.jpg)
កិច្ចប្រជុំ ក្រុមប្រឹក្សាជាតិប្រាក់ឈ្នួលកម្មករ កាលពីថ្ងៃទី ៣១ សីហា។ រូបថត ក្រសួងការងារ
ភ្នំពេញៈក្រសួងការងារ និងបណ្តុះបណ្តាលវិជ្ជាជីវៈ បង្ហើបពីចំនួនប្រាក់ឈ្នួលថ្មី ដែលអាចនឹងឡើងក្នុងរង្វង់ ២០០ ដុល្លារ សម្រាប់ឆ្នាំ ២០២៣ ខាងមុខក្នុងវិស័យវាយនភណ្ឌកាត់ដេរ ផលិតស្បែកជើង និងផលិតផលធ្វើដំណើរ និងកាបូប ខណៈសហជីពកំណត់តួលេខជាង ២០០ ដុល្លារ ចំណែកនិយោជកកំណត់ក្រោម ២០០ ដុល្លារ ដើម្បីធ្វើការចរចា។
កាលពីថ្ងៃទី ៣១ ខែ សីហា ឆ្នាំ ២០២២ ក្រុមប្រឹក្សាជាតិប្រាក់ឈ្នួលអប្បបរមា បានបន្តកិច្ចប្រជុំរបស់ខ្លួនចាប់ពីម៉ោង ២:៣០ នាទីរសៀល ដល់ម៉ោងប្រមាណជា ៧ យប់ ដើម្បីបន្តពិភាក្សាកំណត់ ប្រាក់ឈ្នួលអប្បបរមាផ្នែកវាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរនិងកាបូបសម្រាប់ឆ្នាំ ២០២៣។
ក្រោយចប់កិច្ចប្រជុំ ក្រសួងការងារ បានប្រកាសអំពីលទ្ធផល នៅក្នុងសេចក្តីប្រកាសព័ត៌មានរបស់ខ្លួន ដោយបានអះអាងថា ឆ្លងកាត់ការប្រជុំផ្ទៃក្នុងចំនួន ៣លើក បាននាំឱ្យភាគីតំណាងកម្មករនិយោជិត សម្រេចបន្ថយតួលេខរបស់ខ្លួនពីចំនួន ២១៥ ដុល្លារ មកនៅ ២១៣ ដុល្លារជាមូលដ្ឋានក្នុងការចរចា។ ក្រសួងបានបន្តថា ចំណែកការប្រជុំផ្ទៃក្នុងចំនួន ២ លើករបស់ភាគីនិយោជក បានឱ្យមានការសម្រេចដំឡើងតួលេខពីចំនួន ១៩៤ ដុល្លារ ទៅតួលេខ ១៩៦ ដុល្លារ ដើម្បីជាមូលដ្ឋានក្នុងការចរចា។
ជាមួយនឹងការកំណត់តួលេខរបស់ភាគីទាំង ២ នេះ ក្រសួងការងារ ក៏បានប្រកាសដែរថា តាមលក្ខណៈបច្ចេកទេស និងបម្រែបម្រួលទិន្នន័យនៃលក្ខណវិនិច្ឆ័យទាំង ៧ ដែលជាមូលដ្ឋានកំណត់ប្រាក់ឈ្នួលអប្បបរមានោះ អគ្គលេខាធិការដ្ឋានក្រុមប្រឹក្សាជាតិប្រាក់ឈ្នួលអប្បបរមា បានគណនាឃើញថា តួលេខប្រាក់ឈ្នួលអប្បបរមាសម្រាប់ឆ្នាំ ២០២៣ គឺ ចំនួន ១៩៧,៨៦ ដុល្លារ។
ក្រសួងបានបញ្ជាក់ថា៖ «ភាគីទាំង ២ បានបន្តពន្យល់ និងការពារគោលជំហររបស់ខ្លួនទៅ វិញទៅមកប្រកបដោយវិជ្ជាជីវៈ និងភាពចាស់ទុំ។ នៅក្នុងកិច្ចប្រជុំត្រីភាគីនេះ ភាគីរាជរដ្ឋាភិបាលក៏បានបន្ត សម្របសម្រួល និងផ្តល់នូវការពន្យល់បន្ថែមលើចំណុចនានា តាមសំណូមពររបស់ភាគីតំណាងកម្មករនិយោជិត និងភាគីតំណាងនិយោជកផងដែរ»។
