.jpg)
អ្នកជំនាញពាក់ព័ន្ធ នៅក្នុងវគ្គបណ្តុះបណ្តាល ស្តីពីយុទ្ធសាស្រ្តទំនាក់ទំនង និងការផ្សព្វផ្សាយប្រព័ន្ធគាំពារសង្គមកាលពីថ្ងៃទី ៣១ សីហា។ រូបថត NSPC
ភ្នំពេញៈ អ្នកជំនាញពាក់ព័ន្ធ បានចូលរួមវគ្គបណ្តុះបណ្តាល ស្តីពីយុទ្ធសាស្រ្តទំនាក់ទំនង និងការផ្សព្វផ្សាយប្រព័ន្ធគាំពារសង្គម ដែលជាការបោះជំហានថ្មីមួយទៀត លើការងារទំនាក់ទំនង និងផ្សព្វផ្សាយក្នុងប្រព័ន្ធគាំពារសង្គម ដើម្បីធ្វើឱ្យកាន់តែមានប្រសិទ្ធភាព និងបង្កើនកិច្ចសហការបន្ថែមទៀត លើការងារទំនាក់ទំនង និងការផ្សព្វផ្សាយពីគ្រប់ភាគីពាក់ព័ន្ធ ដើម្បីឱ្យប្រជាពលរដ្ឋទទួលបានព័ត៌មានគ្រប់ជ្រុងជ្រោយ និងទាន់ពេល។
នេះជាការថ្លែងរបស់លោកស្រី ប៉ែន សុបភា រដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ ក្នុងសិក្ខាសាលា ស្តីពីយុទ្ធសាស្រ្តទំនាក់ទំនង និងផ្សព្វផ្សាយគាំពារសង្គម ដែលរៀបចំដោយក្រុមប្រឹក្សាជាតិគាំពារសង្គម នៅថ្ងៃទី ៣១ ខែ សីហា ឆ្នាំ ២០២២ ដែលមានអ្នកចូលរួមពីតំណាងក្រសួង-ស្ថាប័ន ដៃគូអភិវឌ្ឍន៍ និងអង្គការសង្គមស៊ីវិលសរុបជាង ១០០ នាក់។
លោកស្រី ប៉ែន សុបភា បានសង្កត់ធ្ងន់ថា សិក្ខាសាលា និងវគ្គបណ្តុះបណ្តាលនេះ សបញ្ជាក់អំពីឆន្ទៈ និងការប្តេជ្ញារបស់ក្រុមប្រឹក្សាជាតិគាំពារសង្គម ក្នុងតួនាទីជាសេនាធិការ របស់រាជរដ្ឋាភិបាល ក្នុងការបន្តអភិវឌ្ឍប្រព័ន្ធគាំពារសង្គមដ៏រឹងមាំមួយប្រកបដោយចីរភាព និងបរិយាប័ន្ន ដើម្បីជាប្រយោជន៍សម្រាប់ប្រជាពលរដ្ឋគ្រប់ក្រុមគោលដៅ។
លោកស្រីថ្លែងថា៖ «ដើម្បីសម្រេចបាន ភាពជោគជ័យលើការងារទំនាក់ទំនង និងផ្សព្វផ្សាយនេះ ក្រុមប្រឹក្សាជាតិគាំពារសង្គមបានគិតគូរ យ៉ាងយកចិត្តទុកដាក់ និងធ្វើសកម្មភាពយ៉ាងសកម្ម ដោយបានធ្វើការផ្សព្វផ្សាយតាមរយៈ ទូរទស្សន៍ វិទ្យុ ផ្ទាំងផ្សព្វផ្សាយធំៗ នៅតាមទីសាធារណៈ សារព័ត៌មានជាតិ និងអន្តរជាតិ និងបណ្តាញសង្គមនានា»។
លោកស្រីលើកឡើងថា តាមរយៈការផ្សព្វផ្សាយនេះ ពលរដ្ឋបានដឹងអំពីអត្ថប្រយោជន៍នៃរបប ឬកម្មវិធីនានារបស់ប្រព័ន្ធគាំពារសង្គម ដែលរាជរដ្ឋាភិបាលបាននិងកំពុងផ្តល់ជូន រួមមានកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ ១៩។ ការដំឡើងបៀវត្សរ៍របស់មន្ត្រីរាជការស៊ីវិល និងកងកម្លាំងប្រដាប់អាវុធ ការកែសម្រួលប្រាក់សោធននិវត្តន៍របស់មន្ត្រីរាជការ និងអតីតយុទ្ធជន និងការដាក់ឱ្យអនុវត្តរបបសន្តិសុខសង្គមផ្នែកប្រាក់សោធន ជាដើម។
