន្ត្រី ហ៊ុន សែន បានបញ្ជាឱ្យក្រសួងការងារចេញកញ្ចប់ថវិការដ្ឋ ដើម្បីដោះស្រាយផ្តល់សំណងជូនកម្មករជំនួសឱ្យថៅកែនៅតាមរោងចក្រណាដែលត្រូវបានថៅកែបិទទ្វារត់ចោលរោងចក្រ ហើយ នឹងចាត់វិធានការជាមួយថៅកែជាក្រោយ។
ក្រោយការប្រកាសភ្លាមៗ ក្រសួងការងារ ក៏បានធ្វើការដោះស្រាយជូនកម្មករជាង ៤០០ នាក់ នៅរោងចក្រឃែនធើរេន អែភែរឹល (ខេមបូឌា) ដែលមានទីតាំងនៅភូមិត្រពាំងថ្លឹង ៣ សង្កាត់ចោមចៅទី១ ខណ្ឌពោធិ៍សែនជ័យ ដែលចំណាយថវិកាប្រមាណ ៦០ ម៉ឺនដុល្លារ៕