ជាមួយនឹងការចរចាបន្ត ក្រសួងការងារ និងបណ្តុះបណ្តាលវិជ្ជាជីវៈ បានកំណត់កិច្ចពិភាក្សាជាលក្ខណត្រីភាគីជាលើកទី៤ បន្តទៀតនៅម៉ោង ២ កន្លះរសៀល នាថ្ងៃទី ២១ ខែ កញ្ញា ឆ្នាំ ២០២២ ដែលកាលបរិច្ឆេទជួបចរចាជាលើកចុងក្រោយ នឹងធ្វើឡើងនៅថ្ងៃទី ២៣ កញ្ញា ខាងមុខ។
កាលពីឆ្នាំ ២០២១ ក្រោយក្រុមប្រឹក្សាជាតិប្រាក់ឈ្នួលអប្បបរមា សម្រេចស្នើតួលេខ ១៩២ ដុល្លារ យកមកអនុវត្តក្នុងឆ្នាំ ២០២២ លោកនាយករដ្ឋមន្ត្រី ហ៊ុន សែន បានប្រកាសបន្ថែមទឹកប្រាក់ចំនួន ២ ដុល្លារបន្ថែមទៀតពីលើការស្នើនេះ ដែលនាំឱ្យប្រាក់ឈ្នួលសម្រាប់អនុវត្តក្នុងឆ្នាំ ២០២២ ឡើងដល់ ១៩៤ ដុល្លារ ក្នុង ១ ខែ។
លោក អាត់ ធន់ ប្រធានសហភាពការងារកម្ពុជា ដែលបានចូលរួមកិច្ចប្រជុំត្រីភាគីទាំង៣លើក បានបង្ហាញភាពវិជ្ជមាននៃការចរចារវាងភាគីពាក់ព័ន្ធ ហើយលោកនៅតែសង្ឃឹមថា ការកំណត់ប្រាក់ឈ្នួលថ្មីសម្រាប់អនុវត្ត ឆ្នាំ ២០២៣ ខាងមុខ នឹងមានលក្ខណៈអំណោយផលសម្រាប់កម្មករ។ លោកបន្តថា ការចរចាប្រាក់ឈ្នូលសម្រាប់ឆ្នាំ ២០២៣ ខាងមុខ ពិតជាមានសារៈសំខាន់ណាស់សម្រាប់កម្មករនិយោជិត ព្រោះទំនិញ ប្រេងសាំង ម្ហូបអាហារ និងរបស់ប្រើប្រាស់ប្រចាំថ្ងៃ ផ្សេងទៀត មានតម្លៃកើនឡើងខ្ពស់ ដែលកំពុងធ្វើឱ្យប៉ះពាល់ជីវភាពរបស់កម្មករ។
លោកបានបញ្ជាក់ថា៖ «ដោយសារតែកិច្ចប្រជុំរបស់យើង បានប្រជុំគ្នាច្រើនលើកច្រើនសា។ អ៊ីចឹងបានយើងត្រូវបន្តប្រជុំគ្នាបន្តទៀត ដើម្បីជជែកគ្នានៅក្នុងលក្ខណៈបច្ចេកទេសក្នុងការឯកភាពគ្នា។ ក្នុងករណីដែលមិនមានការត្រូវរ៉ូវគ្នាទេ គឺនៅថ្ងៃទី ២១ កញ្ញា ភាគីនឹងប្រជុំផ្លូវការដោយមានរដ្ឋមន្ត្រីចូលរួម ដើម្បីប្រជុំឡើងវិញ ហើយនៅពេលនោះ អាចនឹងកំណត់ប្រាក់ឈ្នួលសម្រាប់ឆ្នាំ ២០២៣ បាន»។
កម្មករម្នាក់កំពុងធ្វើការនៅរោងចក្រ ១ កន្លែងនៅរាជធានីភ្នំពេញសុំមិនបញ្ចេញឈ្មោះបានលើកឡើងថា សម្រាប់ប្រាក់ខែគោលចំនួន ១៩៧ នេះ គឺលោកអាចទទួលយកបាន ក្នុងករណីរបស់ប្រើប្រាស់ប្រចាំថ្ងៃមានតម្លៃថោក។ ប៉ុន្តែលោកបន្តថា បច្ចុប្បន្នម្ហូបអាហារឡើងថ្លៃខ្ពស់ ដូច្នេះប្រាក់ខែ ១៩៧ ដុល្លារនេះ មិនអាចធ្វើឱ្យលោក រស់នៅបានក្នុងជីវភាពសមរម្យនោះទេ៕
វីដេអូ៖