លោក ចន ណារិទ្ធ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការក្រុមប្រឹក្សាជាតិគាំពារសង្គមបានលើកឡើងថា សិក្ខាសាលា និងវគ្គបណ្តុះបណ្តាលរយៈពេល ១ ថ្ងៃពេញនេះ ជាផ្នែកមួយដ៏សំខាន់ក្នុងការអភិវឌ្ឍ និងកសាងប្រព័ន្ធគាំពារសង្គម និងមានគោលបំណងសំខាន់ ២ គឺ បង្កើនប្រសិទ្ធភាពនៃការងារទំនាក់ទំនង និងផ្សព្វផ្សាយកិច្ចគាំពារសង្គម និងបង្កើនកិច្ចសហការពាក់ព័ន្ធនានាលើការងារទំនាក់ទំនង និងផ្សព្វផ្សាយ រវាងក្រសួង-ស្ថាប័ន ដៃគូអភិវឌ្ឍន៍ និងអង្គការសង្គមស៊ីវិលពាក់ព័ន្ធ។
លោកបញ្ជាក់ថា៖ «ប្រព័ន្ធគាំពារសង្គមកម្ពុជាបាននិងកំពុងបោះជំហានទៅមុខប្រកបដោយវឌ្ឍនភាព និងមោទកភាពដែលចង្អុលបង្ហាញដោយ “ក្របខ័ណ្ឌគោលនយោបាយជាតិគាំពារសង្គម ២០១៦-២០២៥” និងក្រោមការដឹកនាំ និងតម្រង់ទិសរបស់ ក្រុមប្រឹក្សាជាតិគាំពារសង្គម ដែលមានឯកឧត្តម អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ ជាប្រធាន»។
លោកបញ្ជាក់ថា វគ្គបណ្តុះបណ្តាលបែបនេះធ្វើឡើងជាលើកទី៣ ហើយ ប៉ុន្តែលើកនេះខុសពីវគ្គមុនៗ ដោយសារមានការចូលរួមពីគ្រប់ភាគីពាក់ព័ន្ធ ដោយមានទាំងក្រសួង-ស្ថាប័នពាក់ព័ន្ធ ដៃគូអភិវឌ្ឍន៍ និង សង្គមស៊ីវិល ផងដែរ។
លើកនេះមិនផ្តោតតែលើចំណេះដឹងលើកការងារបណ្តុះបណ្តាលផ្នែកទំនាក់ទំនង និងផ្សព្វផ្សាយមួយប៉ុណ្តោះទេ ប៉ុន្តែថែមទាំង មានគោលបំណងបង្កើនកិច្ចសហការគ្នា លើការងារផ្សព្វផ្សាយ និងទំនាក់ទំនង ជាមួយក្រសួងស្ថានប័នរបស់រដ្ឋ និង អង្គការសង្គមស៊ីវិលនានា ដែលកំពុងធ្វើការងារគាំពារសង្គមជាពិសេស គឺដៃគូអភិវឌ្ឍន៍ និងអង្គការសង្គមស៊ីវិល ដែលធ្វើការនៅកន្លែងពិបាកទទួលព័ត៌មាន ដូចជា បឹងទន្លេសាប និងនៅតំបន់ ជនជាតិដើមភាគតិចរស់នៅ។
លោកស្រី Corinna Heinake នាយិកាគ្រប់គ្រងកម្មវិធីលើកកម្ពស់ប្រព័ន្ធគាំពារសង្គម និងសុខភាព បានកោតសរសើរអគ្គលេខាធិការក្រុមប្រឹក្សាជាតិគាំពារសង្គម ដែលតែងតែធ្វើការងារយ៉ាងសកម្ម និងសហការយ៉ាងល្អដើម្បីកសាងប្រព័ន្ធគាំពារសង្គមមួយប្រកបដោយបរិយាប័ន្ន ជាពិសេសកិច្ចសហការយ៉ាងជិតស្និទ្ធ ជាមួយទីភ្នាក់ងារសហប្រតិបត្តិការអាល្លឺម៉ង់សម្រាប់ការអភិវឌ្ឍន៍អន្តរជាតិ (GIZ)។
លោកស្រីបានបន្តថា GIZ នឹងបន្តកិច្ចសហប្រតិបត្តិការលើការងារទំនាក់ទំនងសារធារណៈ និងផ្សព្វផ្សាយ ជាមួយអគ្គលេខាធិការដ្ឋានក្រុមប្រឹក្សាជាតិគាំពារសង្គម និងក្រសួង-ស្ថាប័នពាក់ព័ន្ធ ដើម្បីចូលរួមកសាងប្រព័ន្ធគាំពារសង្គមមួយដែលអាចឈានទៅគ្របសណ្តប់ដល់ប្រជាពលរដ្ឋគ្រប់គ្នា។
សូមបញ្ជាក់ជូនថា ក្នុងពេលថ្មីៗនេះ ក្រុមប្រឹក្សាជាតិគាំពារសង្គមបានដាក់ឱ្យប្រើប្រាស់ជាផ្លូវការនូវ “យុទ្ធសាស្រ្តទំនាក់ទំនង និងផ្សព្វផ្សាយការគាំពារសង្គម”ដែលជាយុទ្ធសាស្រ្ត ដ៏សំខាន់ក្នុងការជំរុញការងារទំនាក់ទំនង និងផ្សព្វផ្សាយក្នុងប្រព័ន្ធគាំពារសង្គមឱ្យកាន់តែរីកចម្រើន និងឈានឆ្ពោះទៅគ្របដណ្តប់ប្រជាពលរដ្ឋទូទាំងប្រទេស៕
